Hobennan Sa Puntra . . .

Kico Mi Por Haci pa Ta Mas Atractivo?

“No tawata facil ni comodo pa combersa cu mucha mohe. Mi no tawatin ningun idea di kico nan ta pensa, con nan ta sinti, ni ki punto di bista nan tin di cierto cosnan.”—Tyler.

KI CUALIDAD mucha mohe ta gusta mas di mucha homber? “Confiansa”, un teenager cu yama Emily ta bisa. Robyn, un otro teenager, ta pensa cu un di e cualidadnan mas importante ta, cu e mester ta pret. Anto ki cualidad mucha homber ta busca mas den mucha mohe? Nada straño cu un encuesta a mustra cu beyesa a scor mas halto riba nan lista. Anto number seis riba nan lista ta cu e mucha mohe mester tin e mesun interesnan y normanan cu nan.

Frecuentemente bo ta haya articulonan y encuestanan cu ta trata e relacion entre mucha mohe cu mucha homber den revistanan cu ta dirigi na hobennan. Claramente, un cantidad di hoben ta pensa hopi, of asta ta precupa, tocante kico e sexo opuesto ta pensa di nan. Kisas abo mes tin bes sa worry tocante esei. Maske bo no ta cla pa casa pa aworaki, tur hende kier ta atractivo! Tyler ta remarca: “Ora bo ta teenager, bo kier ta atractivo pa tur hende. Bo kier pa otro mucha homber of mucha mohe di bo edad gusta bo.” Ademas, por ta bo ta sinti cu algun dia lo bo kier haya un bon hende pa casa cu ne. Ora e tempo ei yega, ta normal cu lo bo kier atrae e persona ei.

Pero como un hoben cristian, kisas bo no tawatin masha experencia den trata cu e sexo opuesto. Banda di esei, por ta bo ta sinti cu bo compañeronan ta pone presion riba bo pa bo ta fisicamente atractivo. Debi na e echo cu bo ta mira un cantidad di supermodelo y actornan yen di musculo na television y den revistanan, no ta nada straño cu bo ta sinti bo insigur y cu bo falta algo! Pues kico anto ta necesario pa otro hende por gusta bo—incluso esnan di sexo opuesto—den un manera saludabel, balansa y positivo?

E Bobedad di Anhela un Curpa “Perfecto”

William S. Pollack, psicologo clinico, ta remarca cu bou di influencia di e industria di entretenimento, hopi hoben “ta uza masha hopi tempo pa tene diet, hisa barbel y haci aerobics, tur esei pa nan logra transforma e size y forma di nan curpa.” Algun asta ta bai te na e extremo di keda sin come, pa por logra haya e curpa “perfecto” ei. Sinembargo, e Centro di Investigacion di Asuntonan Social ta bisa: “E norma di beyesa cu medionan di comunicacion ta presenta actualmente ta algo cu solamente 5% di hende mohe por logra, y esei ta papiando di peso y tamaño so. Si bo kier e figura of cara ideal, etcetera, probablemente 1% por logr’e.”

Pesei e conseho cu Bijbel ta duna na Romanonan 12:2 ta practico: “No laga e manera di pensa di e mundo aki forma boso.” (Beibel na papiamentu koriente) Pero esei no kiermen cu bo no mester worry cu bo aparencia. Ta rasonabel pa cuida bo curpa door di haci ehercicio y tene diet na un manera balansa. (Romanonan 12:1; 1 Timoteo 4:8) Loke tambe por yuda bo mustra bon y sinti bo bon ta si bo sosega y drumi suficiente. Ademas, pone atencion na limpiesa di bo curpa y bo style di bisti y bo style di cabei. Un hoben britanico cu yama David a remarca: “Tin un mucha mohe cu ta masha bunita, pero e no ta hole bon. Esei ta pone cu otronan ta evit’e.” Pues, baña regularmente. Loke tambe ta drecha bo aparencia ta si bo tene bo man, cabei y huña limpi.

Bijbel ta desanima hende pa pone demasiado enfasis na loke nan ta bisti, pero e ta conseha cristiannan pa “dorna nan mes cu bisti apropiado, decente y modera.” (1 Timoteo 2:9) Bisti paña cu ta para bo bon pero cu no ta extrabagante ni indecente.a Si bo presta atencion di un manera rasonabel na bo aparencia, bo por haya mas confiansa den bo mes. Un hoben cu yama Paul ta expresa e idea aki di e siguiente manera: “Kisas bo no ta esun di mas bunita of nechi, pero bo por drecha loke bo tin.”

Cualidadnan di Paden

Aunke un bunita cara y un nechi curpa ta hala atencion, “beyesa ta pa un tempo.” (Proverbionan 31:30, BPK) Beyesa ta pasahero, y sigur sigur e no por remplasa cualidadnan personal atractivo. (Proverbionan 11:22) Corda tambe, cu “hende ta wak aparencia di pafo, ma SEÑOR ta wak curason.” (1 Samuel 16:7) Pues en bes di pone tur bo atencion na bo sintura of bo musculonan, mehora bo cualidadnan door di traha riba “e persona scondi di e curason, cu e cualidad incoruptibel di un spirito suave y keto, locual ta precioso den bista di Dios.” (1 Pedro 3:3, 4; Efesionan 4:24) Ta berdad cu hopi hoben den e mundo moderno aki no ta worry masha cu caracteristicanan admirabel di personalidad, y mucho menos cu cualidadnan spiritual.b Pero esnan cu tin e normanan dibino si ta aprecia nan y ta haya nan atractivo!

