Un Reencuentro Unico Despues di 30 Aña

NA 1967 dos hoben a conoce otro pa casualidad. Nan a ser asigna como compañero di cuarto na Universidad Tecnico di Michigan, Merca. Dennis Sheets, di Lima, Ohio, tawatin 18 aña e tempo ei y a cuminsa cu su prome aña di estudio di cultivo di selva. Mark Ruge di 20 aña a bini di Buffalo, New York. E tawatin tres aña ta studia bouwkunde.

E tempo ei nan amistad kisas a parce algo breve y pasahero. Nan niun di dos no a sigui cu nan educacion universitario; cada un a coi su propio rumbo. Mas cu trinta aña a pasa. Anto un dia na Republica Dominicana, e dos hombernan ta topa cara cara atrobe. Te na cierto grado, e reencuentro sorprendente aki tawata un casualidad. Pero tawatin un otro factor mas cu ta responsabel pesei. Kico esei tawata? Pa haya e contesta, laga nos analisa e rumbonan separa di nan bida.

Dennis Ta Bai Guera

Dennis a bai cas bek despues di su prome aña di universidad. Anto na december 1967, e ta ser recluta pa ehersito Mericano, y na juni 1968 nan ta mand’e Vietnam. Einan e ta mira e horornan di guera. Ora su tempo asigna a caba na 1969, e ta bolbe Merca y cu tempo ta haya trabou na un compania grandi na Ohio. Sinembargo, e no tawata satisfecho.

Dennis ta splica: “For di mucha mi tawata soña cu muda pa Alaska y bira un cunukero.” Pesei na 1971, hunto cu un amigo di scol secundario, Dennis ta cuminsa traha pa cumpli cu e soño ei. Nan ta bai Alaska, pero en bes di bira cunukero, e ta coi job. Pa un tempo e tawata biba den un tent y tawatin e trabou di vigila pa candela di mondi. El a laga su barba crece y a cuminsa huma marihuana.

Na 1972 Dennis a bandona Anchorage, Alaska, pa e bai experencia e carnaval di Mardi Gras na New Orleans, Lousiana. Despues di esei, el a traha un cas chikito den mondi di Arkansas. Einan e tawata traha frame di palo pa cas y pleister beton. Na juni 1973 Dennis ta cuminsa biaha rond Merca door di pidi lift, en busca di un proposito den bida.

Mark den e Movemento Contra Guera

Mark a keda universidad un par di semester mas despues cu Dennis a bai, pero despues el a dicidi cu e no kier bira parti di e sistema cu ta apoya guera. Pesei el a bai Buffalo bek, unda el a traha como forman na un fabrica di staal. Keto bai malcontento cu e asuntonan di guera, el a kita for di trabou, cumpra un brommer y a biaha bai San Francisco, California, na e otro banda di Merca. Aunke nan no tawata sa esei, pa un periodo Dennis cu Mark tawata na San Francisco durante e mesun tempo.

Mescos cu Dennis, Mark tambe a laga su barba y cabei crece y a cuminsa uza marihuana. Pero Mark tawata masha envolvi den e movemento contra guera, y tawata participa den marchanan di protesta. FBI tawata busc’e pasobra e no a raporta pa servicio militar, pesei pa algun aña e tawata uza nombernan falso pa nan no hay’e. Na San Francisco e tawata hiba un bida di hippie, anto ta einan, na 1970, dos Testigo di Yehova a yama na su porta.

Mark ta splica: “Nan mester a sinti cu mi a mustra un poco interes, pasobra nan a bolbe pasa. Mi no tawata na cas, pero nan a laga un Bijbel berde y tres buki.” Sinembargo, Mark no a traha tempo pa lesa nan pasobra e tawata mucho ocupa cu actividadnan politico y cu dibirti su mes. Ademas, FBI tawata busc’e sin fin. Pesei bou di un otro nomber falso, el a muda bai Washington, D.C. Su amiga, Kathi Yaniskivis, cu el a topa na universidad, a join e einan.

Finalmente na 1971, FBI a gara Mark. Dos agente di FBI a escolt’e riba un buelo for di Washington, D.C., pa New York y nan a haci sigur cu el a sigui bula pa Toronto, Canada. Evidentemente FBI no a consider’e un menasa pa orden civil; simplemente nan tawata kier pa e sali for di e pais. E siguiente aña e cu Kathi a casa, y nan a muda bai Gabriola Island, British Columbia, Canada. Nan kier a scapa for di sosiedad, sinembargo nan tawata sinti cu bida mester tin un proposito.

Nan Ta Bira Testigo di Yehova

Manera bo sa, Dennis tawata biaha rond Merca cu lift en busca di un proposito den bida. Su biahe a hib’e Montana, caminda el a haya un job pafo di e stad Chinook. E tawata yuda un cunukero durante e cosecha di grano. E homber su casa y su yiu mohe tawata Testigo di Yehova. Nan a duna Dennis un revista Spierta! pa e lesa. No a tarda hopi cu el a keda combenci cu Testigonan ta practica e religion berdadero.

