Cuida Bo Hofi Cuida Bo Hofi Uzando e Metodo Organico

COHE un poco tera di bo hofi den bo man. E ta asina satura cu pesticida contra yerba, insecto, djaca cu raton y beskem cu ta parce cu casi e no tin bida den dje? Of e ta yen di bichi di tera, insecto y tur sorto di organismo hopi chikito? Si bo tera ta yen di bida, probablemente bo ta aplicando sea concientemente of inconcientemente e principionan di cuida hofi uzando e metodo organico.

Cuida un hofi uzando e metodo organico hopi bes ta encera mehora e calidad di tera di e hofi uzando substancianan biologico natural. Un di e metanan ta pa desaroya un sistema ecologico den cua matanan ta bira suficientemente fuerte pa resisti pest y malesa. Den paisnan caminda ta masha normal pa uza kimiconan sintetico den hofi, hende a cuminsa haya mas interes den cuida nan hofi uzando e metodo organico. Dicon? Tin varios motibo.

E prome motibo ta cu pesticida cu keda riba fruta cu berdura a yega di causa problema serio pa salu. Por ehempel, e buki Pesticide Alert a informa cu “den e zomer di 1985, casi 1.000 persona di varios estado West [di Merca] y Canada a venena door di resto di e pesticida Temik cu a keda riba patia.”

Ademas hopi hende ta considera e metodo organico di cuida hofi como un manera di proteha e medio ambiente. Despues cu hende a uza pesticida kimico bes tras bes algun pest a bira immuun, pesei cientificonan a traha venenonan cu ta extra peligroso. E kimiconan potente aki a drenta tera y a contamina nos suministro balioso di awa.

Un otro bentaha di cuida un hofi segun e metodo organico ta cu hende tin cu tira menos sushi na dump. Con esei ta posibel? Resto di cuminda y sushi di cura ta forma un gran parti di nos sushi cu tin cu bai dump. En bes di benta nan afo, por acumula e elementonan organico aki un caminda y laga nan putri. Como resultado bo ta haya un mescla cu nan ta yama compost. Kisas esei no ta un cos agradabel pa pensa ariba, pero esaki ta loke e mata ta gusta!

Por ultimo, tin hende ta considera e metodo ei di traha den hofi como un oportunidad pa haci ehercicio, disfruta di solo, traha cu e tera y mira simiña chikito crece bira mata saludabel. E forma aki di cuida bo hofi ta atrae bo? Si ta asina, laga nos cuminsa! Prome, nos lo bai wak ki sorto di tera abo tin den bo hofi.

Con Ta Bai cu Bo Hofi?

Hopi hofi ta consisti sea di tera di klei of di santo. Door cu tera di santo ta consisti di piedranan chikitico, e ta laga awa y vitamina pasa bai mucho lihe, y e reisnan no por beneficia di esakinan. Di otro banda, tera di klei ta consisti di capanan fini cu ta asina gepak riba otro cu e awa no por penetra den e tera duro y, ta pasa bai. Of, e ta drenta e tera y ta keda para na e mesun caminda, anto di e manera ei sofoca reis di e mata.

Reis di mata gusta masha ora e tera tin net e combinacion di tera cu ta retene suficiente humedad pa e reisnan no seca mientras cu e awa cu ta di mas ta pasa bai. Hende cu ta traha den hofi ta yama e mescla aki leem. Aire ta circula door di e tipo di tera aki di tal manera cu microorganismonan por haci nan trabou di agrega substancianan nutritivo na e tera.

Pa logra un bon balansa, mester agrega un gran cantidad di materia organico—compost—tanto na tera di klei como na tera di santo. Si bo bruha compost den tera cu un shovel, e ta drecha e estado di e tera. Ya cu e ta retene humedad mescos cu spons, no ta necesario pa muh’e hopi. Compost ta consisti di miyones di bacteria util cu lo yuda e sushi sigui putri. E proceso aki ta comberti e sushi den substancianan nutritivo cu e mata tin hopi mester di dje pa e sigui crece y bira fuerte. Tambe compost ta yuda balansa e tera pa e no ta ni mucho zuur ni mucho salo.

Ta bon pa planta mata manera alfalfa y claver door cu nan reisnan ta bai hundo den tera y nan ta cubri un superficie grandi. Asina nan ta los e tera y aumenta substancia organico. Tambe ta util pa pone un capa di yerba corta of sas di palo riba e tera pa cambia su composicion.

