E Punto di Bista Biblico

Cristiannan Por Participa den e Festividadnan di Aña Nobo?

“RIBA e merdia di bispo di Aña Nobo ta reina un trankilidad inusual”, segun Fernando, un docter na Brasil. “Anto rond di 11 or djanochi, nan ta cuminsa yega: un fluho constante di pashent cu herida di cuchiu of di bala, tienernan lesiona den accidente di trafico y esposanan maltrata. Casi semper alcohol ta un factor.”

Tumando na cuenta loke ta ser cita ariba, no ta un sorpresa cu un corant di Brasil a yama e prome dia di aña, dia internacional di hende wayaba. Un agencia di noticia Europeo ta bisa cu ‘Aña Nobo ta pa e persona cu de bes en cuando kier biba solamente pa placer y satisfaccion propio’, y a agrega cu esei ta “un ‘round’ mas den e bataya eterno di hende contra alcohol.”

Ta cierto cu no ta tur hende ta celebra Aña Nobo door di bebe di mas y comete actonan di violencia. De echo, hopi hende tin dushi recuerdo di e ocasion. Fernando, cita ariba, ta bisa: “Como mucha, nos tawata ansioso pa bispo di Aña Nobo yega. Semper tawatin hopi wega pa hunga, cuminda y co’i bebe. Ora 12 or bati, nos tawata brasa otro y duna otro sunchi y desea otro ‘Bon Aña!’”

Asina tambe hopi hende awe ta haya cu nan ta celebra e festividadnan di Aña Nobo sin haci di mas. Pero toch, ta bon pa Cristiannan examina e origen y nificacion di e celebracion popular aki. E festividadnan di Aña Nobo ta na conflicto cu loke Bijbel ta siña?

Echonan di Pasado

E festividadnan di Aña Nobo no ta nobo. Inscripcionnan antiguo ta indica cu 3.000 aña prome cu Cristo, nan tawata celebra e festividadnan ei den Babilonia. E celebracion ei, cu nan tawata tene meimei di mart, tawata uno crucial. Segun The World Book Encyclopedia: “Na e tempo ei e dios Marduk a dicidi e destino di e pais pa e aña benidero.” Babilonia su celebracion di aña nobo tawata dura 11 dia y a inclui sacrificio, procesion y ritonan di fertilidad.

Pa un tempo, e Romanonan tambe a cuminsa nan aña den luna di mart. Pero na aña 46 prome cu Era Comun, Emperador Julio Cesar a decreta cu aña nobo mester cuminsa dia prome di januari. E dia ei tawata dedica caba na Jano, e dios di principionan, y awor lo el a marca tambe e prome dia di e aña Romano. E fecha a cambia, pero e ambiente carnavalesco a keda. E Cyclopedia di McClintock y Strong ta bisa cu riba prome di januari, hende “tawata entrega nan mes na excesonan desenfrena y na varios clase di supersticion pagano.”

Te awe ritualnan supersticioso ta hunga un papel den festividadnan di Aña Nobo. Por ehempel, den algun area di Sur America, hopi hende ta ricibi Aña Nobo para riba nan pia drechi. Otronan ta toca fluit y tira clapchi. Segun un custumber Checo, bispo di Aña Nobo ta ora pa come sopi di lenteha (bonchi). Mientras cu como un tradicion Slovaco, hende ta pone placa of scama di pisca bou di paña di mesa. E ritualnan ei, special pa core cu fuku (mala suerte) y garantisa prosperidad, no ta nada mas cu un continuacion di e creencia antiguo cu cambio di aña ta un tempo pa dicidi destino.

E Punto di Bista Biblico

Bijbel ta spierta Cristiannan pa “comporta nan mes decentemente . . . , no den parandiamento y den buracheria.”a (Romanonan 13:12-14; Galationan 5:19-21; 1 Pedro 4:3) Ya cu hopi bes festividadnan di Aña Nobo ta ser caracterisa pa net e excesonan cu Bijbel ta condena, Cristiannan no ta participa den nan. Esaki no kier men cu Cristiannan ta kibrado di fiesta. Al contrario, nan sa cu varios bes Bijbel ta bisa adoradonan di e Dios berdadero pa alegra, y pa nan haci esei pa varios motibo. (Deuteronomio 26:10, 11; Salmo 32:11; Proverbionan 5:15-19; Eclesiastes 3:22; 11:9) Tambe Bijbel ta reconoce cu hopi bes cuminda y bebida ta compaña ocasionnan gososo.—Salmo 104:15; Eclesiastes 9:7a.

Sinembargo, manera nos a mira, celebracion di Aña Nobo tin su raiz den custumbernan pagano. Adoracion falso ta impuro y detestabel den bista di Yehova Dios, y Cristiannan ta rechasa practicanan cu tin tal origen. (Deuteronomio 18:9-12; Ezekiel 22:3, 4) Apostel Pablo a skirbi: “Ki compañerismo husticia tin cu inhusticia, y ki comunion lus tin cu scuridad? Of ki harmonia Cristo tin cu Belial?” Cu bon motibo anto Pablo a agrega: “No mishi cu loke ta impuro.”—2 Corintionan 6:14-17a.

Tambe Cristiannan ta realisa cu si nan participa den ritualnan supersticioso, esei no ta garantisa felicidad ni prosperidad; specialmente door cu nan lo ricibi Dios su desaprobacion pasobra nan a participa den tal festividadnan. (Eclesiastes 9:11; Isaias 65:11, 12) Ademas, Bijbel ta spierta Cristiannan pa ta modera y pa comporta nan mes cu dominio propio. (1 Timoteo 3:2, 11) Pues ta obvio cu lo no ta apropiado pa un hende cu ta bisa cu e ta sigui e siñansanan di Cristo, participa den un celebracion cu ta ser caracterisa pa excesonan desenfrena.

Pa atractivo y dushi cu e festividadnan di Aña Nobo por ta, Bijbel ta bisa nos pa “no mishi cu loke ta impuro” y pa “purifica nos mes di tur impuresa di carni y spirito.” Na esnan cu cumpli cu esei, Yehova ta extende e garantia conmovedor aki: “Lo Mi ricibi boso. . . . Lo Mi ta un Tata pa boso, y boso lo ta yiu hombernan y yiu mohenan pa mi.” (2 Corintionan 6:17b–7:1) Si, Yehova ta priminti bendicion y prosperidad eterno na esnan cu ta leal na e.—Salmo 37:18, 28; Revelacion 21:3, 4, 7.

[Nota]