Con Nos Por Yuda Hende Cu No Por Lesa Bon?

1. Dicon no ta facil pa siña hende cu no por lesa bon e berdadnan di Bijbel?

¹ Algun hende ta interesa den cosnan spiritual, pero como cu nan no ta lesa bon, nan por sinti nan un tiki incomodo cu Bijbel y otro buki. Pesey kisas no tin mucho sentido pa for di un principio nos ofrece nan e buki Bijbel Ta Siña. Con nos por yuda nan den sentido spiritual? Nos a haci un encuesta den mas cu 20 pais pa haya sa kico publicadornan cu experencia ta haci den un situacion asina. Laga nos wak algun di nan sugerencianan.

2. Ki herment util nos tin pa yuda hende cu no por lesa bon?

² Si e hende no por lesa bon of no sa lesa mes, lo ta bon pa cuminsa cu e foyeto Scucha Dios of Scucha Dios y Biba pa Semper. Un pionero na Merca ta mustra e persona tur dos foyeto y ta puntr’e cua di nan dos e ta prefera. E sucursal di Kenia a informa cu e publicacionnan aki ta hopi util pa nan pasobra den e cultura Africano hende tin custumber di siña cosnan pa medio di contamento di storia y no pa medio di sesion di pregunta y contesta. Aunke hende cu tin scol a custumbra cu e metodo di pregunta y contesta esnan cu no tin mucho scol si no ta gusta e sistema aki mucho. Si e hende por lesa un tiki, hopi publicador ta cuminsa den e foyetonan Dios Tin Bon Noticia pa Nos! of Bo Por Ta Amigu di Dios! of kisas Mi Buki di Relato Biblico.

3. Kico nos tin cu tene cuenta cu ne si nos kier yuda un hende cu no sa lesa?

³ Duna Elogio: Hende cu no sa lesa por tin berguensa di esey y hopi di nan ta sinti cu nan no ta bal nada. Pa bo por siña nan e berdad, bo tin cu cuminsa laga nan sinti nan mes comodo. Mayoria di hende cu no sa lesa ta inteligente y ta capta cos lihe. Pesey, trata nan cu e respet cu nan ta merece. (1 Ped. 3:15) Ora nan mira cu ta bale la pena pa haci esfuerso y cu nan ta progresa den sentido spiritual, nan lo sinti nan motiva pa sigui cu e estudio. Pesey duna nan hopi elogio.

4. Con nos por anima studiantenan cu no por lesa bon pa prepara pa e estudio?

⁴ Hasta si un studiante no por lesa bon, anim’e p’e prepara pa e estudio. Algun publicador na Sur Africa ta anima nan studiantenan pa pidi un miembro di famia of amigo cu por lesa bon yuda nan. Un publicador na Gran Britania ta laga su studiantenan di Bijbel uza su buki durante un parti di e estudio pa asina nan por wak con facil ta pa haya e contesta ora e ta marca. Un ruman homber na India ta anima su studiantenan pa prepara pa e siguiente estudio door di wak e plachinan y medita di antemano riba nan.

5. Con nos por mustra pasenshi ora nos ta dirigi un estudio?

⁵ Tene Pasenshi: Sea cual sea e publicacion cu nos uza, enfoca riba e puntonan principal y yuda e studiante compronde nan bon. Na comienso, ta mihor pa limita e estudio na 10 of 15 minuut. No purba di trata mucho informacion; un par di paragraf mes ta suficiente. No perde pasenshi si e studiante ta lesa pocopoco. Segun cu e ta haya mas aprecio pa Jehova, lo e sintie motiva pa mehora su lesamento. Pa yuda su amor pa Jehova crece, ta bon pa invit’e pa asisti na e reunionnan for di cuminsamento.

6. Con nos por siña hende lesa?

⁶ Si un studiante di Bijbel siña lesa bon, su progreso spiritual ta bay mas lihe. (Sal. 1:1-3) Si e studiante desanima, kisas bo por yud’e haya confianza ora bo menciona e cosnan cu el a siña caba. Sigur’e cu Jehova lo bendiciona su esfuersonan y anim’e pa e pidie yudansa. (Prov. 16:3; 1 Juan 5:14, 15) Algun publicador na Gran Britania ta anima nan studiantenan pa pone metanan realistico, por ehempel, siña alfabet, despues busca y lesa texto di Bijbel y finalmente lesa publicacionnan biblico simpel. Hopi biaha, pa bo siña un hende lesa, no ta suficiente pa djis mustr’e con e tin cu lesa; e mester sinti su mes motiva tambe pa haci esey.

7. Dicon nos no mester keda sin comparti e berdad cu hende cu no por lesa bon?

⁷ Jehova no ta menosprecia hende cu no tin hopi scol. (Job 34:19) Loke ta importante p’e ta e hende su curason. (1 Cro. 28:9) Pesey no keda sin comparti e berdad cu hende cu no por lesa bon. Bo tin excelente publicacionnan cu bo por cuminsa cu ne. Cu tempo, bo por pasa pa e buki Bijbel Ta Siña pa e studiante por haya un mihor comprondemento di e Scritura.