For di Nos Lectornan

Artritis Mi a keda sumamente impresiona cu e serie “Speransa pa Hende cu Artritis.” (8 di december 2001) Mi tin 21 aña di edad, y pa casi 15 aña mi ta sufri di artritis severo y su consecuencianan. E serie aki tawata un berdadero animacion pa mi, y el a haci mi mas determina pa keda persevera.

A. F., Francia

Mi ta sirbi como un evangelisado di tempo completo, un privilegio cu mi ta aprecia masha pero cu dia pa dia ta bira mas dificil pa mi cumpli cu ne. Nan a diagnostica cu mi tin osteoartritis. Tur dia mi tin dolo, y tin bes e frustracion cu mi ta sinti ta pone mi bira deprimi. Masha danki pa e articulo ei cu a bin net na ora, y pa e recordatorio di cu berdadero consuelo ta bini door di kere firmemente den Yehova su promesa di un mundo nobo.

H.M.A., Merca

Mi ta sufri di artritis reumatico, y actualmente mi ta recuperando di un atake severo di e malesa aki. E articulonan aki ta describi exactamente loke un hende cu ta sufri di e malesa aki ta pasa aden. Tawata util pa haya sa mas tocante e malesa aki y kico por wordo haci pa reduci su efectonan.

G.F.F., Portugal

Mi tin 21 aña, y mi a haya sa cu mi tin artritis reumatico hubenil ora mi tawatin solamente 10 aña. Mi a lesa hopi experencia den revistanan medico, pero ningun di e experencianan ei ta mescos cu esnan cu mi a lesa tocante di mi rumannan spiritual cu ta pasa den e mesun cosnan cu mi. Mescos cu Katia, menciona den e articulonan, ami tampoco no por a sigui cu mi carera como evangelisado di tempo completo. Tawata masha importante pa mi cu mi por a lesa con otro personanan ta trata cu sintimentonan di frustracion y culpa pasobra nan no por haci mas den Yehova su sirbishi.

H. M., Merca

Ta haci un aña caba cu nan a diagnostica cu mi tin artritis reumatico cronico. E tempo ei mi tawatin 24. Mi mester a stop di traha como evangelisado di tempo completo. Mi a bira masha deprimi. Pa motibo di e inmenso dolo y cansancio, awor mi ta haci solamente mita di loke mi tawata haci. E articulo aki a consola mi, ya cu mi a mira cu otro rumannan tambe ta sinti e mesun dolo fisico y emocional cu mi. Y tambe mi a gusta e informacion practico tocante loke mi por haci. Mi ta warda riba e dia ora “e cohonan lo bula manera bina.”—Isaias 35:6.

T. U., Hapon

Un aña pasa mi a cuminsa sinti dolo fuerte den algun di mi joinnan di weso. Door cu mi tawatin cuarenta y pico aña, mi no por a imagina cu ta artritis. Boso articulonan a yuda mi mira cu mi mester ta balansa y rasonabel den loke mi ta spera di mi mes.

B. P., Merca

Mi tin 19 aña, y mi tin artritis den mi pols, enkel y rudia. Loke specialmente mi a disfruta di dje ta e subtema “Respeta Bo Limitacionnan.” Mi a muda di Merca bai Ecuador cu e intencion di sirbi einan como evangelisado di tempo completo. Pero pa motibo di mi limitacionnan, cansancio y dolo, mi por sali predica un rato so. Mi a dicidi cu mi ta bai Merca bek pa mi haya tratamento, y mi ta spera di por bolbe Ecuador ora mi bira bon.

J. S., Ecuador

Afspraak na Jong Lo mi kier gradici boso masha hopi mes pa e articulo Hobennan Sa Puntra . . . “Kico Tin di Malo den Traha Afspraak pa Sali na Edad Jong?” (8 di januari 2002) Resientemente, mi a haci mi mama e mesun pregunta ei: ‘Pero bon, kico tin di malo den traha afspraak pa sali?’ Mi tawata sa e contesta, pero djis mi tawatin mester di algo mas pa combence mi. Ora mi a lesa e articulo, mi a sinti como si fuera Yehova a lesa mi pensamento. E articulo aki a haci mi mas determina pa no traha afspraak pa sali cu un hende sino te ora mi ta cla pa casa. Semper mi a disfruta di e echo cu boso articulonan ta sali net na ora! Un biaha mas, masha danki.

L. F., Merca