Dicon Bijbel No Ta Menciona Nomber di Tur Personahe Biblico?

E buki biblico di Ruth ta yama un homber cu a nenga di haci loke e Ley di Moises ta bisa: Amigo. (Ruth 4:1-12) Nos mester conclui cu tur personahe cu Bijbel no ta menciona nan nomber ta mal hende of no ta hende importante?

No! Laga nos wak un otro ehempel. Pa prepara pa e ultimo cena di Pasco Hudiu, Hesus a bisa su discipelnan pa “bay den stad cerca tal y tal hende” y prepara tur cos na cas di e persona ey. (Mateo 26:18) Nos tin cu conclui cu e homber cu Hesus a referi na dje como “tal y tal hende” den e versiculo aki tabata un mal hende? Of cu e no tabata un hende dje importante ey pa menciona su nomber? Di ningun manera, pasobra e “tal y tal hende” ey sin duda tabata un discipel di Hesus. Pero Hesus no a menciona su nomber, pasobra esaki no tabata esencial pa e relato aki.

Ademas, Bijbel ta menciona nomber di hopi hende malbado, pero e ta referi tambe na hopi hende fiel kende nan nomber no ta ser menciona. Por ehempel, e nomber Eva, e prome hende muher, ta masha conoci maske su egoismo y desobediencia a contribui na e pica di Adam, loke tabatin consecuencia teribel pa nos tur. (Romanonan 5:12) Contrario na esey, Bijbel no ta menciona nomber di e esposa di Noe, aunke el a sostene su esposo Noe den su trabou importante na un manera obediente y sin egoismo. Ta claro cu e echo cu no a menciona su nomber no ta nifica cu e tabata insignificante of cu e no tabatin e aprobacion di Dios.

Tin otro personanan cu Bijbel no ta menciona nan nomber pero cu a hunga un papel importante den e proposito di Jehova. Pensa un rato riba e ehempel di e hobencita Israelita cu tabata un esclavo den cas di Naaman, un hefe di ehercito di Siria. Yen di curashi el a papia cu su doño, e esposa di Naaman, tocante e profeta di Jehova kende tabata na Israel. Como resultado, un milager grandi a sosode. (2 Reynan 5:1-14) E yiu muher di e hues Jefta tambe a pone un ehempel sobresaliente di fe. El a keda sin casa y sin haya yiu pa e por a cumpli cu un promesa cu su tata a haci; el a haci esaki cu buena gana. (Huesnan 11:30-40) Ademas, tin escritornan di mas cu 40 salmo y tambe profetanan cu a cumpli fielmente cu asignacionnan importante, pero toch Bijbel no ta menciona nan nomber.—1 Reynan 20:37-43.

Pero un ehempel cu ta hasta mas impresionante ta esun di e angelnan fiel. Tin miyones y miyones di angel, pero Bijbel ta menciona nomber di dos di nan so, esta, Gabriel y Miguel. (Daniel 7:10; Lucas 1:19; Judas 9) E Palabra di Dios no ta menciona nomber di ningun di e otro angelnan. Por ehempel, Manoa, e tata di Samson, a puntra un angel: “Con bo nomber ta, pa ora bo palabranan wordo cumpli nos por duna bo honor?” E angel a bis’e: “Pakico bo ta puntra mi nomber.” E angel a mustra humildad y a keda sin acepta e honor cu Dios so ta merece.—Huesnan 13:17, 18.

Bijbel no ta splica dicon nomber di algun personahe si ta ser menciona y di otronan no. Pero, nos por siña hopi for di personanan fiel cu a sirbi Dios sin cu nan a spera di haya fama of prominencia.