Con pa Mehora Nos Sirbishi: Mustra Interes den Hende

Dicon Esey Ta Importante: Hesus a mustra amor y interes personal den otro hende. Na un ocasion el a bay cura un homber sordo y, kisas el a ripara cu e homber tabata sintie un tiki incomodo, el a hal’e un banda, leu for di bista di hende. (Mar. 7:31-35) El a mustra consideracion na su discipelnan, reconociendo nan limitacionnan y no a yena nan cu demasiado informacion. (Juan 16:12) Hesus ta sigui mustra interes den hende hasta for di cielo. (2 Tim. 4:17) Como siguidornan di Cristo, nos kier ta mescos cu ne. (1 Ped. 2:21; 1 Juan 3:16, 18) Pa nos por tin exito den nos sirbishi nos mester mustra consideracion pa e hendenan den nos teritorio y tene cuenta cu nan circunstancia-, interes- y preocupacionnan. Nan lo ta mas inclina pa scucha si nan sinti cu nos no a bin djis pa papia cu nan di un mensahe of laga literatura, sino pasobra nos ta interesa den nan personalmente.

Con pa Haci Esaki:

Prepara bon. No bira nervioso, pone un smile riba bo cara y sea amigabel.
Observa bon. Bo ta mira algo cu ta indica cu e persona tin yiu, cu e ta gusta mata of cu e tin bestia di cas? Bo a ripara cu e ta pertenece na un cierto religion? Kisas bo por tene cuenta cu esey ora bo ta bay cuminsa cu bo introduccion.
Puntr’e su opinion y scucha atentamente, sin interumpie innecesariamente. Keda cu contacto visual p’e mira cu bo ta scuchando. Bis’e danki pa a expresa su mes, elogi’e si esey ta na su luga. No para discuti.
Sea flexibel. Ahusta bo presentacion pa papia tocante algo cu ta interesa e persona. Esaki no ta dificil, ya cu nos tratado-, foyeto- y revistanan ta trata un gran variedad di tema. Si bo a yega por ehempel net ora cu e persona ta ocupa, sea breve.

Purba di Haci Esaki Durante e Luna Aki:

Practica durante bo adoracion di famia of den sirbishi con pa adapta bo presentacion pa papia tocante algo cu ta interesa e persona.
E ruman cu ta dirigi e reunion pa sirbishi di veld por trata of demostra maneranan cu nos por mustra interes den hende.