Dennis a muda bai Kalispell, Montana, cu un Bijbel den su poder. Einan el a asisti na su prome reunion di Testigonan di Yehova. Na e reunion ei el a pidi un studio di Bijbel. Poco despues, el a corta su cabei y feita su barba. Na januari 1974 el a sali bai predica pa prome biaha, y dia 3 di maart 1974 el a batisa na Polson, Montana, den un baki pa bestia bebe awa.

Mientras tanto Mark cu Kathi, bibando na Gabriola Island, a dicidi cu nan ta bai purba investiga Bijbel ya cu nan tawatin tempo pa esei. Nan a cuminsa lesa e version King James, pero e Ingles anticua tawata poco dificil pa nan compronde. E ora ei Mark a corda cu ainda e tawatin e Bijbel y e bukinan cu e Testigonan a dun’e añanan prome. Nan a lesa e Bijbel hunto cu e bukinan E berdad cu ta hiba na bida eterna y E Bijbel realmente ta Palabra di Dios? Mark cu Kathi a keda profundamente impresiona cu loke nan a lesa.

Mark ta splica: “Loke specialmente a impresiona mi tawata e echo cu e buki Berdad ta menciona un grupo di cristian cu lo no a bai guera bou di ningun sircunstancia. Pa mi, ta hende asina tawata practica berdadero cristianismo.” Poco despues, Mark cu Kathi a bolbe Houghton, Michigan, pa bishita e famianan di Kathi, apesar di e riesgo di ser aresta. Einan, ainda cu nan aparencia di hippie, nan a asisti na un reunion di e Testigonan. Nan a acepta un studio di Bijbel y a studia durante e luna cu nan tawata na Michigan.

Ora nan a regresa Gabriola Island, nan a topa un Testigo den caya na Nanaimo, British Columbia, y nan a splic’e cu nan tawata kier un studio di Bijbel. E mesun dia ei un auto yen di Testigo a bin cu ferry na e isla pa tuma contacto cu nan, y nan a cuminsa un studio di Bijbel. Tres luna despues, Mark cu Kathi a cuminsa predica. Anto tres luna despues di esei, dia 10 di maart 1974, tur dos a batisa. Un siman despues cu Dennis a batisa!

Dennis den Sirbishi di Tempo Completo

Dennis a bira pionero, of predicado di tempo completo, na september 1974. E ta bisa: “Mi tawata masha felis cu mi trabou di pionero, pero mi kier a haci mas; pesei na juli 1975 mi a inscribi pa sirbi na e sede mundial di Testigonan di Yehova na Brooklyn, New York. Na december di e aña ei mi a haya invitacion pa bai einan.”

Dennis su prome asignacion tawata pa yuda den e trabou di comberti e exhotel Towers den un residencia pa e personal di e sede. El a traha varios aña einan, supervisando e ponemento di mosaico. Despues, como cu e kier a casa, el a muda bai California. Na 1984, tempo cu e tawata sirbi como anciano den e congregacion di Cathedral City, el a casa cu un pionero cu yama Kathy Enz.

Dennis cu Kathy tawata determina pa mantene nan bida simpel afin cu nan por a ocupa nan mes cu asuntonan cu tawatin di aber cu e Reino di Dios. Pesei hopi biaha Dennis tawata nenga oportunidadnan pa gana hopi placa riba tereno di construccion den suit di California. Na 1988 e cu Kathy a inscribi pa yuda den e trabou di construccion internacional di Testigonan di Yehova. Na december di e aña ei, nan a ricibi e asignacion pa traha riba e proyecto di construccion di sucursal na Buenos Aires, Argentina.

Na 1989, Dennis cu Kathy a haya e invitacion pa sirbi den e trabou di construccion di Testigonan di Yehova na un manera mas permanente. Den e sirbishi di tempo completo special aki, nan a sirbi dos biaha na Surnam y Colombia. Tambe nan a traha riba construccion di sucursal na Ecuador y Mexico y na Republica Dominicana.

Mark den Sirbishi di Tempo Completo

Na 1976, Mark hunto cu miles di otro homber hoben Mericano cu a hui bai Canada pa nan no drenta servicio militar, a haya pordon general serca gobierno Mericano. E cu su casa Kathi, tambe kier a mantene nan bida simpel afin di por dedica mas tempo na nan sirbishi. Pesei Mark a traha part-time como midido di tereno, y poco poco e cu Kathi a paga e debenan cu nan a acumula prome cu nan a batisa.

Na 1978, ora cu e Testigonan na Canada tawata plania pa traha un edificio di sucursal nobo pega cu Toronto, Ontario, Mark cu Kathi tawata den posicion pa ofrece nan servicionan. Siendo cu Mark tawatin experencia den midimento di tereno, nan a haya invitacion pa participa den e construccion. Nan a traha riba e proyecto na Georgetown te ora el a termina na juni 1981. Despues di esei nan a muda bai bek British Columbia y durante e siguiente cuater añanan nan a yuda cu construccion di un Salon di Asamblea di Testigonan di Yehova einan. Ora esei a ser completa, nan a bolbe haya invitacion pa bin traha riba expansion di e sucursal di Canada.