E asombroso bichi di tera ta hunga un papel excelente den drecha e tera di bo hofi. Segun cu bichi di tera ta traha tunnel cu por bai te 4 meter hundo den tera, nan ta ara tera y ta trece varios mineral ariba y mehora e fluho di awa. Durante e proceso aki tambe nan ta laga nan sushi atras cu, segun e buki Step by Step Organic Vegetable Gardening, ta “cinco bes mas rico na nitrogeno, fosfor y potasio [compara] cu e tera cu tin rond di dje.”

Amigonan di Bo Hofi: Sapo, Parha y Insecto

Kisas bo ta puntra: ‘Kico mi por haci tocante e pest cu tin den mi hofi? Con mi por libra di nan sin uza pesticida?’ No lubida cu pesticida no ta mata pest indeseabel so. Tambe e ta elimina organismonan util manera bichi di tera y beskem. Corda tambe cu sapo ta beneficioso pa hofi. Den tres luna un sapo por come mas cu 10.000 insecto di pest. Loke sapo haya den su caminda, e ta come. E ta come enemigonan di mata, insectonan manera criki y squash bug, tambe diferente sorto di bichi manera spinners, legerworm y plakker, y tambe cocolishi.

Parha tambe ta yuda tene pest den hofi bou di control. Segun e buki Gardening Without Poisons (Cuida Bo Hofi sin Uza Veneno), un atardi den zomer hende a yega di mira e parha cu yama winterkoning hiba un total di 500 haraña y bichi pa su yiuchinan come. Si bo kier invita algun winterkoning of otro parha cu ta come insecto pa bin den bo hofi, colga un poco cuminda di parha of material pa traha neishi na un luga cu nan por mir’e facilmente. Pronto lo bo ripara cu nan a acepta bo “invitacion”! Kico di e insectonan? Tin hopi insecto util den bo hofi cu ta come esnan destructivo. Si bo cumpra tor cu yama lieveheersbeestje y laga nan bai den bo hofi, mesora nan lo busca nan cuminda faborito: pispis. Tambe bo por cumpra webo di bidsprinkhaan pone den bo hofi. Ora e webonan kibra, e bidsprinkhaannan lo caba cu tur insecto cu tribi di pasa den nan caminda.

Mata y Pest Control

Bo por uza cierto tipo di mata pa domina pest den bo hofi. Planta mata cu pest di hofi no gusta, banda di e matanan cu mester di proteccion. Por ehempel, nematodo un tipo di bichi cu ta ataca e reis di varios mata y ta debilita nan, ta keda leu di afrikaantje. Anto klein koolwitje (barbulet) no gusta bai banda di col ora rozemarijn, sage, of tijm ta planta banda di dje. Pero tene cuenta si cu tin mata ta atrae pest den bo hofi.

Un bon metodo pa preveni pest y malesa ta door di remplasa e matanan pa otronan. En bes di planta e mesun tipo di mata na e mesun luga aña aden aña afo, kisas lo bo kier cambia nan luga den bo hofi. Di e forma ei bo ta kibra e ciclo di malesa y pest.

Cuida bo hofi uzando e metodo organico por ta un desafio cu ta rekeri tempo y pasenshi. Por dura algun luna prome cu bo hofi bira saludabel mediante e metodo organico. Kisas bo ta haya bo cu contratiempo. Ora esaki sosode, lo bo sinti bo tenta pa uza producto kimico. Sinembargo prome cu bo haci esei, para un rato y pensa riba e beneficionan di largo alcanse cu lo bo ricibi si bo keda sin uza kimico venenoso. Pues si bo tin pasenshi, lo no dura hopi cu via e metodo organico bo hofi lo produci berdura sabroso, anto cu menos chens di haya problema cu pest y malesa. No, bo hofi lo no ta perfecto, pero lo bo keda contento cu e resultadonan. Pues si bo ta gusta traha den hofi, pakico bo no ta purba di sembra den bo hofi uzando e metodo organico?

[Plachi na pagina 17]

Tera di klei

[Plachi na pagina 17]

Tera di santo

[Plachi na pagina 17]

Leem

[Plachi na pagina 18]

Amigonan di bo hofi

Den tres luna un sapo por come mas cu 10.000 insecto di pest

Un atardi den zomer hende a yega di mira e parha cu yama winterkoning hiba un total di 500 haraña y bichi pa su yiuchinan come

Bichi di tera ta traha tunnel den e tera y trece varios mineral ariba

Cuminda faborito di lieveheersbeestje ta pispis, un insecto destructivo

[Plachi na pagina 18]

Si bo bruha compost den tera cu un shovel, e ta drecha e estado di e tera