Casamento cu Ta Honorabel den Bista di Dios y di Hende

“Tabatin un casamento na Cana . . . Hesus cu su discipelnan tambe tabata combida pa e casamento.”—JUAN 2:1, 2.

1. Kico nos por siña for di e relato tocante Hesus na Cana?

HESUS, su mama y algun di su discipelnan tabata sa di e goso cu un casamento honorabel entre sirbidornan di Dios por trece cu ne. Cristo asta a duna realse na un casamento haciendo su prome milager registra einan, y asina a contribui na e goso di e ocasion ei. (Juan 2:1-11) Kisas bo a yega di asisti y pasa ratonan agradabel na casamento di cristiannan cu kier sirbi Jehova como pareha felismente casa. Of talbes bo mes tin pensa di casa of ta yudando un amigo of amiga haci su casamento un exito. Kico por contribui na esei?

2. Ki informacion Bijbel ta duna encuanto casamento?

² Cristiannan a ripara cu e conseho den e Palabra inspira di Dios pa un homber y un muher cu ta plania pa casa ta masha probechoso. (2 Timoteo 3:16, 17) Ta berdad cu Bijbel no ta bisa specificamente con un casamento cristian mester tuma luga. Esei ta comprendibel pasobra cada pais y cada epoca tin su propio custumbernan y asta rekisitonan legal. Por ehempel, den Israel di antiguedad, no tabatin un ceremonia formal di casamento. Riba e dia di casamento, e bruidegom simplemente tabata trece e bruid na su mes cas of na cas di su tata. (Genesis 24:67; Isaias 61:10; Mateo 1:24, NW) Cu e acto publico aki e pareha a duna di conoce cu nan a casa. No tabatin e ceremonianan formal cu sa tuma luga den hopi casamento djawe.

3. Na ki evenemento Hesus a duna su contribucion ora e tabata na Cana?

³ Pa e Israelitanan, cu e acto di hiba e bruid na cas di e bruidegom e casamento of matrimonio a tuma luga. Despues, kisas nan a tene un bankete pa celebra e ocasion. Juan 2:1 ta bisa: “Tabatin un casamento na Cana.” Pero un mihor traduccion pa e palabra original ta “fiesta di casamento” of “bankete di casamento.”a (Mateo 22:2-10; 25:10; Lucas 14:8) E relato ta mustra bon cla cu Hesus tabata presente na un fiesta en conexion cu un casamento Hudiu y cu el a duna su contribucion na esaki. Ta bon pa nota si cu e forma cu dos hende tabata casa e tempo ei ta diferente for di loke ta comun awe.

4. Con algun cristian ta opta pa casa, y pakico?

⁴ Awe, den hopi pais, ora un cristian kier casa e mester cumpli cu cierto rekisito legal. Unabes e haci esei, e por casa den cualkier manera cu lei ta permiti. Esei por ta den un ceremonia chikito y simpel efectua pa un hues, alcalde of minister religioso autorisa pa gobierno. Algun cristian ta opta pa casa den e forma ei. Kisas nan ta invita algun famia of amigo cristian pa ta presente como testigo of simplemente pa comparti e goso di e ocasion importante aki cu nan. (Jeremias 33:11; Juan 3:29) Podise otro cristiannan ta prefera pa no tene un fiesta di casamento of receptie grandi cu lo ensera bastante planiamento y gasto. En bes di esei, talbes nan ta pone un comemento simpel cu djis algun persona mas cerca na nan. Sea loke sea nos ta prefera personalmente, nos mester reconoce cu otro cristiannan maduro por tin un punto di bista distinto for di esun di nos.—Romanonan 14:3, 4.

5. Pakico hopi cristian kier tin un discurso biblico ora nan ta casa, y kico e discurso ei ta trece dilanti?

⁵ Mayoria pareha cristian ta opta pa tene un discurso biblico na nan casamento.b Nan ta reconoce cu ta Jehova a origina matrimonio y cu den su Palabra e ta duna conseho sabi riba con un matrimonio por tin exito y felicidad. (Genesis 2:22-24; Marco 10:6-9; Efesionan 5:22-33) Ademas, mayoria pareha ta desea pa nan famia- y amigonan cristian tambe t’ei na e ocasion gososo ei. Pero, con nos tin cu mira e gran variedad di rekisito legal, procedimento y asta custumbernan local estableci? E articulo aki lo analisa e situacion den varios region. Kisas algun di nan ta masha distinto for di loke abo conoce of for di loke ta comun den bo area. No obstante, bo por tuma nota di cierto principio of aspecto general cu ta importante pa sirbidornan di Dios.

Un Matrimonio Honorabel Ta Cumpli cu Rekisitonan Legal

6, 7. Pakico nos mester ta interesa den e aspectonan legal di matrimonio, y con nos por manifesta esaki?

⁶ Aunke ta Jehova a origina matrimonio, personanan cu ta casa mester cumpli tambe cu e rekisitonan di gobierno humano. Esaki ta na su luga pasobra Hesus a bisa: “Duna Cesar loke ta di Cesar, y Dios loke ta di Dios.” (Marco 12:17) Mescos tambe, apostel Pablo a duna e instruccion: “Laga tur hende somete nan mes na e autoridadnan cu ta goberna. Pasobra no tin autoridad cu no ta di Dios, y esnan cu ta existi, ta Dios a establece nan.”—Romanonan 13:1; Tito 3:1.

⁷ Den mayoria pais, Cesar, esta, autoridadnan civil, ta determina ken ta bin na remarca pa casa. P’esei, ora dos cristian cu ta biblicamente liber dicidi pa casa cu otro, nan ta cumpli debidamente cu e leinan local relaciona cu matrimonio. Kisas esaki ta ensera obtene un permit pa casa via di un persona autorisa pa gobierno, y talbes registra e matrimonio despues cu esaki a tuma luga. Tempo cu Cesar Augusto a saca un decreto pa tur hende “registra” nan mes, Maria cu Jose a cumpli cu esei y a biaha bai Betlehem pa nan “wordo registra.”—Lucas 2:1-5.

