Watchtower BIBLIOTHEEK ONLINE
Watchtower
BIBLIOTHEEK ONLINE
Papiamento (Aruba)
  • BIJBEL
  • PUBLICACION
  • REUNION
  • g03 8/7 pag. 3-4
  • Crimen Violento Ta Kico Ta Pasando?

No tin video disponibel pa loke bo a scoge.

Sorry, nos no por a play e video.

  • Crimen Violento Ta Kico Ta Pasando?
  • Spierta! 2003
  • Subtema
  • Articulonan Similar
  • Un Otro Tipo di Crimen?
  • Dicon Tin Asina Tanto Crimen Violento Awe?
    Spierta! 2003
Spierta! 2003
g03 8/7 pag. 3-4

Crimen Violento Ta Kico Ta Pasando?

FRANK cu Gabriella tawata cana keiro canto di lama mainta tempran na Oregon, Merca, pa wak solo sali. Nan no tawatin e minimo idea di loke tawata bai pasa. Un par di minuut despues, tur dos tawata morto, tira den cabes for di un distancia cortico. E motibo tawata vengansa? Of yaluci? Ningun di nan dos. E pistolero tawata un homber desconoci cu a cumpli cu un fantasia: e kier a sa con bo ta sinti ora bo mata un hende.

“Riba diadomingo 28 di april 1996 Martin Bryant a acapara atencion di mundo Occidental mientras cu e tawata gosa un bol. Tirando riba tur hende cu el a topa segun cu e tawata cana door di Port Arthur, Tasmania, el a sinti un maraviyoso excitacion di alegria y poder.” (A Study of Our Decline [Un Estudio di Nos Deterioro], di Philip Atkinson) Tambe el a causa morto di 35 hende!

Na Canada, un pensionado di 65 aña tawata coriendo su bais manera e tawatin custumber di haci tur mainta tempran. Segun cu e tawata core, un chauffeur di auto a dal e di patras y core bai lag’e pensando cu e ta morto. Su bais a lastra bai casi 700 meter leu. Na prome instante autoridadnan a pensa cu tawata un caso di hit-and-run, pero mas investigacion a indica cu ta un persona cu a joyride un auto a dal e. Aparentemente, e chauffeur a considera cu dal e siclista tawata parti di e “excitacion” di joyride.

Un Otro Tipo di Crimen?

Hende tin siglonan ta comete crimen, pero e tipo di crimennan cita ariba ta pone hende sclama: “Dicon? Con un hende por hinca den su cabes pa haci un cos asina?” Aunke crimen comun, manera ladronicia y fraude, kisas no ta hala hopi hende su atencion, tin un categoria creciente di actonan cu ta gara atencion di medionan di comunicacion y cu ta pone hende bisa den nan mes: ‘Esaki no tin sentido! Ta kico ta pasando cu e mundo aki?’

E crimennan aki ta diferente. Hopi bes nan ta masha teribel y cruel. Manera den e ehempelnan ya menciona, nan ta ser cometi por lo general contra hende inocente cu ni sikiera conoce e malechor. Ademas, hopi bes ta parce cu no tin un motibo cla pa e crimennan violento aki. Ta masha hopi acto sin sentido asina ta tumando luga.

Na april 1999 na Colorado, Merca, 2 mucha di scol a mata 12 alumno y un docente, prome cu nan a mata nan mes den un tiroteo cu a tuma luga na scol. Na 1982, un homber a muri na California despues cu el a bebe un remedi cu el a cumpra na botica; un hende a mescla e veneno strychnine den dje. Na 1993, dos mucha homber di dies aña a combence James Bulger di dos aña pa sali for di e centro comercial na Bootle, Merseyside, Inglatera, mientras cu su mama tawata den un carniseria. Nan a bai cu ne caminda tawatin rail di trein y a batie mata cu un pida palo.

Algun crimen por ser clasifica como terorismo, manera e venenamento den metro di Tokio na 1995. Hende na Hapon a keda den shock ora cu miembronan di un culto a descarga gas venenoso den un metro di Tokio, matando 12 persona y heridando miles. Poco hende por lubida e destruccion di World Trade Center na New York y e atake contra Pentagon na Washington, D.C.—cu a costa bida di un 3.000 hende—y e atentado cu bom aña pasa na Bali, Indonesia, cu a costa bida di casi 200 persona.

Ta bisto cu e tipo di crimennan violento ei ta sosode tur caminda. E problema ta mundial, y e ta afectando hopi nacion y hopi tipo di hende.

Den algun caso ta casi como si fuera e malechornan ta compitiendo cu otro, purbando di wak ken por comete e crimen di mas cruel. Ademas, crimennan motiva pa odio ta birando mas comun. Esakinan ta ser cometi na maneranan masha cruel mes contra hende kende nan unico “fout” ta cu nan ta di un otro rasa, religion of grupo etnico, manera tawata e caso na 1994 ora cu mas o menos 800.000 Tutsi a ser asesina na Ruanda.

Tur esaki ta pone hopi hende pensa: ‘Ta kico ta pasando? Antes tawata asina? Kico por tin tras di e crimennan horibel ei? Ki speransa nos tin cu lo reduci of elimina tal crimennan cruel?’ E siguiente articulonan lo trata cu e preguntanan aki y otronan mas.

[Comentario na pagina 4]

Crimen violento hopi bes ta ser cometi contra victimanan scohi pa casualidad y sin cu tin un motibo cla pa esei

    Publicacion na Papiamento (Aruba) (2002-2024)
    Log Out
    Log In
    • Papiamento (Aruba)
    • Comparti
    • Preferencianan
    • Copyright © 2025 Watch Tower Bible and Tract Society of Pennsylvania
    • Condicionnan di Uzo
    • Maneho di Privacidad
    • Configuracion di Privacidad
    • JW.ORG
    • Log In
    Comparti