Despues di Divorcio, Bida No A Caba

Algun hende ta divorcia cu e speransa cu esey lo drecha nan bida, mientras cu otronan kier salba nan matrimonio, pero no por evita cu nan casa ta bay laga nan. Pero casi tur hende cu divorcia ta ripara cu despues nan bida ta bira mas dificil cu nan a pensa. De echo, si bo a divorcia recientemente, lo bo ripara cu esey ta un di e cosnan cu ta causa mas stress den bida. Pesey, lo ta bon pa bo analisa algun conseho practico for di Bijbel cu lo por yuda bo enfrenta e retonan cu divorcio ta trece cu ne.

RETO 1: SINTIMENTONAN NEGATIVO.

E stress cu problema financiero, criamento di yiu y soledad ta trece cu ne por bira casi insoportabel, y sintimentonan negativo no ta bay mesora tampoco. E psicologo Judith Wallerstein (awor difunto) a bisa cu algun hende, añanan despues di nan divorcio, ainda ta sinti nan traiciona y bandona. Pa nan, “bida ta yen di inhusticia, decepcion y sintimento di soledad.”

KICO BO POR HACI?

• Desahoga bo mes. Kisas bo ta sinti falta di e persona cu ainda bo ta stima. Hasta si bo relacion cu ne no tabata mucho bon, kisas bo ta sinti bo tristo pasobra bo no tin e felicidad cu bo a spera di haya den matrimonio. (Proverbionan 5:18) Pesey, no tene berguensa di, na moda di papia, saca “tempo pa yora” bo tristeza.​—Eclesiastes 3:1, 4.

• No isola bo mes. Aunke tin momento cu bo kier ta bo so pa bo desahoga bo mes, no ta sabi pa bo isola bo mes pa hopi tempo. (Proverbionan 18:1) Y ora bo ta papia cu bo amigonan, concentra riba cosnan positivo; evita di keha mucho tocante bo ex-casa—hasta si bo tin motibo valido pa haci esey—sino hende lo aleha for di bo. Si bo tin cu tuma decisionnan importante despues di bo divorcio, busca yudansa cerca un persona di confianza.

• Cuida bo salud. E stress cu divorcio ta trece cu ne sa causa problema cu salud, manera presion halto of migraine. Pesey ta importante pa bo come saludabel, haci ehercicio y sosega bon.—Efesionan 5:29.

• Deshaci di e cosnan cu por bolbe lanta bo rabia contra bo ex-casa of cosnan cu bo no tin mester di dje. Pero warda documento importante si. Si cosnan manera potret di casamento por causa dolor, warda nan pa boso yiunan.

• Combati pensamento negativo. Olga, kende a divorcia despues cu su esposo a bira infiel na dje, a bisa: “Semper mi tabata puntra mi mes, ‘Kico e tin cu ami no tin?’” Pero manera Olga a realisa despues, keda ripiti pensamento negativo por resulta den “un spirito abati.”​—Proverbionan 18:14.

  Hopi hende ta haya cu ora nan skirbi nan pensamentonan, nan por controla y ordena nan manera di pensa mihor. Si bo dicidi di haci esaki, purba di bin cu un pensamento nobo y positivo pa reemplasa esun negativo cu bo ta luchando cu ne. (Efesionan 4:23) Wak e dos ehempelnan aki:

  Antes: Ta mi culpa cu mi ex a bira infiel na mi.

  Awor: Mi fayonan no a duna mi ex-casa derecho di gaña mi cu un otro hende.

  Antes: Mi a tira e mihor añanan di mi bida afo cu e homber robes.

  Awor: Lo mi ta mas feliz si mi wak padilanti, y no patras.