8. Ki practicanan Testigonan di Jehova ta evita, y pakico?

⁸ Ora dos cristian casa cu otro den un manera legal y reconoci, den bista di Dios e union ei ta definitivo. P’esei, Testigonan di Jehova no ta keda ripiti e acto di matrimonio dor di tene varios ceremonia legal, ni nan no ta renova nan voto matrimonial, por ehempel, riba nan di 25 of di 50 aniversario di boda. (Mateo 5:37) (Algun religion no ta reconoce matrimonionan legalmente aproba pa medio di un ceremonia civil como valido. Nan ta pretende cu e matrimonio no ta valido a menos cu un pastor efectua un rito di casamento of declara e pareha como homber y muher casa.) Den hopi pais, gobierno ta autorisa un anciano di Testigonan di Jehova pa casa hende. Si ta existi e posibilidad ei, probablemente lo e desea di haci esei hunto cu un discurso di matrimonio na Salon di Reino. Esei ta e luga local di adoracion berdadero y un sitio apropia pa un discurso tocante e areglo aki cu Jehova Dios a institui.

9. (a) Den caso di un matrimonio civil, kico un pareha cristian por opta na haci? (b) Con e ancianonan ta envolvi den e plannan di casamento?

⁹ Den otro paisnan, lei ta rekeri pa un pareha casa na un oficina di gobierno, manera registro civil, of dilanti un ambtenaar apunta pa esei. Hopi bes cristiannan ta opta pa despues di e acto oficial ei tene un discurso di matrimonio na Salon di Reino riba e mesun dia of e siguiente dia. (Nan lo no kier laga mucho dia pasa entre e ceremonia civil y e discurso biblico, ya cu tanto dilanti Dios como dilanti hende, incluso e congregacion cristian, nan ta casa.) Si un pareha cu ta bai casa na registro civil ta desea di tin un discurso na un cierto Salon di Reino, nan mester pidi e ancianonan cu ta forma e Comite di Sirbishi di Congregacion permiso pa esei prome. Ademas di confirma cu e pareha tin un bon reputacion, e superintendentenan aki lo percura pa e ora di e casamento no interferi cu e reunionnan regular y otro actividadnan programa na e salon. (1 Corintionan 14:33, 40) Tambe nan lo analisa con e pareha lo kier drecha e salon, y dicidi si lo haci un anuncio tocante uzo di e salon.

10. Si e pareha mester casa prome den un ceremonia civil, kico lo mester tene cuenta cu ne den e discurso di matrimonio?

¹⁰ E anciano cu ta duna e discurso di casamento lo haci esfuerso pa papia den un forma cariñoso, spiritualmente edificante y cu dignidad. Si e pareha a casa prome den un ceremonia civil, lo e splica cu nan a casa caba segun e lei di Cesar. Den caso cu e ceremonia civil no a inclui e voto matrimonial, kisas e pareha lo kier haci esaki durante e discurso.c Si e ceremonia civil ei a inclui e voto matrimonial pero e pareha recien casa ta desea di haci esaki dilanti Jehova y e congregacion, nan lo present’e den forma di pasado (verleden tijd) mustrando asina cu ya nan ta un caba.—Mateo 19:6; 22:21.

11. Na algun pais, con un pareha ta casa, y kico mester bin dilanti den e discurso di matrimonio?

¹¹ Na algun pais, kisas lei no ta rekeri pa un pareha casa den un ceremonia, ni dilanti un representante di gobierno. E matrimonio ta tuma luga na momento cu e pareha entrega un formulario firma di registracion di matrimonio na un ambtenaar. E ora ei e ambtenaar ta registra e matrimonio. Den e manera aki e pareha ta wordo considera como esposo y esposa, y e fecha cu nan a entrega e formulario ta sirbi como e fecha di nan matrimonio. Manera nos a menciona caba, kisas un poco despues di e registracion aki e pareha cu a casa den e forma ei lo kier tin un discurso biblico na Salon di Reino. E ruman spiritualmente maduro cu nan a scohe pa duna e discurso lo informa tur persona presente cu e pareha a casa pa medio di e registracion cu a caba di tuma luga. Si nan ta desea di haci nan voto matrimonial, esaki lo tuma luga manera a keda describi den paragraf 10 y e nota na pia di pagina. Tur persona cu asisti na Salon di Reino lo alegra hunto cu e pareha y beneficia di e conseho duna for di e Palabra di Dios.—Cantica di Salomon 3:11.

Matrimonionan Tradicional y Civil

12. Kico ta un matrimonio tradicional, y kico ta consehabel pa haci despues di un matrimonio asina?

¹² Den algun pais, parehanan ta casa den forma di loke por ser yama un matrimonio tradicional (of di tribu). No ta trata aki di dos persona cu ta djis biba cu otro, ni di un acuerdo di convivencia cu den algun pais ta duna e pareha cierto status pero cu no ta un matrimonio completamente legal.d Nos ta papiando aki di un matrimonio di dos persona cu ta casa cu otro siguiendo un custumber publicamente reconoci di e tribu of area en cuestion. Kisas esaki ta ensera e pago completo y aceptacion di un bruidsprijs, mediante cua e pareha ta legalmente y biblicamente casa. Gobierno ta mira e matrimonio tradicional ei como valido, legal y permanente. Despues di esei, por lo general ta posibel pa registra e matrimonio tradicional cu a tuma luga, y ora e pareha haci esei, nan por ricibi un certificado oficial. Registracion por ofrece proteccion na e pareha of na e esposa, si e bira viuda, y na e yiunan cu nan lo por haya den futuro. E congregacion lo urgi tur pareha cu a casa den un forma tradicional pa registra nan matrimonio mas pronto posibel. Ta interesante pa nota cu aparentemente bou di e Lei di Moises tabata registra matrimonio y nacemento di yiu oficialmente.—Mateo 1:1-16.

