Abo tambe ta pensa mescos cu Rogelio? Segun bo, cua di e siguiente opinionnan ta mas logico?

• Diabel no ta existi; e ta djis un simbolo di maldad.

• Diabel ta existi, pero e no tin interes den hende.

• Diabel ta un ser spiritual poderoso cu tin hopi influencia riba hende.

Tin miyones di hende cu ta kere den un of mas di e opinionnan aki. Pero ta importa cua di nan ta corecto? Wel, si Satanas e Diabel no ta existi, e ora ey e personanan cu ta kere den dje a ser engaña. Si Satanas ta existi pero no tin interes den hende, e ora ey hopi hende ta preocupa innecesariamente of hasta tin miedo di dje pornada. Pero, si Satanas ta existi y ta trata di manipula nos, e ora ey e ta mas peligroso cu hopi hende ta imagina.

Laga nos wak con e Santo Scritura ta contesta e preguntanan aki: Diabel ta existi di berdad, of e ta djis un simbolo di maldad? Si e ta un persona real, e por haci bo daño? Y si ta asina, con bo por proteha bo mes?

Hopi hende ta pensa cu e personahe cu Bijbel ta yama Satanas of Diabel ta djis un simbolo di tur cos cu ta malo. Pero esey ta loke Bijbel ta siña realmente? Si ta asina, dicon Bijbel ta bisa cu Satanas a papia cu Hesucristo, y hasta cu Dios Todopoderoso? Laga nos analisa dos ehempel di e combersacionnan ey.

SATANAS A PAPIA CU HESUS

Poco despues cu Hesus a batisa, el a ser tenta tres biaha pa Satanas. Prome, el a trata di pone presion riba Hesus p’e uza e poder cu Dios a dun’e pa su mes beneficio, esta, pa comberti piedra den pan pa satisface su hamber. Despues, Diabel a desafia Hesus pa risca su bida djis pa hende admir’e. Finalmente, el a ofrece Hesus dominio riba tur e gobiernonan di mundo a cambio di un acto chikito di adoracion. Hesus a rechasa tur tres tentacion astuto y cada biaha el a cita for di e Scritura.—Mateo 4:1-11; Lucas 4:1-13.

Cu ken Hesus tabata papia? E tabata papia cu un mal cualidad den su mes? Segun e Scritura, Hesus “a ser poni na prueba den tur sentido, pero [el] a keda sin pica.” (Hebreonan 4:15) Ademas, Bijbel ta bisa: “E no a comete pica ni no a haya engaño den su boca.” (1 Pedro 2:22) Hesus no por tabata papia cu un parti malbado den su mes ya cu e tabata perfecto y a mantene su integridad na Dios. Nunca e no a laga ningun mal cualidad desaroya den dje. Pesey, e mester tabata papia cu un persona real.

E siguiente detayenan di e mesun combersacion ey ta demostra cu Diabel ta un persona real:

• Corda cu Diabel a ofrece Hesus dominio riba tur e gobiernonan di mundo si e djis hinca rudia y ador’e. (Mateo 4:8, 9) E oferta aki lo no tabatin mucho sentido si Satanas no tabata real. Ademas, Hesus no a nenga cu Satanas tabatin asina tanto poder.

• Despues cu Hesus a rechasa e tentacionnan, Diabel “a bay laga Hesus te na un otro momento oportuno.” (Lucas 4:13) En bista di esaki. Ki conclusion nos por saca? Diabel ta djis un simbolo di maldad of e ta un enemigo dicidido cu no ta entrega facil?

• Tuma nota cu “angelnan a bin y cuminsa sirbi Hesus.” (Mateo 4:11) No tin duda cu e angelnan ey tabata real y cu nan a encurasha Hesus y yud’e. Dicon anto nos mester pensa cu Satanas si no tabata real?

