Hopi hende rond mundo tin respet pa Bijbel. Pero kisas nan sa masha poco tocante su contenido. Esey sigur ta e caso di miyones di hende cu ta biba na Asia, pero tambe na paisnan caminda casi tur hende tin Bijbel.

Kisas bo ta puntra bo mes: Dicon ta importante pa mi lesa Bijbel? Wel, ora bo haya sa loke Bijbel ta siña, esey por yuda bo logra lo siguiente:

• Haya felicidad

• Resolve problema di famia

• Trata cu ansiedad

• Mehora bo relacion cu otro hende

• Maneha bo placa mas mihor

Tuma por ehempel un hende muher cu yama Yoshiko cu ta biba na Japon. E kier a haya sa kico Bijbel ta bisa, y pesey el a dicidi di les’e. Kico tabata e resultado? El a bisa: “Bijbel a yuda mi haya proposito den bida y un speransa pa futuro. Mi no ta sinti un bashi den mi curason mas.” Amit, kende nos a menciona ariba, a dicidi di analisa Bijbel. El a bisa: “Mi a keda sorprendi pasobra Bijbel ta contene informacion practico pa tur hende.”

Bijbel a yuda miyones di hende mehora nan bida. Pesey nos ta anima bo pa lesa Bijbel pa bo wak pa bo mes con e por yuda bo.

Bijbel ta un buki hopi bieu. Nan a cuminsa skirbi Bijbel na Medio Oriente mas o menos 3.500 aña pasa. Esey tabata durante e tempo cu e poderoso dinastia di Shang tabata existi na China y mas o menos 1.000 aña prome cu budismo a cuminsa na India.—Wak e cuadro “Informacion General Tocante Bijbel.”

Un buki ta beneficioso ora e ta facil pa compronde y ora e tin conseho practico. Wel, Bijbel ta net un buki asina. E ta contesta e preguntanan mas importante di bida.

Por ehempel, bo a yega di puntra bo mes: Pakico nos a bin na mundo? Semper hende a haci nan mes e pregunta ey. Sinembargo, e contesta riba e pregunta aki ta den e prome dos capitulonan di Genesis, e prome buki di Bijbel. E buki ey ta bay bek “na principio”, es decir miles di miyones di aña pasa, tempo cu nos universo, incluso e galaxianan, e streanan y nos planeta a ser traha. (Genesis 1:1) Despues e ta splica gradualmente con e Tera a bira un luga habitabel, y con entre otro bestia, mata y hende a bin na existencia. Tambe e ta splica kico ta nan proposito.

BIJBEL TA SKIRBI PA TUR HENDE POR COMPRONDE

Bijbel ta duna nos conseho practico pa yuda nos resolve nos problemanan di tur dia. Y e consehonan cu e ta duna ta facil pa compronde. Con asina? Wel, por lo menos den dos manera.

Na prome luga, Bijbel ta skirbi na un manera cla y atractivo. E no ta uza palabranan cu ta dificil pa compronde, sino e ta uza palabranan facil cu ta yuda nos visualisa loke nos ta lesa y cu ta aclaria ideanan dificil.

Por ehempel, Hesus a uza hopi ilustracion simpel cu tin di haber cu loke hende ta pasa aden diariamente pa asina siña nan lesnan cu por touch nan curason. Na Mateo capitulo 5 te cu 7, bo por haya hopi di e ilustracionnan aki den e discurso bon conoci di Hesus cu yama e Sermon Riba Sero. Un comentarista di Bijbel a yam’e “un discurso practico”, y a bisa cu su meta “no ta pa yena nos cabes cu yen di informacion sino pa duna nos guia y principio cu por yuda nos den nos bida.” Bo por lesa e capitulonan aki den mas o menos 15 pa 20 minuut. Lo bo ripara cu e palabranan cu Hesus a uza tabata simpel pero toch impactante.

Na di dos luga, e contenido di Bijbel ta facil pa compronde. E no ta un buki di cuenta. Mas bien, manera The World Book Encyclopedia ta bisa, Bijbel ta papia di e “problemanan, expectativanan, fracasonan y triunfonan tanto di hende comun y coriente como di hende importante.” Ta facil pa nos compronde e relatonan aki ya cu nan ta papia di hendenan real y eventonan cu a tuma luga. Ademas, nos por siña lesnan valioso for di e relatonan ey.—Romanonan 15:4.

BIJBEL TA DISPONIBEL PA TUR HENDE

Pa bo por compronde un buki, e mester ta den un idioma cu bo ta domina. Awe, casi sigur tin Bijbel den un idioma cu bo por compronde, sin importa na unda bo ta biba of di unda bo ta. Ban wak dicon esaki ta posibel.

Traduccion. Originalmente, Bijbel a ser skirbi na Hebreo, Arameo y Griego. Si el a keda na e idiomanan ey, hopi hende lo no por a les’e. Danki na e esfuerso di traductornan diligente, Bijbel ta disponibel na un gran cantidad di idioma. Y e ta traduci, sea completo of un parti di dje, na mas cu 2.700 idioma. Kico esey kiermen? Cu mas cu 90 porciento di hende na mundo por lesa por lo menos cierto parti di Bijbel den nan idioma.