Na 1986, despues di algun luna na Georgetown, nan a invita Mark cu Kathi pa keda como miembronan regular di e sucursal di Canada. For di e tempo ei nan ta parti di e personal y tambe nan a haya varios oportunidad pa participa den trabou di construccion den hopi otro pais. Debi na Mark su experencia den midimento di tereno, a cuminsa uz’e pa midi tereno pa edificionan di sucursal y pa Salonnan di Asamblea di Testigonan di Yehova na Sur y Centro America y na islanan di Caribe.

Den transcurso di añanan, e cu Kathi a sirbi na Venezuela, Nicaragua, Haiti, Guyana, Barbados, Bahamas, Dominica, Merca (Florida) y Republica Dominicana. Ta e sirbishi di tempo completo special aki a pone Mark cu Dennis topa un biaha mas.

Reencuentro na Republica Dominicana

Sin cu nan tawata sa, Mark cu Dennis tawata traha riba proyectonan similar na Republica Dominicana. Un dia nan a topa otro pa casualidad na e sucursal di Testigonan di Yehova na Santo Domingo. Manera bo mes por imagina, nan tawata masha contento di por a bolbe siña conoce otro. Con cu bai bin, nan tur dos tawata 33 aña mas bieu y tawatin hopi cos di conta otro di nan bida. Cu creciente asombro nan a intercambia cu otro gran parti di loke bo a caba di lesa. Pero loke tawata mas remarcabel pa nan—y tambe pa tur hende cu nan a conta nan experencia—tawata e hopi similaridadnan cu tawatin den nan bida.

Tur dos a hiba un bida di hippie y a muda pa areanan isola pa libra di e estilo materialista di bida moderno cu tur su inkietudnan. Dennis a casa cu un mucha mohe cu yama Kathy; Mark a casa cu un mucha mohe cu yama Kathi. Tur dos homber a acepta un studio di Bijbel ora nan a asisti na nan prome reunion di Testigonan di Yehova. Tur dos a batisa na maart 1974. Tur dos a bira miembro di e famia di sucursal di Testigonan di Yehova: Dennis na Merca y Mark na Canada. Tur dos a haci esfuerso pa tene nan bida simpel afin di por alcansa metanan spiritual. (Mateo 6:22, NW) Tur dos a bira envolvi den construccion internacional y a ricibi asignacion den varios pais. Te cu e dia cu nan a topa otro pa casualidad na Republica Dominicana, niun di dos no a topa ningun amigo bieu cu a acepta e berdad di Bijbel.

Mark cu Dennis ta atribui e coinsidencianan remarcabel aki na destino? Absolutamente cu no. Nan ta reconoce cu manera Bijbel ta bisa, “tempo y suseso imprevisto ta cai riba [nos] tur”, y tin biaha den maneranan masha interesante. (Eclesiastes 9:11, NW) Sinembargo, tambe nan ta reconoce cu tawatin un cos mas cu a hunga un rol den nan reencuentro: nan tur dos tawata busca un proposito den bida y nan tawatin amor pa Yehova Dios.

E historia aki di Dennis cu Mark ta resalta tambe algun cos cu tur hende di curason sinsero cu siña e berdad di Bijbel tin en comun. Dennis ta comenta: “Loke ami cu Mark a experencia ta demostra cu Yehova ta conciente di e situacion di bida di hende, y cu ora nan curason haya e disposicion corecto, e ta hala nan serca dje.”—2 Cronicanan 16:9; Huan 6:44; Echonan 13:48, NW.

Mark ta agrega: “Tambe nos experencia a yuda nos compronde cu ora un hende adapta su mes na e normanan di Yehova, dedica su bida na dje y haci su mes disponibel, Yehova por uza e persona aki su talento- y habilidadnan pa promove adoracion berdadero na beneficio di Su pueblo.”—Efesionan 4:8.

Tambe nan experencia ta mustra cu Yehova Dios ta bendiciona e sirbishi di henter alma cu su pueblo ta rindi. Dennis cu Mark sigur ta sinti nan mes bendiciona. Dennis ta bisa: “Ta un privilegio di por sirbi na fabor di interesnan di Reino den sirbishi special di tempo completo. Esei a permiti nos disfruta di un intercambio di estimulo y a la bes traha cu rumannan cristian di tur parti di mundo.”

Mark ta agrega: “Yehova definitivamente ta bendiciona esnan cu pone su Reino na prome luga. Pa mi, e echo cu mi por sirbi como miembro di e famia di sucursal di Canada y di participa den construccion internacional, ta un bendicion special.”

Un reencuentro unico? Si, pasobra manera Mark a bisa: “E berdadero motibo dicon nos a keda asina emociona ora nos a topa otro ta cu nos tur dos a siña conoce, stima y sirbi e Dios unico, Yehova.”

[Plachi na pagina 18]

Dennis, 1966

[Plachi na pagina 18]

Mark, 1964

[Plachi na pagina 20]

Dennis na South Dakota, 1974

[Plachi na pagina 20]

Mark na Ontario, 1971

[Plachi na pagina 21]

Dennis cu Mark, hunto cu nan casa, poco despues di nan reencuentro inespera na 2001