Con un Curso di Bijbel cu Testigonan di Jehova Ta Bay?
E curso di Bijbel cu testigonan di Jehova ta ofrece ta yuda hende haya sa loke Bijbel ta siña. E curso di Bijbel aki por yuda bo:
Haya felicidad den bida
Bira amigo di Dios
Siña loke Bijbel ta priminti pa futuro
Riba e pagina aki bo por haya sa:
Si mi acepta un curso di Bijbel, mi mester bira un testigo di Jehova?
Si mi a yega di studia Bijbel cu testigonan di Jehova den pasado, mi por cuminsa studia atrobe?
Con un curso di Bijbel ta bay?
Na un manera interactivo, un maestro lo yuda bo siña conoce Bijbel mihor. Lo uza e publicacion “Bo Por Disfruta di Bida pa Semper!” E publicacion aki ta contene varios topico cu ta splica bo kico Bijbel ta siña y con Bijbel por yuda abo. Pa haya sa mas, wak e siguiente video.
Mi mester paga pa e curso?
No. Nos ta sigui e instruccion cu Hesus a duna su discipelnan: “Boso a ricibi pornada, duna pornada.” (Mateo 10:8) Nos maestronan no ta ricibi pago. Ademas, nos no ta cobra pa Bijbel ni pa e publicacion “Bo Por Disfruta di Bida pa Semper!”
Con largo e curso ta dura?
E curso completo ta consisti di 60 les. Abo mes ta dicidi na ki ritmo bo kier pasa den nan. Hopi studiante ta gusta pa haci un of mas les pa siman.
Kico mi tin cu haci pa cuminsa?
1. Yena e formulario cu tin online. Nos lo uza bo informacion personal solamente pa tuma contacto cu bo.
2. Un maestro lo tuma contacto cu bo. E maestro lo splica bo con e curso di Bijbel interactivo ta bay, y lo e contesta cualkier pregunta cu bo por tin.
3. Palabra cu e maestro ki dia y ki ora bo por studia. E maestro por bin cerca bo, sea na bo cas of otro luga, pa studia cu bo. E curso por bay tambe via telefon, yamada di video, via post of e-mail. Normalmente, un les ta dura mas o menos un ora, pero e por dura mas cortico of mas largo tambe. Ta depende di e tempo cu abo tin disponibel.
Mi por wak prome con un curso di Bijbel ta bay?
Si. Bo por yena e formulario online. Ora un maestro tuma contacto cu bo, bo por bis’e cu bo kier djis wak con un curso di Bijbel ta bay prome cu bo tuma un decision. E maestro, sea hende homber of muher, lo trata e prome tres lesnan di e curso for di e foyeto Bo Por Disfruta di Bida pa Semper! pa bo por haya un idea con e curso ta bay.
Si mi acepta e curso di Bijbel aki, mi mester bira un testigo di Jehova?
No. Testigonan di Jehova gusta siña hende tocante Bijbel, pero nunca nos lo no forsa niun hende pa nan bira testigo di Jehova. Nos ta djis mustra hende loke Bijbel ta bisa, y nos ta respeta cada ken su derecho pa dicidi pa su mes loke e kier kere.—1 Pedro 3:15.
Mi por uza mi mes Bijbel?
Si. Bo por uza e Bijbel cu bo ta desea. Nos ta gusta uza E Tradukshon di Mundu Nobo di e Santu Skritura, cu ta un Bijbel exacto y facil pa compronde, pero hopi hende ta prefera di uza un Bijbel cu nan ta custumbra cu ne. Nos ta compronde esey.
Mi por invita otro hende pa join mi den e curso di Bijbel?
Si. Henter bo famia por participa. Bo por hasta invita amigonan pa join.
Si mi a yega di studia Bijbel cu testigonan di Jehova den pasado, mi por cuminsa studia atrobe?
Si. Kisas, lo bo disfruta mas di e curso di Bijbel aki, pasobra el a ser adapta na e necesidadnan di hende den nos tempo. Compara cu e curso di Bijbel di antes, e curso aki ta haci mas uzo di plachi y video, y ta mas interactivo.
Mi por studia Bijbel sin un maestro?
Si. Nos tin cu bisa si cu mayoria di studiante ta haya cu nan ta siña mas cu yudansa di un maestro. Pero nos ta compronde ora un persona ta prefera di studia Bijbel riba su mes prome. Riba nos pagina “Material pa Studia Bijbel”, tin un lista di publicacion cu por yuda bo den bo estudio di Bijbel. Ata aki algun informacion cu lo por yuda bo:
Video Basa Riba Bijbel. E videonan cortico aki ta uza Bijbel pa contesta pregunta importante.
Pregunta Cu Bijbel Ta Contesta. Haya contesta cu Bijbel ta duna tocante varios topico.
Splicacion di Texto di Bijbel. Haya splicacion di texto di Bijbel y di frase den Bijbel cu hende sa uza hopi.