Mustra Aprecio pa Jehova Su Generosidad

JEHOVA ta un Dios generoso. (Sant. 1:17) For di e inmenso cielo yen di strea te na e matanan berde cu ta cubri Tera, henter creacion di Jehova “ta canta” di su generosidad.—Sal. 65:12, 13; 147:7, 8; 148:3, 4.

E salmista a mustra un aprecio profundo pa e Creador y a sintie motiva pa compone un cantica di alabanza pa Jehova su creacion. Lesa Salmo 104 y mira si bo tin e mesun sintimentonan. E salmista a bisa: “Lo mi canta na SEÑOR tanten cu mi ta biba; lo mi canta alabanza na mi Dios mientras cu mi tin bida.” (Sal. 104:33) Abo tambe ta sinti asina?

UN EXCELENTE EHEMPEL DI GENEROSIDAD

Jehova kier pa nos imita su generosidad. Tambe e ta duna nos motibonan pa ta generoso. Bou di inspiracion apostel Pablo a skirbi: “Instrui e rumannan cu ta rico den e mundo aki pa nan no ta arogante, y pa nan pone nan speransa, no den rikesa insigur, sino den Dios, kende ta duna nos tur e cosnan cu nos ta disfruta di dje. Bisa nan pa nan haci bon, pa nan ta rico den bon obra, pa nan ta generoso, cla pa comparti cu otro, y asina acumula como tesoro pa nan mes un bon fundeshi pa futuro, a fin cu nan por haya un gara firme riba loke realmente ta bida.”—1 Tim. 6:17-19.

Den e segundo carta cu Pablo a skirbi e congregacion di Corinto, el a splica ki actitud nos mester tin ora di duna: “Laga cada hende haci manera el a dicidi den su curason, no di mala gana, ni forsa, pasobra Dios ta stima hende cu ta duna cu alegria.” (2 Cor. 9:7) Despues, el a menciona e beneficio di duna generosamente: Esun cu ricibi lo ta satisfecho, y esun cu ta duna lo ser bendiciona ricamente.—2 Cor. 9:11-14.

Pablo a conclui su carta referiendo na e generosidad di mas grandi di Jehova. El a skirbi: “Nos ta gradici Dios pa su regalo cu nos no por describi cu palabra.” (2 Cor. 9:15) E “regalo” cu nos ta haya di Jehova ta inclui tur e cosnan bon cu e ta duna nos pa medio di Hesucristo. E regalo ey ta asina maraviyoso cu nos no tin palabra pa describi su balor.

Con nos por mustra aprecio pa tur loke Jehova y su Yiu a haci y lo bay haci pa nos? Nos por uza nos tempo, energia y recursonan na un manera generoso pa apoya adoracion berdadero, sea esey ta poco of hopi.—1 Cro. 22:14; 29:3-5; Luc. 21:1-4.

Maneranan Cu Algun Hende Ta Contribui na e Obra Mundial

Mescos cu den tempo di apostel Pablo, awe tambe hopi hende ta “pone algo un banda”, of hinca un suma den nan budget, pa e obra mundial y nan ta pone esaki den e cahanan di contribucion di nan congregacion. (1 Cor. 16:2) Tur luna, congregacionnan ta manda e contribucionnan aki pa e sucursal di testigonan di Jehova cu ta supervisa e obra den nan pais. Tambe bo por manda bo donacion directamente na e entidad legal cu testigonan di Jehova ta uza den bo pais. Si bo kier sa e nomber exacto di e entidad ey, bo por tuma contacto cu sucursal. Bo ta haya e adres di sucursal na www.jw.org/jw-paa. E tipo di donacionnan cu bo por manda directamente ta lo siguiente:

DONACION INCONDICIONAL

Donacion via online banking, debit card of credit card. Na algun sucursal ta posibel pa hasta uza jw.org of otro website indica pa haci esey.
Donacion di placa, joyas of otro cos di balor. Mester inclui un carta breve cu ta bisa cu e placa of e articulonan ta un donacion incondicional.

DONACION CONDICIONAL

Por haci donacion di placa bou di e condicion cu e donador por haya e placa bek si e mester di dje.
Mester inclui un carta cu ta bisa cu e donacion ta condicional.

DONACION PLANIA

Fuera di regalo incondicional di placa y di articulonan personal di balor, tin varios alternativa pa contribui na e obra mundial di Reino. Akibou ta sigui un lista. Si bo ta desea di haci uzo di un di nan, sea asina bon di consulta cu e sucursal cu ta atende bo pais pa haci sigur cua di e posibilidadnan tin. Como cu rekisitonan legal y leynan fiscal (di belasting) ta varia di pais pa pais, ta importante pa bo busca conseho huridico y fiscal prome cu bo scoge e metodo cu mas ta cumbini bo.

Seguro: Por nombra un entidad legal di testigonan di Jehova como e beneficiario di un seguro di bida of di un areglo di pensioen.

Cuenta di Banco: Por pone cuenta bancario, certificado di deposito of cuenta di pensioen personal den forma di un trust fund of stipula cu ta paga e suma cu tin den nan, conforme rekisitonan bancario local, na un entidad legal di testigonan di Jehova ora e doño fayece.

Accion y Bono: Por haci donacion di accion y bono na un entidad legal di testigonan di Jehova. Esey por ta un regalo incondicional of un acuerdo cu ta indica cu ta traspasa nan pa e entidad ora e doño fayece.

Propiedad: Por haci donacion di propiedad cu por ser bendi na un entidad legal di testigonan di Jehova, y eventualmente por stipula cu e donador por keda biba aden tanten cu e ta na bida.

Donacion di Rente of Pensioen Vitalicio (Lijfrente): Aki ta trata di un acuerdo caminda ta haci donacion di placa of papelnan di balor na un entidad legal di testigonan di Jehova y, a cambio, e donador ta ricibi un pago anual pa resto di su bida (vitalicio). Den algun pais, e areglo aki tin beneficio di belasting pa e donador.

Testament y Trust Fund: Via un testament legal of un areglo di trust fund por laga propiedad of placa pa un entidad legal di testigonan di Jehova. E areglo aki por duna cierto beneficio di belasting pa e donador.

Pa haci uzo di e ultimo posibilidadnan aki, e donador normalmente mester plania esey. Pa yuda personanan cu kier sostene e obra mundial di testigonan di Jehova, sucursal a prepara algun informacion. Despues cu bo repasa e informacion aki, lo ta sabi pa bo busca conseho huridico y fiscal. Hopi hende cu a plania cuidadosamente pa haci e tipo di donacionnan aki a logra apoya nos actividadnan religioso y humanitario cu ta tuma luga rond mundo, y alabes nan a haya maximo beneficio di belasting.

Pa mas informacion, bo por tuma contacto cu sucursal di testigonan di Jehova.