SATANAS A PAPIA CU DIOS

E di dos ehempel ta e relato di Job, un homber devoto na Dios. E relato ta conta di dos combersacion entre Diabel cu Dios. Tur dos biaha, Dios a elogia Job pa su lealtad na dje. Pero Diabel a haci comosifuera e conoce Job mas mihor cu Dios mes. El a bisa cu Job tabata sirbi Dios solamente pa motibonan egoista, y a insinua cu Dios a cumpra Job su lealtad. Jehovaa a permiti Satanas kita tur cos for di Job: su rikesa, su yiunan y hasta su salud. Cu tempo, a bira bisto cu Jehova tabatin rason y cu Satanas ta un gañado. Dios a bendiciona Job pa su integridad.—Job 1:6-12; 2:1-7.

Acaso Jehova tabata papia cu un mal cualidad den su mes den e combersacionnan ey entre e cu Satanas? No, pasobra Bijbel ta bisa cu “pa loke ta Dios, su caminda ta perfecto.” (2 Samuel 22:31) Tambe e Palabra di Dios ta bisa: “Santo, santo, santo ta Jehova Dios, e Todopoderoso.” (Revelacion 4:8) E palabra “santo” ta nifica puro, sagrado y sin mancha di pica. Pues, Jehova ta perfecto y ta imposibel pa e tin defecto of un mal caracteristica.

Asina mes algun hende ta bisa cu Job no a existi y cu e combersacionnan ey tabata imaginario. Pero esey ta berdad? No, pasobra otro textonan di Bijbel ta indica cu Job tabata un persona real. Por ehempel, Santiago 5:7 pa 11 ta menciona e ehempel di Job pa anima cristiannan pa keda fiel den tempo dificil y pa corda nan cu Jehova lo recompensa nan perseverancia. Con e ehempel di Job por a sirbi como un animacion si e no tabata un persona real y e atakenan di Satanas tabata imaginario? Ademas, Ezekiel 14:14 y 20 ta menciona tres homber husto: Noe, Daniel y Job. Noe y Daniel, tabata personanan cu a existi di berdad. Pues, ta logico cu Job tambe tabata un persona real y un homber cu un fe fuerte. Si Job tabata real, e ora ey esun cu a atac’e, cu a causa tur su persecucion, tambe mester ta real.

Pues, Bijbel ta mustra bon cla cu Diabel ta un persona spiritual cu di berdad ta existi. Pero kisas bo ta puntra bo mes: ‘E por haci ami cu mi famia daño awe den e mundo moderno aki?’

DIABEL TA UN PELIGER DEN NOS TEMPO?

Imagina bo cu diripiente un grupo di criminal ta bin biba den bo bario. Kico lo ta e resultado? Bo siguridad y e normanan moral di e bario lo bay atras. Awor, imagina bo cu diripiente Diabel cu su demoñonan—angelnan cu tambe a rebeldia contra Dios y sigui Diabel—a ser benta riba Tera. Kico lo ta e resultado? Wel, pa contesta esey, pensa un rato riba loke abo ta mira den noticianan local y internacional.

• Bo ta mira un aumento den violencia sin sentido, a pesar di tur esfuerso cu hende ta haci rond mundo pa stop esey?

• Bo ta mira cu tin mas y mas spiritismo den entretenimento a pesar cu hopi mayor no ta di acuerdo cu esey y ta consider’e perhudicial pa nan yiunan?

• Bo ta mira cu hende ta cabando cu e medioambiente a pesar di hopi esfuerso pa proteh’e?

• Bo no ta haya cu tin algo completamente robes cu sociedad humano, comosifuera cu tin un forsa cu ta hiba humanidad na perdicion?

Tuma nota di ken Bijbel ta bisa ta tras di tur e problemanan aki: “Di manera cu e dragon grandi, e colebra original, esun cu yama Diabel y Satanas, cu ta gaña henter e Tera habita a ser benta abou; el a ser benta abou riba Tera y su angelnan a ser benta abou hunto cu ne ... Ay di Tera y di lama, ya cu Diabel a baha bin cerca boso yen di rabia, pasobra e sa cu a ked’e masha poco tempo.” (Revelacion 12:9, 12) Despues di analisa e pruebanan aki, hopi hende a yega na e conclusion cu Satanas e Diabel ta un ser spiritual peligroso cu ta influencia e mundo rond di nos.

Kisas bo kier sa con bo por proteha bo mes contra Diabel. E siguiente articulo lo duna algun sugerencia practico.

