E Punto di Bista Biblico

Remordimento Semper Ta Malo?

A WENDIA hopi hende ta haya cu no ta bon pa bo sinti remordimento. Nan ta pensa mescos cu Friedrich Nietzsche, un filosofo Aleman cu a bisa: “Remordimento ta e piyo malesa cu a yega di plaga humanidad.”

Pero awor tin expertonan cu ta yegando na un conclusion diferente. Dr. Susan Forward, un terapista y autora reconoci internacionalmente, ta bisa: “Pa un hende por ta responsabel y cu sintimento, remordimento ta esencial. E ta un medio cu bo consenshi ta uza pa guia bo.” Wel anto, semper remordimento ta malo? Por tin sircunstancia den cua remordimento por yuda cu algo?

Kico Ta Remordimento?

Remordimento ta e sintimento cu ta lanta ora nos realisa cu nos a hurt un hende cu nos ta stima, of ora cu den cualkier otro manera nos keda sin cumpli cu normanan cu nos kier cumpli cu ne den bida. Un obra di referencia ta splic’e asin’aki: “[Remordimento tin di aber cu] un sintimento di cu nos debe algo door cu nos ta culpabel di un fayo, un ofensa, un crimen of un pica.”

Den e Scritura Hebreo, e termino culpa ta ser uza ora un Israelita keda sin cumpli cu e Lei di Dios. Mayoria biaha cu Bijbel ta menciona culpa bo ta hay’e den e bukinan di Levitico y Numbernan. Ta interesante pa nota cu casi e palabra culpa no ta aparece mes den e Scritura Griego Cristian. Pero e par di biahanan cu si e ta aparece, ei tambe e tin di aber cu picanan serio contra Dios.—Marco 3:29; 1 Corintionan 11:27.

Lamentablemente por sosode cu nos ta sinti remordimento sin cu nos ta realmente culpabel. Por ehempel, si un hende ta perfeccionista y tin e tendencia di exigi mucho di su mes, cada bes cu e faya den su mes bista, remordimento por lanta sin cu ta na nodi. (Eclesiastes 7:16) Tambe nos lo por laga remordimento corecto pa un fayo of un fout bira mas y mas fuerte, duna nos un sintimento di berguensa y pone cu nos ta castiga nos mes innecesariamente. Wel, con remordimento por ta di beneficio pa nos anto?

Remordimento Por Ta Bon

Tin por lo menos tres manera cu remordimento por ta beneficioso. Di prome, remordimento ta indica cu nos ta conciente di kico ta aceptabel y kico no. E ta mustra cu nos consenshi ta traha. (Romanonan 2:15) De echo, un buki publica door di Asociacion Mericano di Psikiatra ta considera cu un hende sin remordimento por ta peligroso pa sociedad. Hende cu consenshi corumpi of morto tin dificultad pa mira e diferencia entre bon y malo, y esei por ta peligroso.—Tito 1:15, 16.

Di dos, remordimento di consenshi por yuda nos evita di haci cos indeseabel. Mescos cu dolo fisico ta spierta nos tocante un posibel problema cu nos salu, e dolo emocional di remordimento ta spierta nos cu tin un problema moral of spiritual cu nos mester atende. Ora nos bira conciente di e debilidad, tin mas chens cu den futuro nos lo evita di bolbe haci nos mes of nos stimanan daño.—Mateo 7:12.

I finalmente, un confesion por yuda tanto esun culpabel como e victima. Por ehempel, Rei David a sinti un agonia emocional intenso debi na e culpa cu el a carga. El a skirbi: “Mientras cu mi a keda keto, mi curpa a para caba na nada door di mi kehamento henter dia.” Pero ora cu porfin el a confesa su pica na Dios, David a canta cu alegria: “Bo ta rondona mi cu cantica di liberacion.” (Salmo 32:3, 7) Ora esun culpabel confesa, asta e victima por sintie miho, pasobra esei por duna e victima siguransa di cu e persona ei ta stim’e, y cu e ta sinti duele cu el a pone e victima pasa den tanto dolo.—2 Samuel 11:2-15.

Un Punto di Bista Balansa Tocante Remordimento

Pa nos por tin un punto di bista balansa tocante remordimento, laga nos examina e diferencia skerpi cu tin den e manera cu Hesus di un banda, y e Farizeonan di otro banda, a pensa tocante pecadonan y pica. Na Lucas 7:36-50 nos ta lesa tocante un hende mohe inmoral cu a drenta cas di un Farizeo caminda Hesus tawata comiendo. El a bai cerca Hesus, laba Hesus su pia cu su lagrimanan, y perfuma nan cu azeta costoso.

E Farizeo husto den su mes bista a menosprecia e mohe aki. E no a consider’e digno di su tempo y atencion. El a bisa den su mes: “Si e homber aki [Hesus] tawata un profeta e lo tawata sa ta ken y ki sorto di hende e mohe aki ta cu ta mishi cu ne, cu ta un pecador e ta.” (Lucas 7:39) Hesus a corigi su manera di pensa mesora. Hesus a bis’e: “Abo no a hunta mi cabes cu azeta, ma el a hunta mi pianan cu perfume. Pesei mi ta bisa bo, su picanan, cu ta hopi, a wordo pordona, pasobra el a stima hopi.” Sin duda e palabranan bondadoso aki a anima e señora y alivia su curason.—Lucas 7:46, 47.

Di ningun manera Hesus no a keda sin condena inmoralidad. Mas bien el a siña e Farizeo orguyoso ei cu amor ta e miho motivacion pa sirbi Dios. (Mateo 22:36-40) Claro cu tawata na su luga pa e señora sintie culpabel pa su pasado inmoral. Ta bisto cu el a repenti, pasobra el a yora, e no a purba hustifica su conducta di antes, y el a dal paso pa honra Hesus publicamente. Mirando tur esei, Hesus a bis’e: “Bo fe a salba bo; bai na pas.”—Lucas 7:50.

Pero e Farizeo si a sigui mira e señora como un pecador despreciabel. Kisas e tawata purba laga e señora sintie malo dilanti Dios pa loke el a haci y lag’e sinti berguensa. Pero no ta amoroso pa constantemente nos purba laga hende sinti nan culpabel ora nan no haci un cos manera nos ta haya ta bon. Ademas, cu tempo e proceder ei por asta stroba e persona di haci e cambionan desea. (2 Corintionan 9:7) Loke ta duna e miho resultado ta di imita Hesus, esta: pone un bon ehempel, elogia hende sinceramente y mustra confiansa den nan, aunke tin bes cu reprendemento y conseho ta necesario.—Mateo 11:28-30; Romanonan 12:10; Efesionan 4:29.

Pues, remordimento por ta bon y asta necesario ora nos haci algo malo. Proverbionan 14:9 (Traduccion Knox) ta bisa: “Hende bobo ta minimisa culpa cu ta exigi expiacion.” Un consenshi molestia por pone nos confesa y dal otro pasonan concreto pa remedia e situacion, y nos mester duna oido na nos consenshi tambe. Toch, nos motivacion principal pa sirbi Yehova no mester ta remordimento sino amor. (Job 1:9-11; 2:4, 5) Bijbel ta sigura nos cu ora bon hende ser curasha y refresca a base di amor, nan lo haci tur loke nan por. Mas importante ainda, nan lo hacie cu goso.