13. Despues di un matrimonio tradicional, kico ta apropia encuanto e discurso di casamento?

¹³ E pareha uni pa lei den un procedimento tradicional ta bira esposo y esposa ora e matrimonio ei tuma luga. Manera nos a menciona caba, cristiannan cu casa legalmente asina lo kier tin un discurso di matrimonio, incluyendo voto matrimonial, na Salon di Reino. Si esei tuma luga, e orador lo menciona cu e pareha a casa caba na harmonia cu e leinan di Cesar. Lo tin un discurso so asina. Ta un matrimonio tin, den e caso aki e matrimonio tradicional (di tribu) valido pa lei, y un discurso biblico. Si e pareha mantene e dos cosnan ei mas cerca di otro posibel, preferiblemente riba e mesun dia, esei lo yuda honra matrimonio cristian den e comunidad.

14. Kico un cristian por haci si tanto un matrimonio tradicional como civil ta posibel?

¹⁴ Den algun pais caminda matrimonio tradicional ta ser reconoci pa lei, tin tambe e posibilidad pa casa den un forma civil. Por lo general, un matrimonio civil ta ser efectua dilanti un ambtenaar, y esei por inclui tanto e hacimento di voto matrimonial como firmamento di un registro. Algun pareha cristian ta prefera e matrimonio civil aki en bes di esun tradicional. Lei no ta exigi pa efectua tur dos; pa lei, cada un ta valido. Loke paragraf 9 y 10 a trece dilanti tocante un discurso di matrimonio y voto matrimonial ta aplica aki tambe. E cos principal ta pa e pareha casa na un manera cu ta honorabel den bista di Dios y di hende.—Lucas 20:25; 1 Pedro 2:13, 14.

Mantene Honor den Matrimonio

15, 16. Con honor mester ta un parti esencial di un matrimonio?

¹⁵ Ora a surgi un problema den e matrimonio di un rei di Persia, un consehero principal cu tabata yama Memukan a duna conseho cu por tabatin un efecto positivo, esta, ‘pa tur esposa duna honor na nan esposo.’ (Ester 1:20) Den matrimonionan cristian, esei no ta algo cu un rei humano tin cu decreta; un esposa ta desea di honra su esposo. Mescos tambe, un esposo cristian ta honra su esposa y ta elogi’e. (Proverbionan 31:11, 30; 1 Pedro 3:7) Nos no tin cu warda hopi aña pasa pa cuminsa honra nos matrimonio. Mester manifesta esei for di un principio, si, cuminsando for di riba e dia di casamento.

¹⁶ No ta e homber y muher so—e esposo y esposa—mester mustra honor riba e dia di casamento. Si un anciano cristian ta duna un discurso di casamento, esei tambe mester refleha honor. E discurso mester ta dirigi na e pareha. Como muestra di su honor na e pareha, e orador lo evita un presentacion humoristico of dichonan popular. E no mester inclui comentarionan mucho personal cu por pone e pareha y e oyentenan sinti nan incomodo. Mas bien, lo e haci esfuerso pa papia na un manera cariñoso y edificante, halando atencion na e Originador di matrimonio y Su conseho sobresaliente. Si, e anciano su discurso presenta cu dignidad lo contribui na un casamento cu ta honra Jehova Dios.

17. Pakico casamento cristian tin su aspecto legal cu ne?

¹⁷ Probablemente bo a tuma nota di hopi punto tocante e detayenan legal di matrimonio den e articulo aki. Kisas algun aspecto no ta aplica directamente den bo area. Sinembargo, nos tur mester ta conciente cu ta masha importante pa casamento entre Testigonan di Jehova manifesta respet pa leinan local, esta, pa e rekisitonan di Cesar. (Lucas 20:25) Pablo a urgi nos: “Duna tur hende loke boso debe nan: si boso ta debe belasting, paga belasting; si ta tributo, tributo; . . . si ta honor, honor.” (Romanonan 13:7) Si, ta apropia pa cristiannan, cuminsando for di e dia di casamento, mustra honor pa e areglo cu Dios ta permiti te awor.

18. Ki otro aspecto opcional di un casamento ta merece atencion, y unda nos por haya informacion riba e asunto aki?

¹⁸ Hopi cristian ta pone despues cu nan caba di casa un reunion social, sea un fiesta di casamento, un comemento of un receptie. Corda cu Hesus mes a bai un fiesta asina. Si ta bai tin un reunion social asina, con e conseho di Bijbel por yuda nos haci sigur cu esaki tambe lo trece honor na Dios y refleha faborablemente riba e pareha recien casa y riba e congregacion cristian? E siguiente articulo lo considera e punto aki.e

[Nota]

Bo Ta Corda?

• Pakico nos mester ta interesa den tanto e aspectonan legal como spiritual di casamento?

• Si dos cristian casa den un ceremonia civil, kico nan por dicidi di tin un poco despues di esei?

• Cu ki proposito ta duna discurso di casamento na Salon di Reino?

[Plachi na pagina 18]

Den un casamento Israelita di antiguedad, e bruidegom tabata trece e bruid na su mes cas of na cas di su tata

[Plachi na pagina 21]

Despues di un matrimonio tradicional, cristiannan lo kier tin un discurso na Salon di Reino

Demostra Bo Fe na Bo Manera di Biba

“Fe . . . , si e no wordo compaña cu obranan, ta morto riba su mes.”—SANTIAGO 2:17.

1. Pakico tanto fe como obra tabata importante pa e prome cristiannan?

POR lo general, e prome cristiannan a demostra nan fe den e manera cu nan a biba. Discipel Santiago a urgi tur cristian: “Sea cumplidonan di e palabra y no solamente tendedonan.” El a agrega: “Mescos cu e curpa sin spirito ta morto, asina tambe fe sin obranan ta morto.” (Santiago 1:22; 2:26) Rond di 35 aña despues cu el a skirbi e palabranan ei, ainda hopi cristian tabata demostra nan fe cu obranan apropia. Pero lamentablemente, algun no tabata haci esei. Hesus a elogia e congregacion na Smirna; pero, dirigiendo su mes na hopi di e miembronan di e congregacion di Sardis, el a bisa: “Mi conoce bo obranan, cu bo tin e nomber di ta bibo, ma bo ta morto.”—Revelacion 2:8-11; 3:1.