• Ignora comentarionan ofensivo. Algun amigo y famia, sin ningun mal intencion, por bisa cosnan desagradabel of hasta inapropia den bo caso, manera: ‘Toch e no tabata un bon casa pa bo’ of ‘Dios ta odia divorcio.’b Cu bon motibo, Bijbel ta conseha: “No tuma na serio tur palabra cu wordo papia.” (Eclesiastes 7:21) Martina, kende tin dos aña divorcia, a bisa: “En bes di pensa mucho riba comentarionan cu ta haci mi dolor, mi ta purba di mira cosnan for di e punto di bista di Dios. Su pensamentonan ta mas halto cu esnan di nos.”​—Isaias 55:8, 9..

• Haci oracion na Dios. Dios ta anima su sirbidornan pa ‘tira tur nan inkietud riba dje’, specialmente den tempo di angustia.​—1 Pedro 5:7.

RETO 2: BO TRATO CU BO EX-CASA.

Juliana, kende tabatin 11 aña casa, a bisa: “Mi a roga mi esposo pa e keda. Pero despues cu el a bay laga mi, mi a keda hopi rabia cu ne y cu e muher cu el a bay biba cu ne.” Hopi hende divorcia ta keda masha rabia cu nan ex pa añanan largo. Sinembargo, den algun caso nan ta haya nan forsa ta comunica cu nan ex-casa regularmente, specialmente si nan tin yiu.

KICO BO POR HACI?

• Keda cortes cu bo ex-casa. Limita bo na asuntonan necesario, y sea breve y al caso. Hopi hende divorcia a haya cu e manera di trata aki ta contribui na paz.​—Romanonan 12:18.

• Evita di provoca bo ex-casa. Specialmente ora bo sinti cu bo ta bou di atake, aplica e conseho sabi di Bijbel: “Esun cu midi su palabranan tin conocemento.” (Proverbionan 17:27) Si bo sinti cu un combersacion ta bay sali for di man, mihor bo bisa: “Laga mi pensa riba loke bo a bisa y nos ta papia despues.”

• Separa bo asuntonan mas tanto posibel for di esnan di bo ex-casa, incluso papelnan legal, financiero y medico.

RETO 3: CON PA YUDA BOSO YIUNAN ADAPTA NA E SITUACION NOBO.

Maria ta corda con cosnan a sigui poco despues di su divorcio: “Mi yiu muher mas chikito tabata yora so y a cuminsa pishi cama atrobe. Y aunke mi yiu muher mas grandi a purba di sconde su sintimentonan, mi por a mira un cambio den dje tambe.” Lamentablemente, bo por sinti cu awor cu bo yiunan tin mas mester di bo, bo no tin e tempo of energia emocional pa yuda nan.

KICO BO POR HACI?

• Anima bo yiunan pa papia cu bo tocante nan sintimentonan, aunke tin biaha nan por bisa bo cosnan ‘for di control.’​—Job 6:2, 3.

• Cada un mester hunga su papel. Aunke bo mester di apoyo emocional y bo yiu kier duna bo esey, no ta husto ni saludabel pa spera di un yiu p’e yuda resolve problema di hende grandi. (1 Corintionan 13:11) Evita tambe di haci bo yiu bo persona di confianza of di combertie den un mediador of mensahero entre abo cu bo ex-casa.

• No haci mucho cambio den e bida di bo yiu. Lo ta bon si bo por keda biba mesun caminda cu bo ta biba awor y sigui cu bo custumbernan di tur dia. Pero mas importante ainda, mantene un bon rutina spiritual, incluso lesamento di Bijbel y adoracion como famia.—Deuteronomio 6:6-9

Despues di bo divorcio, ta posibel pa sigui cu bo bida. Melissa, kende tabatin 16 aña casa, a bisa: “Ora mi a divorcia, mi a bisa mi mes: ‘Nunca mi a desea pa mi bida coy e rumbo aki.’” Asina mes, a pesar di su circunstancianan di bida, awor e ta mas contento. El a bisa: “Unabes mi a stop di purba di cambia pasado, mi a sinti mi mucho mas mihor.”