Hobennan Sa Puntra . . .

Con Mi Por Predica na Mi Compañeronan di Scol?

“Ora mi tawata predica riba caya diripiente mi a topa un hende cu mi conoce. Mi a keda paralisa! E persona cu mi tawata traha cu ne mester a sigui papia pa mi.”—Alberto.

“Mi tawata sa cu un mucha den mi klas tawata biba den e caya aki, pesei mi a laga mi ruman homber papia na tur e casnan. Despues di un rato el a haya un tiki stress y a pidi mi pa papia na e siguiente cas. Mi a bati na porta, y—ai no—tawata net e! Mi tawatin hopi miedo!”—James.

MUCHA jong hopi bes no ta gusta pa bo papia cu nan tocante religion. Sinembargo, hobennan cu ta cristian berdadero ta aprecia e privilegio cu Dios a duna nan pa comparti nan fe cu otro hende. Pesei miles di hoben Testigo di Yehova ta participa den e trabou di predica di cas pa cas. Pero algun ta bai cu e temor cu nan lo por topa un hende cu nan conoce di scol. Jennifer ta bisa: “Te ainda mi ta bira nervioso ora mi topa un hende cu mi a bai scol cu ne.” Anto e ta sintie asina maske ta basta aña pasa el a caba scol secundario.

Si bo ta un hoben cristian, kisas lo bo sa sinti e mesun cos de bes en cuando. Naturalmente, nos tur tin miedo di haya un rechaso. Pues ta masha normal pa sinti bo un tiki nervioso ora bo tin cu papia tocante religion cu un mucha di scol.a Pero no tin motibo pa bo laga miedo domina bo. Bo ta corda un homber den Bijbel cu yama “Hose di Arimatea”? El a kere loke Hesus a siñ’e. Sinembargo, Bijbel ta describi Hose como “un disipel di Hesus, ma na secreto pa miedo di e Hudiunan.” (Huan 19:38) Awor, con abo lo sinti bo si bo tin un amigo cu kier tene boso amistad secreto? (Lucas 12:8, 9) Kiermen, no ta nada straño cu Dios ta spera pa cristiannan haci “declaracion publico” di nan fe. (Romanonan 10:10, NW) Esei ta inclui papia cu e muchanan di bo scol.

Hose di Arimatea a vence su miedo, por lo menos te na e grado cu el a busca autorisacion pa dera Hesus. Con abo por vence bo miedo?

Desaroya un Anhelo pa Predica

Apostel Pablo no tawata timido pa papia cu otro hende tocante su fe. Na Romanonan 1:15, el a describi su mes como un persona cu tawata ansioso pa declara e mensahe di Bijbel. Dicon e tawata asina ansioso? Manera e ta bisa na versiculo16: “Pasobra mi no tin berguensa di e evangelio, pasobra esaki ta e poder di Dios pa salbacion pa tur cu ta kere.” Kico di abo? Realmente bo a comproba pa bo mes kico ta e berdad? (Romanonan 12:2) Bo ta personalmente combenci cu e mensahe di Bijbel ta “e poder di Dios pa salbacion”?

Djis bai reunion cristian cu bo mayornan no ta suficiente. Un hoben cu yama Deborah a bisa: “Ta facil pa bo djis bai reunion pasobra bo mayornan ta manda bo. Pero ora hende tawata haci mi pregunta tocante Bijbel, mi no tawata sa con pa mi contesta nan.” Un hoben cu yama Mi Young tambe ta admiti: “Nos tin cu combence nos mes cu esaki ta e berdad.”

Kico por anima bo pa comparti bo conocemento di Bijbel cu otronan? Un studio personal di Bijbel. Un hoben cu yama Sean a bisa: “Ora bo mes cuminsa haci bo studio personal di Bijbel, bo ta cuminsa haci e berdad di bo mes. Bo ta studiando pa bo mes.” Ta berdad cu no ta tur hende ta gusta studia di naturalesa. Shevon ta reconoce: “Mi no gusta lesa. Pesei na principio tawata duro pa mi lesa E Toren di Vigilancia cu Spierta! of lesa Bijbel tur dia. Ma cu tempo, mi a cuminsa hacie.”

Kico ta e resultadonan ora bo tin un studio diligente asina? Apostel Pablo a bisa: “Fe ta bin for di tendemento.” (Romanonan 10:17) Segun cu bo fe y conviccion ta crece, bo actitud lo cambia sigur. Un hoben Brasileño cu yama Elisângela a conclui: “Ta un honor pa ta un cristian, e no ta algo pa tene berguensa di dje.” Si, segun cu bo fe ta crece, lo bo sinti bo motiva pa papia cu otronan, entre otro, cu e muchanan di bo klas. Pablo a bisa: “Nos tambe ta kere, pesei nos tambe ta papia.” (2 Corintionan 4:13) Ademas, con lo bo por ta “inocente di e sanger” di otro hende si bo ta keda sin duna e conocemento cu ta duna bida na hobennan cu bo ta mira tur dia?—Echonan 20:26, 27.

Toch tin hoben cristian cu no ta sinti nan bon prepara pa papia cu otronan tocante Bijbel. Un hoben cu yama Joshua a bisa: “Si bo no sa kico pa bisa, no ta dushi pa predica.” Un biaha mas, un comprendemento mas profundo di Bijbel lo yuda bo maneh’e na un manera corecto. (2 Timoteo 2:15) Den congregacionnan di Testigonan di Yehova, hobennan por acerca e ancianonan di congregacion y pidi yudansa personal den desaroya e habilidad di siña. Un hoben di Alemania cu yama Matthias a bisa: “Ora cu realmente mi a cuminsa combersa cu hende y no djis ofrece literatura basa riba Bijbel, mi a cuminsa gusta e trabou di predica.”