2. Kico cristiannan mester puntra nan mes relaciona cu nan fe?

² P’esei Hesus a encurasha e cristiannan di Sardis—y den un contexto mas amplio, tur cu despues lo a lesa su palabranan—pa demostra nan prome amor pa e berdad cristian y pa keda lanta den sentido spiritual. (Revelacion 3:2, 3) Cada un di nos por puntra nos mes: ‘Kico di mi obranan? Mi accionnan ta mustra claramente cu mi ta haciendo mi best pa demostra mi fe den tur loke mi ta haci, asta den e areanan cu no ta directamente relaciona cu e trabou di predica of reunionnan di congregacion?’ (Lucas 16:10) Nos lo por papia riba hopi aspecto di bida, pero laga nos trata un di nan specificamente: reunionnan social, incluso esnan cu hopi bes ta sigui despues di un casamento cristian.

Reunionnan Social Chikito

3. Kico ta e punto di bista biblico tocante baimento di reunionnan social?

³ Mayoria di nos ta keda contento ora nos haya un invitacion pa un reunion social di cristiannan felis. Jehova ta “e Dios felis”, cu kier pa su sirbidornan ta felis. (1 Timoteo 1:11, NW) El a laga Salomon inclui e realidad aki den Bijbel: “Mi a recomenda placer, pasobra no tin nada [“mas mihor”, NW] pa hende bou di solo cu . . . come, bebe y ta alegre; y esaki lo compañ’e den su trabou duro durante di tur e dianan di su bida.” (Eclesiastes 3:1, 4, 13; 8:15) Nos por experencia e alegria ei na un comemento den famia of na otro reunionnan social chikito di adoradonan berdadero.—Job 1:4, 5, 18; Lucas 10:38-42; 14:12-14.

4. Den kico un persona cu ta organisa un reunion social mester ta interesa?

⁴ Si ta abo ta organisando un reunion social asina y ta responsabel p’e, bo mester pensa cuidadosamente riba loke bo ta plania, asta si ta djis un par di creyente bo ta invitando pa un comemento y combersacion ameno. (Romanonan 12:13) Lo bo kier percura pa “tur cos sosode corectamente”, siguiendo “e sabiduria di ariba.” (1 Corintionan 14:40; Santiago 3:17) Apostel Pablo a skirbi: “Sea cu boso ta come of bebe of kico cu boso ta haci, haci tur pa e gloria di Dios. No duna ofensa.” (1 Corintionan 10:31, 32) Kico ta algun aspecto cu merece atencion special? Si bo pensa for di antemano riba esakinan, lo bo por ta basta sigur cu loke abo y bo invitadonan haci lo demostra bo fe cu accion.—Romanonan 12:2.

Ki Tipo di Reunion Social Lo E Ta?

5. Pakico e anfitrion mester considera cuidadosamente si lo e sirbi bebida alcoholico y pone musica?

⁵ Hopi anfitrion a puntra nan mes si mester sirbi bebida alcoholico. Esei no ta necesario pa un reunion social ta edificante. Corda cu Hesus a percura cuminda pa un grupo basta grandi di hende cu a bini cerca dje; el a multiplica pan cu pisca. E relato no ta bisa cu el a percura biña milagrosamente, aunke nos sa cu e tabatin e poder pa haci esei. (Mateo 14:14-21) Si bo dicidi di sirbi bebida alcoholico na un reunion social, wak pa esaki ta na un cantidad modera, y haci sigur cu lo tin bebida no alcoholico di bon smak pa esnan cu ta prefera esakinan. (1 Timoteo 3:2, 3, 8; 5:23; 1 Pedro 4:3) Nunca laga hende sinti nan obliga pa bebe algo cu por morde “manera colebra.” (Proverbionan 23:29-32) Kico di musica of cantamento? Si na bo reunion social lo tin musica, sin duda lo bo selecta e canticanan cuidadosamente, tumando tanto e ritmo como e letranan na consideracion. (Colosensenan 3:8; Santiago 1:21) Hopi cristian a ripara cu tocamento di Melodianan di Reino of asta cantamento di e canticanan ei ta contribui na un bon ambiente. (Efesionan 5:19, 20) Y, mas cu claro, controla e volumen regularmente pa e musica no stroba combersacion agradabel ni molestia bisiña.—Mateo 7:12.

6. Con un anfitrion por mustra cu e tin un fe bibo ora ta trata di combersacion of otro actividadnan?

⁶ Na un reunion social, kisas cristiannan ta papia tocante varios topico, lesa algun informacion na bos halto of conta experencia interesante. Si e combersacion desvia for di normanan cristian, e anfitrion cu tacto por hib’e bek den e direccion corecto. Ademas, e mester paga tino pa ningun hende domina e combersacion. Si e mira esei cuminsa tuma luga, e por expresa su mes discretamente y inclui otro personanan den e combersacion, talbes haciendo pregunta na hobennan pa saca afo kico nan ta pensa of introduciendo un topico cu ta stimula mas di e personanan presente pa bisa algo. Grandi y chikito lo keda encanta cu e aspecto aki di e reunion social. Si abo como anfitrion guia asuntonan na un manera sabi y cu tacto, esnan presente lo ripara cu bo ta un ‘hende rasonabel.’ (Filipensenan 4:5, NW) Nan lo mira cu bo tin un fe bibo, un fe cu ta influencia tur aspecto di bo bida.

Casamento y Receptie di Casamento

7. Pakico casamento y e receptie conecta cu ne ta merece consideracion?

⁷ Un ocasion special di alegria ta un casamento cristian. Dios su sirbidornan di pasado, entre nan Hesus y su discipelnan, gustosamente a participa den e ocasionnan gososo ei, incluso e bankete cu sa compaña esakinan. (Genesis 29:21, 22; Juan 2:1, 2) Sinembargo, ultimo tempo experencia a mustra claramente cu pa e actividadnan social relaciona cu casamento refleha bon huicio y balansa cristian, mester haci un esfuerso special pa plania esakinan bon. Corda cu e actividadnan aki ta aspectonan normal di bida cu ta duna un cristian oportunidad pa demostra su fe.

