Diabel un Malbado Cu Ta Existi?

DEN hopi circulo religioso, hende a cuminsa mira Diabel basicamente como un relikia supersticioso, un invento di hende. So Dionigi Tettamanzi, arsobispo di Genova—un di Italia su cardinalnan di mas importante—a lanta un conmocion cu su carta pastoral di 40 pagina, cu a mustra con pa lucha contra Diabel. E ta menciona “10 mandamento.”

E Prome: “No lubida cu diabel ta existi”, pasobra su “prome mentira” ta pa “haci nos kere cu e no ta existi.”

Di Dos: “No lubida cu diabel ta un tentado. . . . No pensa cu bo ta immuun of cu bo no ta vulnerable.”

Di Tres: “No lubida cu diabel ta masha inteligente y astuto. E ta sigui seduci hende, manera el a haci cu e prome homber.”

Di Cuater: “Sea vigilante: tanto cu wowo y curason. Sea fuerte: den spirito y birtud.”

Di Cinco: “Kere firmemente den e victoria di Cristo riba e tentado” pasobra esaki “lo haci bo sinti bo sigur y trankil asta dilanti e atake mas violento cu lo por bin riba bo.”

Di Seis: “Corda cu Cristo ta haci bo participa den su victoria.”

Di Shete: “Sigui scucha e Palabra di Dios.”

Di Ocho: “Sea humilde y dispuesto pa acepta humiliacion.”

Di Nuebe: “Semper haci oracion, anto sin cansa”, pa asina bo por vence tentacion.

Di Dies: “Stima Señor bo Dios y adora e so.”

Ki efecto e carta oficial aki dirigi na e cleronan tawatin? E Centro di Estudionan Teologico di Milan no a gusta su conseho. E Centro a argumenta cu tal “informacion teologico ta parce pensamento di Edad Medio.” Segun un bosero, “culpa diabel pa tur cos por yuda absolve hende di nan [propio] responsabilidad.”

Maske Bijbel no ta absolve hende di e responsabilidad pa nan accionnan, e ta identifica Satanas e Diabel masha cla como “e dios di e mundo aki”, esun cu a tenta Hesus. Tambe Bijbel ta revela e poder di Satanas y su intencion di “ciega mente di esnan cu no ta kere.”—2 Corintionan 4:4; Mateo 4:1-11.

Si, manera apostel Pedro a skirbi, Satanas ta “un leon cu ta gruña, buscando ken e por devora.” (1 Pedro 5:8) No ta nada straño anto cu apostel Huan a recorda esnan creyente: “Henter mundo ta bou di control di e malbado.” (1 Huan 5:19) Nos ta sabi si nos tene cuenta cu e spiertamentonan biblico aki.