E Ta Contene Historia Real y No Mito
“Mi a investiga tur cos for di principio cu exactitud.”—LUCAS 1:3.
DICON BIJBEL TA DISTINTO? Leyenda y mito ta cuenta masha fascinante, pero nan no ta menciona nomber, fecha ni luga specifico. Na contraste cu nan, Bijbel si ta contene hopi detaye historico cu ta convence su lectornan cu su contenido “den su totalidad ta berdad.”—Salmo 119:160.
UN EHEMPEL: Bijbel ta bisa cu “Nabucodonosor, rey di Babilonia, . . . a hiba Joakin [rey di Juda] den exilio na Babilonia.” Despues, “Evil-merodac, rey di Babilonia, den e aña cu el a bira rey, a libra Joakin, rey di Juda, for di prizon.” Ademas, Bijbel ta bisa cu tur e dianan di Joakin su bida, e tabata haya un porcion pa cada dia for di rey.—2 Reynan 24:11, 15; 25:27-30.
LOKE ARKEOLOGONAN A DESCUBRI: Entre e ruinanan di Babilonia di antiguedad, arkeologonan a descubri documentonan di e tempo di e reinado di Nabucodonosor II. E documentonan aki a contene lista di nomber di trahado- y prizoneronan na Babilonia y e provisionnan cu nan tabata ricibi. “Yaukin [esta, Joakin]”, kende tabata e “rey di e tera di Yahud [Juda]”, y e hendenan di su cas tambe a ser menciona. Awor kico di Evil-merodac, e sucesor di Nabucodonosor? Den e bisindario di e stad Susa, arkeologonan a haya un vaas cu e inscripcion: “Palacio di Amil-Marduk [Evil-merodac], rey di Babilonia, yiu di Nabucodonosor, rey di Babilonia.”
KICO ABO TA PENSA? Tin un otro buki sagrado cu ta contene asina tanto detaye specifico y exacto di historia? Of Bijbel ta e unico?
[Comentario na pagina 5]
“Compara cu otro documentonan di antiguedad, Bijbel su informacion encuanto tempo y sitio cu sucesonan a tuma luga ta mas exacto y confiabel.”—A SCIENTIFIC INVESTIGATION OF THE OLD TESTAMENT, DI ROBERT D. WILSON
[Plachi na pagina 5]
Documento di Babilonia cu ta menciona Rey Joakin di Juda
[Reconocemento]
© bpk, Berlin/Vorderasiatisches Museum, SMB/Olaf M. Tessmer/Art Resource, NY