Di Berdad Diabel Ta Existi?
E contesta cu Bijbel ta duna
Si, Diabel ta existi. E ta “e gobernante di mundo”, un criatura spiritual cu a bira malbado y a rebeldia contra Dios. (Juan 14:30; Efesionan 6:11, 12) Bijbel ta revela ken Diabel ta pa medio di e siguiente nomber- y descripcionnan:
Satanas, cu ta nifica “Resistidor.”—Job 1:6.
Diabel, cu ta nifica “Calumniador.”—Revelacion 12:9.
Colebra, cu den Bijbel por nifica “persona engañoso.”—2 Corintionan 11:3.
Tentador.—Mateo 4:3.
Gañado.—Juan 8:44.
E no ta e malo cu tin den hende
Algun hende ta kere cu Satanas e Diabel ta e malo cu tin den nos. Sinembargo, den Bijbel tin skirbi un combersacion cu tabatin entre Dios y Satanas. Pero, Dios ta un ser perfecto y tur su camindanan ta husto. Pues, con e por tabata papiando cu un parti malo den dje? (Deuteronomio 32:4; Job 2:1-6) Mescos tambe, Satanas a tenta Hesus kende tabata sin pica. (Mateo 4:8-10; 1 Juan 3:5) Pues, Bijbel ta mustra cu di berdad Diabel ta existi y cu e no ta djis e malo cu tin den hende.
Hopi hende no ta kere cu di berdad Diabel ta existi. Esey mester straña nos? No, pasobra Bijbel ta bisa cu Satanas ta uza tur sorto di engaño pa logra su meta. (2 Tesalonicensenan 2:9, 10) Un di su mihor trikinan ta cu e ta ciega hopi hende di tal manera cu nan no ta kere mes cu e ta existi.—2 Corintionan 4:4.
Mas idea robes encuanto Diabel
Idea robes: Un otro nomber pa Diabel ta Lucifer.
E berdad: E palabra Hebreo cu den algun Bijbel ta ser traduci como “Lucifer” ta nifica “strea briante di mardugá.” (Isaias 14:12, Beibel na papiamentu koriente) Segun e contexto, e expresion aki ta referi na e dinastia di e reynan di Babilonia cu Dios lo a humilia pa motibo di nan arogancia. (Isaias 14:4, 13-20) Nan a uza e expresion “strea briante di mardugá” pa haci bofon di e dinastia di reynan di Babilonia despues cu el a ser tumba.
Idea robes: Satanas ta sirbi Dios.
E berdad: Diabel ta enemigo di Dios y no su sirbidor. Satanas e Diabel ta opone hende cu ta sirbi Dios y ta lanta acusacion falso contra nan.—1 Pedro 5:8; Revelacion 12:10.