Con Bo Por Beneficia di e Grupo di Sirbishi di Veld?
1. Menciona algun beneficio di e Estudio di Buki di Congregacion cu ainda nos por haya den e grupo di sirbishi di veld.
1 Bo ta corda e tempo di e Estudio di Buki di Congregacion? Bo ta corda con nos tabata reuni den gruponan chikito den un ambiente relaha? Esaki sin duda a permiti nos forma amistadnan cu a yuda nos keda firme den fe. (Prov. 18:24) E superintendente di estudio di buki tabata conoce nos circunstancianan personal y por a anima nos. (Prov. 27:23; 1 Ped. 5:2, 3) Wel, ainda nos por haya e beneficionan ey mediante e grupo di sirbishi di veld.
2. Kico nos por haci pa forma amistad den nos grupo di sirbishi di veld cu por ta un apoyo spiritual pa nos?
2 Tuma Iniciativa: Generalmente, gruponan di sirbishi di veld ta mes grandi cu e gruponan di estudio di buki di antes. Ora nos ta traha den sirbishi “lado a lado” cu e rumannan di nos grupo, nos por forma amistadnan cera. (Flp. 1:27) Bo a traha cu tur ruman den bo grupo? Bo por ‘hancha bo mes’ den esey? (2 Cor. 6:13, nota) Ademas, nos por invita un of mas ruman di nos grupo na nos Adoracion Como Famia of pa come algo hunto. Den algun congregacion, tur siman un grupo di sirbishi di veld ta invita e orador bishitante pa come. Hasta si e orador no por ta presente, tur publicador di e grupo asigna ta bin hunto pa comparti un cuminda y encurasha otro.
3. Con nos por haya atencion spiritual den e grupo di sirbishi di veld?
3 Aunke nos ta reuni como congregacion dos biaha pa siman so, esey no ta nifica cu e publicadornan ta haya menos atencion spiritual di e ancianonan. E superintendente di grupo tin e responsabilidad di duna cada publicador animacion y entrenamento pa sirbishi. Si bo superintendente di grupo no a yega di traha cu bo den sirbishi, dicon bo no ta pidi’e pa bo traha cu ne? Ademas, un weekend pa luna, e superintendente di sirbishi ta bishita un grupo diferente. Den congregacionnan mas chikito, e por bishita cada grupo dos biaha pa aña. Bo ta sali den sirbishi ora e superintendente di sirbishi bishita bo grupo?
4. (a) Con ta organisa reunionnan di sirbishi di veld? (b) Bo ta kere cu un dia bo por ofrece bo cas pa tene e reunionnan ey?
4 Por lo general, ta mihor pa cada grupo reuni apart pa sirbishi di veld den weekend. Ora tin diferente luga pa reuni na mas o menos e mesun orario, ta mas facil pa e rumannan yega na e reunion di sirbishi di veld. Por parti e grupo mas lihe y sali bay e teritorio sin perde mucho tempo. Ademas, e superintendente di grupo por ta mas pendiente di e publicadornan di su grupo. Sinembargo, pa motibo di circunstancianan kisas ta consehabel pa dos of mas grupo sali hunto. Si henter e congregacion ta reuni riba e prome diasabra di luna of despues di e Estudio di Toren di Vigilancia, hopi biaha ta mihor pa cada publicador sinta hunto cu su grupo y pa e superintendente di grupo parti su grupo prome cu haci oracion pa sali.—Wak e cuadro “Bo Por Ofrece Bo Cas?”
5. Aunke nos no tin e Estudio di Buki di Congregacion mas, di kico nos por ta sigur?
5 Aunke nos no tin e Estudio di Buki di Congregacion mas, Jehova ta sigui percura tur loke nos mester pa haci su boluntad. (Heb. 13:20, 21) Bou di su cuido, nos no ta sinti falta di nada. (Sal. 23:1) Nos ta haya hopi bendicion pa medio di nos grupo di sirbishi di veld. Pues, laga nos tuma iniciativa, ya cu “esun cu ta sembra na abundancia, lo cosecha tambe na abundancia.”—2 Cor. 9:6.
[Cuadro na pagina 6]
Bo Por Ofrece Bo Cas?
Na algun congregacion, e gruponan di sirbishi di veld ta sali hunto den weekend pasobra no tin suficiente luga pa reuni. Reunion di sirbishi di veld ta forma parti di e actividadnan di congregacion, y pesey ta un gran privilegio di por tin e reunionnan ey na nos cas. Abo por ofrece bo cas? No keda sin hacie djis pasobra bo cas ta humilde. Loke e ancianonan ta tuma na cuenta ta unda bo cas ta situa y otro factornan manera nan tabata haci antes ora di scoge un luga pa e estudio di buki. Si bo kier ofrece bo cas, laga bo superintendente di grupo sa esey.