Abo Lo Traha Pionero Auxiliar?
1. Dicon e temporada di Memorial lo ta un bon oportunidad pa traha mas den sirbishi?
1 E temporada di Memorial lo ta un bon oportunidad pa nos traha mas den sirbishi. Den e temporada aki, nos ta medita riba e gran amor cu Jehova a demostra ora el a manda su Yiu como rescate. (Juan 3:16) Esaki ta aumenta nos aprecio y ta motiva nos pa papia cu otro hende tocante Jehova y di loke e ta haciendo pa humanidad. (Isa. 12:4, 5; Luc. 6:45) Den e tempo aki, nos ta disfruta tambe di un campaña special pa invita nos conocinan y hende den teritorio pa asisti na Memorial. Despues, nos ta haci esfuerso pa sigui cultiva interes di esnan cu a asisti. Abo lo por traha pionero den maart, april of mei?
2. Dicon maart lo ta un bon luna pa traha pionero?
2 Haci Maart un Luna Special: Maart lo ta un bon luna pa traha pionero auxiliar. Publicadornan cu kier traha pionero den maart por opta pa traha sea 30 of 50 ora. Ademas, si e superintendente di circuito ta bishita e congregacion den maart, e pioneronan auxiliar ta ser invita pa ta presente durante henter e reunion cu lo e tene cu e pioneronan regular y special. E campaña pa parti invitacion pa e Memorial, cu lo tuma luga diamars 26 di maart 2013, lo ta mas largo cu e añanan prome; lo e cuminsa 1 di maart. Ademas, maart tin cinco weekend. Pues, nos por cuminsa plania for di awor pa haci maart un luna special.
3. Con nos por plania pa traha mas den sirbishi?
3 Plania for di Awor: Awor ta e momento pa wak bo programa y mira ki ahustenan bo por haci pa traha pionero. Ta importante pa miembronan di famia coopera cu otro. Pesey saca tempo durante boso anochi di Adoracion Como Famia pa considera e metanan cu boso tin y traha un programa. (Prov. 15:22) Si bo no por traha pionero auxiliar, no desanima. Kisas bo por plania pa traha un tiki mas den sirbishi e dianan cu bo ta sali normalmente of plania pa sali un dia mas durante siman.
4. Ki beneficio nos ta saca ora nos aumenta nos actividad den maart, april y mei?
4 Ora nos aumenta nos actividad den maart, april y mei, nos lo aumenta e goso y satisfaccion cu nos ta sinti den sirbi Jehova y den duna di nos mes na otronan. (Juan 4:34; Echo. 20:35) Pero mas importante ainda, nos esfuersonan extra lo haci Jehova contento.—Prov. 27:11.