Bon Noticia pa Tur Hende

E resureccion di Hesus a duna su discipelnan mas fe y entusiasmo. Por ehempel, apostel Pablo a biaha door di henter Asia Menor y e regionnan di Lama Mediteraneo pa forma congregacion nobo y fortalece e cristiannan pa para firme ora di enfrenta inmoralidad y persecucion violento. A pesar di tur e dificultadnan ey, hopi hende a bira cristian.

Mas despues Pablo mes a bay cera. Sinembargo, hasta for di den prizon el a skirbi diferente carta pa anima y conseha e congregacionnan cristian. El a spierta nan di un peliger mas grandi ainda: apostasia. Bou di guia di Dios su spirito santo, Pablo a premira cu “lobo feroz” lo a drenta meymey di nan y “troce e berdad” pa asina “pone e discipelnan bay nan tras.”​—Echonan 20:29, 30.

Na final di e prome siglo, e apostasia aki a cuminsa. Rond di e tempo ey, Hesus resucita a duna apostel Juan e Revelacion, un bista simbolico di loke lo pasa den futuro. Anto, manera Juan a skirbi, ni enemigo di Dios ni maestro falso no por stroba e proposito di Dios pa tera y pa humanidad cumpli. “Tur nacion, tribu, idioma y pueblo” lo tende e bon noticia tocante e Reino di Dios. (Revelacion 14:6) Henter nos planeta lo bira un paradijs y ken cu kier haci e boluntad di Dios lo biba den dje!

Abo no ta haya cu esey ta un “bon noticia”? Si ta asina, haci esfuerso pa bo siña mas tocante Dios su mensahe pa humanidad cu Bijbel ta papia di dje y con e por beneficia bo tanto awor como den futuro.

Bo por lesa Bijbel online, na mas cu 50 idioma, na www.jw.org. Riba e website ey bo por analisa tambe den bo mes idioma e foyeto Dios Tin Bon Noticia pa Nos!, e buki Kico Bijbel Ta Siña Realmente? y otro publicacionnan cu ta splica dicon nos por confia loke Bijbel ta bisa y con nos por aplica su consehonan practico den nos bida personal y di nos famia. Tambe bo por pidi cualkier Testigo di Jehova pa mas informacion.

​—Basa riba Echonan, Efesionan, Filipensenan, Colosensenan, Filemon, 1 Juan y Revelacion.