I por ultimo, bo por pidi Dios den oracion pa E yuda bo papia cu curashi. (Echonan 4:29, NW) Apostel Pablo personalmente a experencia Dios su yudansa den e aspecto aki. Na 1 Tesalonicencenan 2:2, e ta bisa: “Den nos Dios nos tawatin e curashi di papia e evangelio di Dios cu boso meimei di hopi oposicion.” Segun un obra di referencia, por traduci e palabranan aki di e siguiente manera: “Dios a saca miedo for di nos curason.” Pues, pakico no pidi Dios den oracion pa E saca miedo for di bo curason?

Identifica Bo Mes

Na harmonia cu e oracion ei, bo por dal un paso cu ta exigi hopi curashi. Un hoben Britanico cu yama Chic ta conseha: “Bisa e muchanan di bo scol cu bo ta un cristian.” Sigur lo bo no kier ta un ‘disipel secreto.’ Un hoben cu yama Rebecca ta admiti cu un tempo e tawatin masha miedo di topa un hende cu e conoce, ora e ta predica. Pero e ta bisa cu el a descubri cu “si bo bisa nan cu bo ta un cristian y cu bo ta bai di cas pa cas, tin bes nan lo puntra bo: ‘Anto, ki dia lo bo bin na mi cas?’”

Pero pakico warda te ora boso topa otro pa casualidad? Busca oportunidad pa comparti bo fe na scol. Corda riba e preguntanan cu apostel Pablo a haci: “Con nan lo kere den esun, di kende nan no a tende? Y con nan lo tende sin un predicado?” (Romanonan 10:14) Abo ta den e miho posicion pa yuda e muchanan di bo klas pa scucha. Un hoben cu yama Iraida a bisa: “Scol ta un teritorio pa predica cu nos so por yega na dje.” Pesei hopi hoben ta probecha di nan situacion door di predica informalmente.

Tin bes un tarea di scol tambe por duna bo e oportunidad pa comparti e berdad di Bijbel. Un hobensita Britanico cu yama Jaimie a conta: “Nos tawata papia tocante evolucion den les di biologie, anto mi a bisa loke mi ta kere. Un di e mucha hombernan a haci bofon di mi y a bisa cu Testigonan di Yehova ta bobo y no ta merece di ta den e sistema escolar. Apesar di esei, mesora e otro muchanan den klas a cuminsa tuma parti pa mi.” Ta bisto cu Jaimie su reputacion como un cristian ehemplar a duna bon resultado. Jaimie a sigui bisa: “Como resultado, mi a haya oportunidad di laga un ehemplar di e buki Ta Existi un Creador Cu Ta Interesa den Bo? cu un mucha den mi klas.”b

Na Rumania un mucha mohe di 14 aña di edad cu yama Roxana ta relata un experencia similar: “Mi maestra a bisa cu nos klas ta bai papia tocante alcohol, tabaco y droga. Pesei mi a bai scol cu e ehemplar di Spierta! na Spaño di 22 maart 2000, cu a trata e topico ‘Con Bo Por Stop di Huma.’ Un mucha den mi klas a mira e revista, a coh’e, y no kier a duna mi e bek. Ora el a caba di les’e, el a bisa cu e ta determina pa stop di huma.”

No ta semper lo bo haya un reaccion faborabel asina. Pero Eclesiastes 11:6 ta conseha nos: “Sembra bo simiña mainta, y no keda sin haci nada atardi; pasobra bo no sa . . . [unda] lo tin exito.” Anto si bo no haya un reaccion faborabel, ora bo comparti bo creencianan na scol esei ta pone un fundeshi pa un combersacion mas agradabel den e trabou di predica di cas pa cas si a caso un dia bo topa un mucha di bo scol. Un hoben Britanico cu yama Jessica ta bisa: “Predica na muchanan di scol en realidad ta mas facil pasobra bo conoce nan caba.” Lo bo por keda sorprendi di con curioso algun di e muchanan di scol ta pa haya sa loke bo ta kere.

Ta berdad cu no ta tur lo ricibi bo di un manera amabel. Pero Hesus ta duna e conseho practico aki: “Ken cu keda sin ricibi boso, ni paga tino na boso palabranan, ora boso sali bai for di e cas ei . . . sagudi e stof kita for di boso pia.” (Mateo 10:14) Cu otro palabra, bo no mester tuma nan rechaso como algo personal. Bai trankil djei anto busca un otro hende cu ta mas dispuesto pa scucha. Tardi of tempran lo bo haya hende di curason honrado cu tin hamber pa e berdad y cu ta dispuesto pa scucha. Lo no ta un satisfaccion pa bo si un di nan ta un compañero di scol? Si ta asina, lo bo keda contento cu bo a vence bo miedo di comparti bo fe cu e muchanan di bo klas.

[Nota]

[Komentario na pagina 28]

“Ora bo mes cuminsa haci bo studio personal di Bijbel, bo ta cuminsa haci e berdad di bo mes.”—Sean.

[Plachi na pagina 26]

No tene miedo di identifica bo mes como un cristian

[Plachi na pagina 26]

Tareanan di scol hopi bes ta duna bo oportunidad pa comparti e berdad di Bijbel