Imprenta. E texto original tabata skirbi riba material cu no ta duradero, manera cuero y papiro (cu ta manera papel di saco bruin). Pa e motibo ey, nan mester a copia e scrituranan ey cuidadosamente na man bes tras bes. E copianan ey tabata hopi caro y masha poco hende por a cumpra nan. Pero cu e metodo di imprenta cu Gutenberg a inventa mas cu 550 aña pasa, nan por a produci Bijbel na gran cantidad. Segun un calculo, a distribui mas cu cinco mil miyon ehemplar di Bijbel, sea completo of un parti di dje.

Pues, ta claro cu bo no por compara Bijbel cu ningun buki religioso. E ta un buki cu tur hende por compronde. Naturalmente, esey ta exigi esfuerso si, pero bo por haya yudansa. Na unda? Y ki beneficio lo bo por haya? Nos ta anima bo pa lesa e siguiente articulo.

Imagina bo cu bo ta bishitando un otro pais pa prome biaha. Bo ta haya bo cu hende, custumber y cuminda cu bo no conoce. Y podise lo bo tin cu paga cu placa cu bo no ta custumbra cu ne. Probablemente lo bo por sinti bo confundi.

Ora bo lesa Bijbel pa prome biaha, lo bo por sinti mescos. Dicon? Pasobra tur cos lo ta desconoci pa bo. Bo ta siña conoce entre otro e Filisteonan. Bo ta lesa tocante hende cu tabatin custumber di scheur nan paña. Tambe bo ta conoce un alimento cu yama mana y un moneda cu yama dracma. (Exodo 16:31; Josue 13:2; 2 Samuel 3:31; Lucas 15:9) Lo bo por sinti bo confundi, no ta berdad? Awor, kico si bo ta na un otro pais? Sigur lo bo keda contento si bo haya yudansa. Pues, bo no ta kere cu lo bo keda contento si un hende splica bo loke bo no ta compronde di Bijbel?

YUDANSA DEN PASADO

For di tempo cu a cuminsa skirbi Bijbel den siglo 16 prome cu Cristo, hende por a haya yudansa pa compronde e scrituranan santo. Por ehempel, Moises, e prome lider di e nacion di Israel, “a cuminsa splica” loke tabatin skirbi.—Deuteronomio 1:5.

Dies siglo despues, ainda tabatin instructornan di e Scritura. Na aña 455 prome cu Cristo, un grupo grandi di Hudiu, cu a inclui mucha tambe, tabata reuni na un plasa na Jerusalem. Instructornan di Bijbel cu tabata presente tabata “lesa for di e [mesun] buki” sagrado ey. Pero nan no a haci esey so, tambe nan a “duna splikashon pa tur hende komprondé [BPK].”—Nehemias 8:1-8.

Cinco siglo despues, Hesucristo tambe a haci e mesun tipo di trabou educativo ey. En realidad, e tabata bon conoci como “Maestro.” (Juan 13:13) E tabata siña hende den un grupo grandi, pero tambe e tabata siña hende individual. Na un ocasion, ora Hesus tabata dunando su famoso Sermon Riba Sero, el a papia cu un multitud grandi. Con nan a reacciona? Nan “a keda babuca di su manera di siña hende.” (Mateo 5:1, 2; 7:28) Den e lente di aña 33 despues di Cristo, Hesus tabata bayendo un pueblito cerca di Jerusalem. Na caminda e tabata papia cu dos di su discipelnan y a “splica [nan] e Scritura na placa chikito.”—Lucas 24:13-15, 27, 32.

E discipelnan di Hesus tambe a siña hende e Palabra di Dios. Na un ocasion, un oficial di Etiopia tabata lesando un parti di e Scritura. Un discipel cu yama Felipe a acerc’e y a puntr’e: “Bo ta compronde tur loke bo ta lesa?” E Etiope a contest’e: “Con mi por compronde si ningun hende no guia mi?” E ora ey Felipe a splic’e e nificacion di loke el a lesa.—Echonan 8:27-35.

YUDANSA DEN NOS TEMPO

Mescos cu tabatin maestronan den pasado cu tabata siña hende e Palabra di Dios, awendia testigonan di Jehova ta siña hende compronde Bijbel den 239 pais rond mundo. (Mateo 28:19, 20) Tur siman, nan ta yuda mas cu nuebe miyon hende compronde Bijbel; mayoria di e hendenan aki no a lanta como cristian. E lesnan di Bijbel ta gratis. Nan ta duna e lesnan aki na bo cas of na cualkier otro luga cu bo ta desea. Y hasta tin hende ta haya les via telefon, computer of tablet.

Si bo ta desea un curso di Bijbel, bo por tuma contacto cu testigonan di Jehova. Lo bo ripara cu Bijbel no ta dificil pa compronde, sino cu e “ta probechoso pa siña hende, pa reprende, pa corigi, pa disciplina den husticia”, pa asina bo “por ta plenamente competente, completamente prepara pa tur bon obra.”—2 Timoteo 3:16, 17.