8, 9. Con e loke ta tuma luga na hopi casamento ta confirma loke nos ta lesa na 1 Juan 2:16 y 17?

⁸ Hopi hende cu no sa ni no ta tene cuenta cu principionan cu ta agrada Dios ta mira un casamento como un ocasion pa haci cosnan extremo, of podise caminda cosnan extremo ta permiti. Den un revista Europeo, un señora cu a caba di casa a bisa lo siguiente tocante su casamento estilo “cas real”: ‘Nos a core den un carosa hala pa cuater cabai sigui pa 12 kitoki, cada un cu su cabai, y un carosa riba cua tabatin un banda ta toca. Despues nos tabatin un bankete exkisito y musica excelente; tabata un cos magnifico. Net manera mi a desea, mi tabata lareina riba e dia ei.’

⁹ Aunke custumbernan ta varia di un pais pa otro, e sintimentonan cu e señora ei a expresa simplemente ta confirma loke apostel Juan a skirbi: “Tur loke cu tin den mundo, e deseo di carni y e deseo di wowo y e orguyo di bida [“cana pronk cu loke bo tin”, BPK], no ta bin di e Tata, sino di e mundo.” Bo por imagina bo un pareha cristian maduro cu gana di tin un casamento luhoso estilo “cas real” cu un receptie fabuloso manera den un cuenta di hada? Mas bien, nan plannan di casamento mester demostra cu nan a tuma na pecho e conseho cu “esun cu haci e boluntad di Dios ta permanece pa semper.”—1 Juan 2:16, 17.

10. (a) Pa un casamento rasonabel, pakico planiamento ta esencial? (b) Ki decision e pareha lo mester tuma relaciona cu e invitadonan?

¹⁰ Parehanan cristian kier ta realistico pero tambe rasonabel, y Bijbel por yuda nan. Aunke e dia di casamento ta un dia importante, nan sa cu esei ta apenas e cuminsamento di e bida casa di dos cristian cu tin bida eterno nan dilanti. Nan no ta obliga pa pone un fiesta di casamento grandi. Si nan dicidi di tene un receptie, nan lo kier calcula e gastonan envolvi y pensa riba ki tipo di fiesta e mester bira. (Lucas 14:28) Den nan bida cristian hunto, segun Bijbel, e esposo lo ta cabes di famia. (1 Corintionan 11:3; Efesionan 5:22, 23) Pues e bruidegom ta carga e responsabilidad principal pa e receptie. Di mes, lo e consulta amorosamente cu su futuro esposa riba asuntonan manera ken nan kier of por invita na e fiesta di casamento. Kisas no ta posibel ni practico pa invita tur nan amigo- y famianan; p’esei, nan lo mester tuma algun decision cu modestia. E pareha mester por tin e confiansa cu si nan no por invita algun ruman cristian, esakinan lo compronde y lo no sinti nan ofendi.—Eclesiastes 7:9.

“Director di e Fiesta”

11. Kico por ta e funcion di un ‘director di fiesta’ na un casamento?

¹¹ Si un pareha dicidi di pone un receptie pa celebra e casamento, con nan por haci sigur cu e ocasion ta refleha dignidad? Pa hopi aña caba, Testigonan di Jehova a mira cu ta sabi pa inclui un aspecto menciona en conexion cu e fiesta na cua Hesus a asisti na Cana. Ei tabatin un ‘director di fiesta’, siguramente un compañero di creencia responsabel. (Juan 2:9, 10, NW) Mescos tambe un bruidegom sabi lo scohe un ruman homber cristian spiritualmente maduro pa e funcion importante aki. A base di e bruidegom su deseo- y preferencianan, e director di fiesta por percura pa e detayenan tanto prome como durante e receptie.

12. Kico e bruidegom mester tuma na consideracion relaciona cu uzo di bebida alcoholico?

¹² Na harmonia cu loke nos a considera den paragraf 5, algun pareha ta dicidi di exclui bebida alcoholico for di e fiesta di casamento pa evita cu bebemento di mas por daña e ambiente di alegria y stroba e exito di e ocasion. (Romanonan 13:13; 1 Corintionan 5:11) Ma si nan inclui bebida alcoholico, e bruidegom mester haci sigur cu ta sirbi of pone esaki disponibel cu moderacion. Na e casamento caminda Hesus a asisti na Cana tabatin biña, y el a suministra biña di excelente calidad. Ta interesante pa nota cu e director di e fiesta ei a remarca: “Tur hende ta sirbi e bon biña prome, y despues cu e hendenan a bebe basta, esun di calidad inferior; ma abo a warda e bon biña te awor.” (Juan 2:10) Hesus sigur no a contribui na ningun buracheria pasobra el a considera esei algo malo. (Lucas 12:45, 46) Ora e director a expresa su asombro pa e calidad di e biña, el a duna di compronde cu na otro ocasionnan el a yega di tuma nota cu algun invitado na casamento a bebe y bira burachi. (Echonan 2:15; 1 Tesalonicensenan 5:7) P’esei, tanto e bruidegom como e cristian confiabel cu e ta apunta como director di fiesta mester haci sigur cu tur persona presente ta sigui e siguiente instruccion cla: “No bebe biña bira burachi, pasobra esei ta libertinahe.”—Efesionan 5:18; Proverbionan 20:1; Oseas 4:11.

13. Kico un pareha mester tene cuenta cu ne si nan inclui musica na nan fiesta di casamento, y pakico?

¹³ Mescos cu den otro reunionnan social, si ta bai tin musica, mester duna debido atencion na e volumen pa no stroba e invitadonan di combersa cu otro. Un anciano cristian a remarca: “Segun cu e anochi ta transcuri, ora combersacion bira mas anima of baliamento cuminsa, tin biaha e volumen di e musica ta subi. Loke ta cuminsa como musica den background por bira duro y stroba combersacion. Un receptie di casamento ta duna e invitadonan chens pa papia cu otro den un forma ameno. Lo ta masha lamentabel pa laga musica duro pone e oportunidad aki bai perdi!” Aki tambe e bruidegom y director di fiesta tin cu actua na un manera responsabel y no laga e control riba e tipo di musica y volumen den man di e musiconan, sea cu esakinan ta contrata of no. Pablo a skirbi: “Tur loke boso haci cu palabra of cu echo, haci tur den e nomber di Señor Hesus.” (Colosensenan 3:17) Ora e invitadonan bai cas despues di un fiesta of receptie di casamento, nan lo corda cu e musica tambe a demostra cu e pareha a haci tur cos den nomber di Hesus? Esei lo mester ta e caso.

