Ora Erornan Chikito Ta Bira Desaster
DIA 6 di juli 1988, trahadonan riba e boortoren Piper Alpha den Noordzee a cuminsa drecha un mashin cu ta pomp gas condensa, pero nan no a caba e trabou. Falta di bon comunicacion entre e trahadonan a pone cu esnan cu a subi warda despues a sende e pomp ocasionando un candela. Como cu nan tawata traha te den laira riba lama, sin ningun caminda di escape, 167 persona a muri.
Diesdos aña despues, dia 25 di juli 2000, un avion supersonico Concorde tawata acelera riba pista di Aeropuerto Charles de Gaulle na Paris, Francia. Segun cu e avion a coi velosidad, un pida chikito di metal titanio cu tawatin benta riba pista a pone un tayer explota, y esei na su turno a kibra un tanki di gasolin den e hala. Combustibel a drenta den e motornan na banda robes, locual a stroba nan di haya coriente y a forma un vlam di candela di 60 meter. Despues di dos minuut, e avion a dal den un hotel, matando tur hende abordo y tambe algun hende riba tera.
Reflexionando riba e tipo di accidentenan ei, James Chiles ta bisa den su buki Inviting Disaster—Lessons From the Edge of Technology (Invitacion pa Desaster—Lesnan for di Alto Tecnologia): “Den nos mundo nobo, rondona pa mashinnan cu de bes en cuando ta perde control, nos tin cu reconoce e daño extraordinario cu erornan ordinario por causa awor.” Comentando riba e buki di Chiles, e revista Science ta bisa: “E avance rapido y extraordinario di ciencia y tecnologia durante e ultimo par di shen añanan tawata excitante. E ta duna nos e sintimento cu casi no tin limite na nos posibilidad pa compronde y manipula e mundo fisico. [Pero] no tin ningun motibo pa nos pensa cu awor nos ta menos inclina na haci eror cu antes.”
Relaciona cu tecnologianan mas peligroso, Science ta bisa: “Asta un riesgo masha chikito [di eror] ta di mas. Pa e tecnologianan ei, nos mester insisti riba perfeccion.” Pero humanidad su logronan di pasado ta indica cu perfeccion ta posibel? No! Pues, desasternan causa door di varios tipo di eror sin duda lo sigui tuma luga.
Pero nan lo no sigui pa semper. Hende temeroso di Dios por spera un futuro den cua hende lo no perde nan bida tragicamente debi na eror of limitacion humano. Con bin? Pasobra Dios, mediante su gobierno celestial, lo elimina tur causa di morto, pena y dolor.—Mateo 6:9, 10; Revelacion 21:3, 4.
[Reconocemento pa Potret na pagina 31]
AP Photo/Toshihiko Sato