Kiermen, e miho manera pa bo ta atractivo den bista di cristiannan spiritual ta door di ta spiritual. Cultiva bo spiritualidad door di haci oracion, studio personal di Bijbel y bai reunionnan cristian. (Salmo 1:1-3) No obstante, tin otro cualidad y habilidad util cu bo por desaroya. Bo no tin mester di sali regularmente cu un hende of tin un relacion romantico pa bo cultiva e cualidadnan aki. Al contrario, bo por practica nan mientras cu bo ta trata cu otro hende den bo bida diario.

Por ehempel, bo ta sinti bo incomodo y timido ora bo ta den presencia di e sexo opuesto? Un hoben cu yama Paul ta admiti: “Tin bes mi ta sinti mi incomodo, pasobra nan ta mucha mohe, y ami no ta compronde mucha mohe mes bon cu mucha homber. Y mi no kier pasa berguensa.” Con bo por desaroya e confiansa y ekilibrio cu lo pone otronan sinti nan comodo? Un manera ta door di probecha asocia cu tur e diferente rumannan cu tin den congregacion. Ora bo ta na reunion, mustra interes den otro hende, no den esnan di e sexo opuesto di bo edad so sino tambe den muchanan, adultonan y esnan di edad. (Filipensenan 2:4) Si bo siña trata di un manera bon cu hende di tur edad, esei lo yuda bo desaroya confiansa den bo mes.

Pero tene cuidou. Hesus a bisa: “Stima bo prohimo manera bo mes.” (Mateo 19:19) Si bo tin confiansa den bo mes, lo tin menos chens cu lo bo haci co’i kens y sinti bo incomodo ora bo ta den compania di otro hende.c Sinembargo, maske ta necesario pa bo tin un cierto grado di respet propio, no bai den extremo. Apostel Pablo a bisa: “Mi ta bisa cada un di boso pa no pensa mas halto di su mes cu e mester pensa.”—Romanonan 12:3.

Analisa tambe con bo sa anda cu otro hende. Un mucha mohe Britanico cu yama Lydia a comenta: “Tin un mucha homber na mi scol cu ta basta popular entre e mucha mohenan. Pero ora nan siña conoc’e, nan no ta gust’e mas pasobra e ta bruto y sin manera.” Hende ta sinti nan atrai na otro personanan cu ta papia di un manera bondadoso, cu bon manera y cu ta mustra consideracion na otro hende. (Efesionan 4:29, 32; 5:3, 4) Dr. T. Berry Brazelton a remarca cu “si un persona ta agradabel, esei ta manera un paspoort cu ta yud’e yega facilmente serca otro hende.” Bon manera “ta hopi importante pa otro hende acepta bo.”

Custumber y regla di etica ta varia rond mundo. Pesei ta bon pa bo observa con cristiannan maduro ta trata otro. Por ehempel, ta custumber den bo pais pa un hende homber tene porta habri pa hende mohe pasa? Si esei ta e caso, anto bo siña demostra e cortesia aki lo bo haya e reputacion di ta un hende cu tin bon manera y cu ta ekilibra.

Por ultimo, por ta bo ta haya cu ta bon pa bo por tin un sentido di humor balansa. Bijbel ta bisa cu tin “un tempo pa hari”, y un persona cu tin un bon sentido di humor hopi bes ta haya amigo masha facil.—Eclesiastes 3:1, 4.

Ser Amigabel Versus Flirtmento

Un revista cu ta pretende di siña hobennan con pa traha cita a conseha cu e secreto pa atrae hende di e sexo opuesto ta door di flirt. A conseha lesadonan pa smile y pa wak e persona den su cara y pa perfecciona e prome frasenan cu bo ta bisa. E conseho aki ta contrario cu e spirito di e conseho cu Pablo a duna na Timoteo pa trata esnan di sexo opuesto “den tur puresa.”—1 Timoteo 5:2.

Maske flirtmento ta pone bo haya confiansa den bo mes, e ta algo insinsero y deshonesto. Bo no tin nodi flirt of coketia pa bo hiba un combersacion interesante. Ni bo no tin cu haci preguntanan inapropiado of cu ta causa berguensa, pa haya sa con hende di e sexo opuesto ta sinti y ta pensa. Persisti den papia tocante cosnan cu ta ‘husto, puro, y bunita [“amabel”, NW]’, y lo bo mustra sigur sigur cu bo ta riba caminda pa bira un hende homber of mohe madura y spiritual. (Filipensenan 4:8) Si bo obedece principionan di Dios lo bo ta atractivo no solamente pa hende di e sexo opuesto pero tambe pa Dios mes.d—Proverbionan 1:7-9.

[Nota]

[Plachi na pagina 20]

En bes di concentra riba bo aparencia, purba desaroya cualidadnan spiritual

[Plachi na pagina 20]

Siña con pa sinti bo comodo cu un variedad amplio di hende