14. Ki grato recuerdo cristiannan mester tin di un casamento?

¹⁴ Si, un casamento bon organisa por trece grato recuerdo. Adam cu Edyta, kendenan tin 30 aña casa, a remarca tocante un casamento: “Bo por a echt sinti e ambiente cristian. Tabatin algun cantica di alabansa na Jehova pero tambe algun otro bon entretenimento. Baliamento y musica no tabata dje importante ei. E fiesta tabata dushi y edificante, y tur cos a cana na harmonia cu principionan biblico.” Ta bon cla anto cu tin hopi cos cu tanto e bruid como e bruidegom por haci pa demostra nan fe na nan manera di actua.

Regalo di Casamento

15. Ki conseho di Bijbel nos por aplica en conexion cu regalo di casamento?

¹⁵ Den hopi pais tin e custumber cu amigo y famia ta trece regalo pa esnan cu ta casa. Si abo scohe pa haci esei, kico bo mester tene cuenta cu ne? Wel, corda e comentario di apostel Juan tocante “cana pronk cu loke bo tin.” El a conecta e gabamento ei, no cu cristiannan cu ta manifesta nan fe cu accion, sino cu ‘e mundo cu ta pasa bai.’ (1 Juan 2:16, 17; BPK) En bista di e observacion inspira aki di Juan, personanan recien casa mester anuncia publicamente nomber di e invitadonan cu a trece regalo? Cristiannan di Macedonia y Acaya a duna contribucion pa e rumannan na Jerusalem, pero no tin ningun indicacion cu nan nomber a ser publica. (Romanonan 15:26) Hopi cristian cu ta duna regalo di casamento lo kier keda anonimo en bes di atrae indebido atencion na nan mes. En conexion cu esaki, repasa Hesus su conseho na Mateo 6:1-4.

16. Con personanan recien casa por evita di ofende otro hende en conexion cu regalo di casamento?

¹⁶ Identificacion di esnan cu a trece regalo por ‘instiga competencia’ encuanto ken a trece e mihor regalo of esun di mas costoso. Pues, cristiannan sabi cu caba di casa lo no anuncia publicamente nomber di esnan cu a trece regalo. Esei lo por pone otronan cu podise no por a trece regalo sinti berguensa. (Galationan 5:26, NW; 6:10) Claro cu no tin nada malo pa e bruid y bruidegom sa ken a trece cierto regalo. Kisas nan por haya sa esei a base di un tarheta cu ta bin hunto cu e regalo pero cu no ta ser lesa publicamente. Ora di cumpra, duna y ricibi regalo di casamento, nos tur ta haya chens pa demostra cu asta den un asunto priva asina, nos fe ta determina con nos ta actua.a

17. Ki meta cristiannan mester tin relaciona cu nan fe y obranan?

¹⁷ Sin duda, e asunto di demostra nos fe ta ensera mas cu hiba un bida moralmente limpi, asisti na reunionnan cristian y participa den e trabou di predica. Laga cada un di nos tin un fe bibo cu ta influencia tur loke nos ta haci. Si, nos por demostra nos fe pa medio di accionnan “plenamente ehecuta”, incluso esnan den e areanan di bida cu nos a considera den e articulo aki.—Revelacion 3:2, NW.

18. Con e palabranan na Juan 13:17 por resulta cierto en conexion cu casamento- y reunionnan social di cristiannan?

¹⁸ Despues cu Hesus a pone un ehempel excelente pa su fiel apostelnan pa medio di e acto humilde di laba nan pia, el a bisa nan: “Si boso sa e cosnan aki, boso ta bendiciona [“felis”, NW] si boso haci nan.” (Juan 13:4-17) Caminda nos ta biba awe kisas no ta necesario ni normal pa laba pia di otro hende, por ehempel di un huespet cu ta bin nos cas. Pero manera nos a considera den e articulo aki, tin otro aspectonan di bida den cua nos por manifesta nos fe pa medio di accionnan amoroso y bondadoso, incluso esnan relaciona cu reunionnan social y casamento cristian. Nos por manifesta esei, sea nos ta bai casa of ta huespet na un casamento of un receptie gososo di casamento entre cristiannan cu kier demostra nan fe pa medio di nan accionnan.

[Nota]

Con Lo Bo Contesta?

Con bo por demostra bo fe

• ora di organisa un reunion social?

• ora di organisa un casamento of receptie?

• ora di duna of ricibi regalo di casamento?

[Plachi na pagina 24]

Asta ora bo ta invita djis un par di hende, laga “e sabiduria di ariba” guia bo

Aumenta e Goso y Dignidad di Bo Dia di Casamento

“E DIA di mi casamento tabata un di e dianan di mas importante y gososo di mi bida”, Gordon, kende tin casi 60 aña casa, a bisa. Kico ta haci e dia di casamento asina importante pa cristiannan berdadero? Esei ta un dia riba cua nan ta haci un voto of promesa sagrado na dos persona cu nan ta stima profundamente: nan casa y Jehova Dios. (Mateo 22:37; Efesionan 5:22-29) Si, parehanan cu ta plania pa casa lo kier disfruta di nan dia di casamento, pero tambe nan kier honra e Originador di matrimonio.—Genesis 2:18-24; Mateo 19:5, 6.

Con un bruidegom por aumenta e dignidad di e ocasion gososo aki? Kico un bruid por haci pa mustra honor na su esposo y na Jehova? Con otro personanan cu ta asisti por haci e dia di casamento mas gososo ainda? Nos lo bai analisa algun principio biblico cu lo yuda contesta e preguntanan ei, y aplicacion di e principionan ei lo mantene e posibel problemanan cu lo por rebaha e ocasion special aki na un minimo.