Diabel ta mescos cu koolmonoxide; e tambe ta invisibel, su influencia ta dificil pa detecta y e ta hopi peligroso. Pero bo no mester tene miedo di Diabel, ya cu Dios ta ofrece nos varios yudansa. Laga nos considera algun di nan.

E capacidad di scoge. Santiago 4:7 ta bisa nos: “Opone Diabel, y lo e huy for di boso.” Aunke Satanas ta poderoso, e no por obliga bo di haci algo cu bo no kier haci. Ta abo tin cu scoge. Na 1 Pedro 5:9 nos ta lesa: “Tuma boso posicion contra dje [Diabel], firme den fe.” Corda cu Diabel a bay laga Hesus despues cu el a rechasa e tres tentacionnan rotundamente. (Mateo 4:11) Bo tambe por scoge pa rechasa e intentonan di Satanas.

Amistad cu Dios. Santiago 4:8 ta anima nos pa “hala cerca Dios.” Jehova ta invita bo personalmente pa bo cera un amistad cu ne. Con bo por haci esey? E mihor manera pa cuminsa ta di siña mas tocante Jehova mediante Bijbel. (Juan 17:3) Mas bo siña di Jehova, mas lo bo stim’e, y e amor ey lo motiva bo pa haci su boluntad. (1 Juan 5:3) Con bo Tata celestial lo reacciona riba bo esfuerso pa hala mas cerca di dje? Santiago ta bisa cu ‘lo e hala cerca bo.’

Dios su proteccion. Proverbionan 18:10 (NW) ta bisa: “E nomber di Jehova ta un toren fuerte. E husto ta core drenta den dje y ta haya proteccion.” Ta claro cu esaki no ta nifica cu e nomber personal di Dios riba su mes ta un tipo di amuleto. Mas bien, esaki ta nifica cu hende cu tin un respet profundo pa e nomber ey por pidi Dios pa proteha nan ki ora cu nan tin mester di esey.

Un ehempel di Bijbel. Echonan 19:19 ta conta nos algo interesante cu algun habitante di Efeso cu a caba di bira cristian a haci. E versiculo ta bisa cu “un cantidad grandi di esnan cu tabata practica magia a trece nan bukinan hunto y a kima nan dilanti di tur hende. Y nan a calcula e balor di tur e bukinan y a yega na un total di 50.000 moneda di plata.”a E cristiannan ey a destrui tur obheto cu tabatin di haber cu spiritismo, sin importa cuanto placa nan tabata costa. Awe nos por siña hopi for di nan ehempel. E mundo aki ta hopi envolvi cu spiritismo y cosnan oculto. Hasta obhetonan y practicanan spiritista cu por parce inocente por trece nos bou di influencia di demoño. Pesey, ta hopi importante pa tene e tipo di cosnan ey leu for di bo, cueste loke cueste.—Deuteronomio 18:10-12.

Pa 50 aña largo, Rogelio, menciona den e prome articulo di e serie aki, no tabata kere cu Diabel ta existi. Pero na dado momento su punto di bista a cambia. Dicon? Rogelio ta bisa: “Pa prome biaha den mi bida mi a haya un Bijbel den mi man. Loke mi a lesa den Bijbel a convence mi cu Diabel ta existi. E conocemento ey ta yuda mi proteha mi mes contra di su influencia.”

Abo lo kier mira e dia cu Satanas di berdad lo no existi mas? Bo por. Bijbel ta profetisa cu aki un poco tempo Diabel, kende ta gaña asina tanto hende, lo ser “benta den e lago di candela y suafel.” (Revelacion 20:10) Ta claro cu candela y suafel literal no por haci daño na un ser spiritual invisibel. Pues, e lago di candela mester ta algo simbolico: e ta representa destruccion eterno. Satanas lo disparce pa semper. Esaki si lo ta un tempo di alegria pa tur hende cu ta stima Dios.

Mientrastanto, sigui siña tur loke bo por tocante Jehova y su manera di pensa.b Si bo haci esey, lo bo mira e dia cu di berdad nos por bisa: “Satanas no ta existi!”