Ken Ta Responsabel?

Den hopi pais, lei ta permiti un representante di Testigonan di Jehova efectua un ceremonia di matrimonio. Asta den paisnan caminda ta un ambtenaar mester haci esaki, un pareha lo kier tin un discurso basa riba Bijbel. Den un discurso asina, e orador por lo general ta anima e bruidegom pa reflexiona riba e papel cu Dios a asign’e como cabes di famia. (1 Corintionan 11:3) P’esei, ta e bruidegom tin e responsabilidad principal pa loke ta sosode na e casamento. Claro cu e preparacionnan pa e ceremonia di casamento mes y pa e receptie cu kisas ta sigui despues generalmente ta tuma luga hopi tempo di antemano. Pakico esaki por ta un desafio pa e bruidegom?

Un motibo ta cu famianan di sea e bruid of bruidegom por purba influencia e plannan di casamento formalmente. Rodolfo, kende a casa hopi pareha, a remarca: “Tin biaha, e bruidegom ta hay’e cu un presion grandi di parti di famianan, specialmente si nan ta yuda cubri e gastonan di receptie. Talbes nan ta insisti riba loke mester sosode durante e ceremonia di casamento y na e receptie. Esaki lo por debilita e papel cu Bijbel ta asigna na e bruidegom como esun responsabel pa e ocasion.”

Max, kende tin mas cu 35 aña caba ta casa parehanan, a remarca: “Mi a nota un tendencia cu ta e bruid ta hiba delantera den dicidi loke mester tuma luga na e casamento y na e receptie, y cu e bruidegom cada bes tin menos di bisa.” David, kende tambe a casa hopi pareha, a bisa: “Kisas e bruidegomnan no tin custumber di hiba delantera y por lo general no ta suficientemente envolvi den e preparacionnan di casamento.” Con e bruidegom por carga su responsabilidad na un manera eficas?

Comunicacion Ta Aumenta Goso

Pa e bruidegom cumpli cu su responsabilidad en conexion cu e preparacionnan di casamento cu exito, e mester comunica den un forma eficas. Bijbel ta bisa bon cla: “Plannan ta frustra ora no tin papiamento confidencial.” (Proverbionan 15:22, NW) Ma si e bruidegom papia prome tocante e preparacionnan pa casamento cu e bruid, cu miembronan di famia y cu otro personanan cu por duna conseho biblico sano, e por evita hopi frustracion.

Si, ta masha importante pa un pareha comprometi papia cu otro prome riba nan plannan y posibilidadnan. Pakico? Wel, scucha algun comentario di Ivan y su casa, Delwyn, kendenan ta felismente casa pa hopi aña pero cu ta bin di diferente cultura. Recordando nan plannan di casamento, Ivan a bisa: “Mi tabatin algun idea concreto tocante kico mi tabata kier pa mi casamento, incluso un receptie cu tur mi amigonan presente, un bolo di casamento, y mi bruid cu un shimis di casamento blanco bisti. Delwyn, di otro banda, tabata kier un casamento simpel, cu tiki hende y sin bolo di casamento. Asta el a pensa di no bisti un shimis di bruid mes, sino algo diferente.”

Kico a yuda e pareha aki resolve nan diferencianan di opinion? Comunicacion bondadoso y franco. (Proverbionan 12:18) Ivan a agrega: “Nos a studia articulonan biblico riba e topico di casamento, manera esnan cu a sali den E Toren di Vigilancia [na Spaño] di 15 di april 1984.a E informacion aki a yuda nos haya un enfoke spiritual di e ocasion. Como cu nos cada un a bin di un cultura diferente, nos tabatin cu cede den varios cos cu tabatin di aber cu preferencia personal. Nos tur dos a cambia nos actitud.”

Aret cu Penny tambe a haci algo similar. Relaciona cu e dia di nan casamento, Aret a bisa: “Ami cu Penny a papia riba nos distinto deseonan pa e casamento, y nos por a yega na un acuerdo harmonioso. Nos a pidi Jehova su bendicion riba e dia ei. Tambe mi a busca conseho cerca nos mayornan y algun otro pareha casa maduro den e congregacion. Nan sugerencianan tabata masha valioso. Como resultado, nos casamento tabata algo bunita.”

Mantene Dignidad den Bisti y Areglo Personal

Ta comprendibel cu tanto e bruid como e bruidegom kier ta bon bisti pa nan casamento. (Salmo 45:8-15) Kisas nan ta dedica tempo, esfuerso y placa na bisti apropia. Ki principio di Bijbel por yuda nan scohe loke ta nechi y digno pa e ocasion?

Considera loke e bruid ta bisti pa e ocasion ei. Aunke e estilonan ta varia di persona pa persona y di pais pa pais, e conseho di Bijbel ta aplicabel tur caminda. Hende muher tin cu “dorna nan mes cu bisti apropia, decente y modera.” Esei ta conta pa hende muher cristian na tur momento, y sigur pa e dia di casamento. Echo ta cu un casamento gososo no ta rekeri un “bisti costoso.” (1 Timoteo 2:9; 1 Pedro 3:3, 4) Aplicacion di e conseho aki ta duna gran satisfaccion!

David, menciona anteriormente, a bisa: “Mayoria pareha ta haci esfuerso pa sigui principionan di Bijbel, y nan ta merece un elogio. Pero tabatin caso caminda e shimis di e bruid y di e bruidsmeisjenan tabata inmodesto, transparente of cu un escote demasiado abou.” Den e reunion cu un anciano cristian maduro ta tene cu e bruid y e bruidegom prome cu e dia di casamento, e ta yuda nan mantene un punto di bista spiritual. Con? Puntrando nan si e loke nan tin pensa di bisti lo ta suficiente modesto pa bisti na un reunion cristian. Ta berdad cu e estilo di paña por ta diferente for di esun regular di bai reunion, y cu loke un ruman ta bisti pa su casamento por refleha custumber local, pero e norma di modestia mester cuadra cu loke ta digno pa un cristian. Maske algun hende di mundo kisas ta mira e codigo moral di Bijbel como restrictivo, cristiannan berdadero si ta contento pa resisti e intentonan di mundo pa hinca nan den su forma.—Romanonan 12:2; 1 Pedro 4:4.

Penny di: “En bes di mira e pañanan of e receptie como e cos di mas importante, ami cu Aret a enfoca riba e ceremonia, e parti spiritual di e ocasion. Esei tabata e parti mas importante di e dia. E cosnan special cu mi ta corda no ta loke mi a bisti ni come, sino den compania di ken mi tabata riba e dia ei y e felicidad cu mi a sinti di casa cu e homber cu mi ta stima.” Ta bon pa un pareha cristian tene e puntonan ei na mente ora nan ta plania nan casamento.

Salon di Reino—Un Luga di Dignidad

Hopi pareha cristian ta desea di tene nan ceremonia di casamento den un Salon di Reino si esei ta posibel. Pakico nan ta prefera esaki? Un pareha a splica nan rasonamento: “Nos a realisa cu matrimonio ta e areglo sagrado di Jehova. E echo cu nos a casa den Salon di Reino, nos luga di adoracion, a yuda graba den nos mente for di un principio cu Jehova mester ta parti di nos matrimonio. Un otro beneficio pa a tene e ceremonia den Salon di Reino en bes di na un otro sitio ta cu el a mustra nos famianan cu a asisti, cu no ta creyente, con importante e adoracion di Jehova ta pa nos.”

Si e ancianonan di congregacion cu ta responsabel pa e Salon di Reino duna permiso pa e casamento tuma luga einan, e pareha mester avisa nan adelanta di e manera cu nan ta pensa di drecha e luga. Un manera cu e bruid y bruidegom por mustra e debido respet pa esnan invita na e casamento ta di keda firmemente determina pa yega na e ora programa pa e casamento. Y nan lo kier haci sigur cu tur cos ta tuma luga cu dignidad.b (1 Corintionan 14:40) Pues nan lo evita e comportacionnan extravagante cu ta caracterisa hopi casamento mundano.—1 Juan 2:15, 16.

Esnan cu ta asisti na e casamento tambe por mustra cu nan tin e punto di bista di Jehova tocante matrimonio. Por ehempel, nan lo no bai spera pa e casamento sobresali riba otro casamentonan cristian, como si fuera ta un competencia tin di ken su casamento ta mas sofistica. Cristiannan maduro ta realisa tambe cu nan presencia na Salon di Reino pa e discurso basa riba Bijbel ta mas importante y beneficioso cu nan presencia na un fiesta di casamento of un receptie cu lo por sigui despues. Si tempo of circunstancia ta permiti pa un cristian asisti na un so di e dos ocasionnan aki, asistencia na Salon di Reino sigur mester haya preferencia. Un anciano cu yama William a bisa: “Si invitadonan keda sin bin Salon di Reino sin motibo valido pero ta asisti si na e receptie despues, nan ta mustra un falta di aprecio pa e santidad di e ocasion. Maske nos no ta invita na e receptie, ora nos asisti na e ceremonia na Salon di Reino nos por mustra nos apoyo na e bruid y bruidegom y duna un testimonio excelente na famianan cu no ta creyente.”

Goso Cu Ta Dura Mas Aya cu e Dia di Casamento

E mundo di comercio a comberti e celebracion di casamento den un negoshi formal. Segun un informe recien, na Merca un casamento por lo general “ta costa 22.000 dollar, esta, mitar di e entrada [anual] promedio di un famia Mericano.” Bou di influencia di propaganda comercial, hopi pareha recien casa of nan famia ta hinca nan curpa den un debe grandi pa e dia ei so, un debe cu nan ta keda cu ne pa hopi aña. Esei ta un manera sabi pa cuminsa bo matrimonio? Hende cu no sa of cu no ta worry cu principio biblico kisas ta opta pa un casamento extravagante asina, pero esei sigur no ta e caso cu cristiannan berdadero!

Hopi pareha cristian cu a limita e tamaño di nan casamento na loke ta rasonabel y pagabel y cu a enfoca riba e aspecto spiritual di e ocasion por a uza nan tempo y recursonan na harmonia cu nan dedicacion na Dios. (Mateo 6:33) Tuma por ehempel Lloyd y Alexandra, kendenan ta trahando pa 17 aña caba den e ministerio di tempo completo for di dia nan a casa. Lloyd a comenta: “Kisas tabatin hende cu a haya nos casamento mucho simpel, pero ami cu Alexandra tabata masha contento. Nos a sinti cu nos dia di casamento no mester tabata un carga financiero, sino un celebracion di e areglo di Jehova pa duna dos hende un gran felicidad.”

Alexandra a agrega: “Ami tabata den e sirbishi di pionero prome cu nos a casa, y mi no tabata kier a laga e privilegio aki djis pa mi por tabatin un casamento extravagante. E dia di nos casamento tabata masha special. Sinembargo, esei tabata apenas e prome dia di e resto di nos bida hunto. Nos a aplica e conseho pa evita di consentra mucho riba e acto di casa y a busca e guia di Jehova den nos bida casa. Esaki definitivamente a trece e bendicion di Jehova riba nos.”c

Si, bo dia di casamento ta un ocasion special. E actitud- y accionnan cu ta bisto riba e dia ei por establece un patronchi pa bo bida casa den futuro. P’esei, confia den e guia di Jehova. (Proverbionan 3:5, 6) Mantene e nificacion spiritual di e dia ei na prome luga den bo mente. Apoya otro den e papel cu Dios a asigna na boso cada un. Asina boso por pone un fundeshi solido pa boso matrimonio, y cu Jehova su bendicion, boso lo tin e goso cu ta dura mas aya cu boso dia di casamento.—Proverbionan 18:22.

[Nota]

[Plachi na pagina 29]

Un pareha mester comunica na un manera franco pero cu respet ora nan ta plania nan casamento

[Plachi na pagina 31]

Mantene e nificacion spiritual di bo dia di casamento na prome luga den bo mente