Madrid un Capital Traha pa un Rei

DI E CORESPONSAL DI SPIERTA! NA SPAÑA

ALGUN ciudad capital di mundo a lanta serca di hafnan natural y pa hopi tempo a sirbi como puertonan yen di actividad. Otro capitalnan ta situa na crusadanan di riu hopi frecuenta y como consecuencia logico a crece bira prominente. Hopi capital Europeo ta ciudadnan importante for di tempo di e imperio Romano. Pero Madrid, capital di Spaña ta un excepcion. E stad tawatin menos di 10.000 habitante na aña 1561 ora cu diripiente el a bira prominente.

E motibo tawata simpel. Felipe II, Rei di Spaña y di un inmenso imperio na otro banda di oceano, a cansa di muda su corte real di un stad di Castilla pa otro. E tawata gusta yag, y e kier tawatin su palacio real permanentemente na un luga cumbiniente cu no tawata mucho leu for di su terenonan faborito pa yag. Madrid a cuadra net cu e rekisito ei, y tambe e stad tawatin bon awa di bebe, luga pa expande y cunucunan fertil den bicindario.

Unabes cu el a dicidi di bai biba einan, Felipe a cuminsa cu un programa di construccion pa haci Madrid un capital adecua. Reinan Spaño cu a biba despues tambe a embeyece e stad, creando un laso unico entre Madrid y e famia real. Pa siglo 17, Madrid a bira e stad di mas grandi na Spaña. Awe e ta un metropolis moderno y prospero cu mas di tres miyon habitante.

Debi na Madrid su laso estrecho cu famia real di Spaña, hopi di su edificionan historico ta conecta cu e dos dinastianan principal. E parti mas bieu di e stad yama Madrid di Austria, y ta data for di e dinastia di Austria, of Habsburg, di siglo 16 y 17. E partinan cu a ser agrega despues a bira conoci como Madrid di Bourbon, di e dinastia actual cu ta data for di añanan 1700.

Atrabes di siglonan, reinan Spaño a promove of financia construccion di hopi di e edificionan mahestuoso di e stad. Nan coleccion precioso di cuadro ta forma awor e nucleo di Madrid su galeria nacional di arte. Y e terenonan real extenso den e area di Madrid, cu tempo a bira e parkenan y areanan principal di recreo di e stad.

Un Stad Berde

E famia real tawata masha interesa den yagmento y hardinnan bunita. Pesei ora cu Madrid a cuminsa cu su expansion moderno ya caba e stad tawatin un seccion grandi y berde di naturalesa conserva. Apesar cu den ultimo decadanan e stad a crece masha hopi, tin un pida grandi di parke ta extende den direccion suit for di e seronan te yega casi na porta di e centro di ciudad.

Un di e parkenan di Madrid, cu antes e reinan tawata uza como tereno pa yag ariba y cu yama Casa de Campo, ta situa serca di e palacio real. Awor tin un parke di bestia moderno einan. Nort di Madrid tin un area masha grandi di mondi di palo di eik nativo conoci como sero di El Pardo, cu ta keda 10 kilometer for di centro di ciudad.

No mucho tempo despues cu Felipe II a haci Madrid su capital, el a crea e parke aki pa yag bestia. Ainda e cas real cu nan tawata uza ora di yag, construi na prome instante door di Felipe su tata, ta dorna e parke. Awor e area di mondi aki a bira un parke regional cu ta duna proteccion na dos di e bestianan cu mas ta core peliger di extincion na Europa, e aguila imperial Spaño y e samuro preto Europeo.

Parke Retiro tawata anteriormente un hardin real espacioso den centro di Madrid, caminda e famia real tawata tene pelea di toro y asta batayanan naval. Den siglo 18 nan a cuminsa permiti publico drenta e parke, basta nan tawata adecuadamente bisti. Claro cu awor e norma di bisti ta menos stricto, y e Madrileñonan ta basha bai na e parke popular aki tur weekend. Dos di su atraccionnan ta un palacio di cristal, traha di hero bati y glas, y un veranda di pilar den forma di medio circulo cu ta duna bista riba un lago cu ta wordo uza pa core boto.

Carlos III, un Rei di siglo 18 cu tawatin masha interes den arte y ciencia, a funda e Hardin Real Botanico banda di Parke Retiro. Durante e ultimo dos siglonan y mei, e hardinnan a specialisa den matanan di Centro y Sur America.

E Avenida di Arte

Danki na e generosidad di e famia real Spaño, Madrid tin tambe un di e galerianan di arte mas importante na mundo. Nan a traha Museo Prado riba ordo di Carlos III, conoci den historia como un Alcalde remarcabel di Madrid. E coleccion di arte ta basicamente di e monarcanan Spaño, kendenan a cuminsa colecciona obranan di arte mas cu cuater siglo pasa.

Den siglo 17, e pintor di palacio real Velázquez no solamente a pinta obranan maestro, sino tambe a biaha rond Europa pa cumpra cuadronan bunita pa su patron real, Felipe IV. Den e siguiente siglo, Francisco de Goya a bira e pintor oficial di palacio real. Pesei no ta un sorpresa cu den Museo Prado tin hopi obra maestro pinta door di e dos artistanan renombra aki.

Dos otro coleccion di arte hopi famoso—Museo Thyssen-Bornemisza y Museo Nacional Centro di Arte Reina Sofía—ta keda riba e mesun avenida cu Museo Prado. E caya elegante aki cu palo na ambos banda, yama Avenida di Arte, y ta dorna tambe cu hopi estatua famoso di Madrid.

Mescos cu hopi stad, Madrid tawatin su tempo bon y malo. Durante gran parti di e Guera Civil Spaño (1936-39) e capital tawata sitia y te ainda bo por mira algun di e marcanan di bala di e conflicto ei riba e monumento conoci como Puerta de Alcalá. No obstante, for di principio e fundadonan di Madrid tawata kier pa e ta un stad desaroya caminda hende lo a biba bon cu otro.

E constitucion di Madrid, cu ta data for di aña 1202, a stipula entre otro, cu ciudadanonan no tawatin mag di bringa cu otro, ni carga arma di candela ni papia palabra malo of insulto. Tambe nan mester a tene e stad limpi, y evita di comete fraude cu nan conciudadano, y mantene gastonan di casamento na un nivel rasonabel. Na harmonia cu e deseonan ei, awe Madrid ta un stad limpi, aunke fiestanan di casamento si a bira un poco costoso! Bishitantenan cu kier un cuminda barata, kisas por purba e tapas tipico, cu ta un tayo chikito cu diferente sorto di pasapalo cu nan ta sirbi cu un co’i bebe friu den hopi establecimento.

Den ultimo añanan Madrid a expande considerablemente. Awor e tin un sistema di transporte hopi eficiente y tur e infrastructura necesario pa atende e miyones di turistanan cu ta bishita e stad tur aña. Miles di Testigo di Yehova di Spaña y di otro paisnan lo bishita e stad na juli y augustus. E Testigonan tin plania pa tene un congreso internacional den un di e stadionnan grandi di futbol na Madrid. Pues anto, hopi di esnan cu asisti lo haya chens pa mira pa nan mes e capital cu a ser traha pa un rei.

[Cuadro/Plachinan na pagina 24, 25]

PALACIONAN DIGNO DI UN REI

Palacio Real. Probablemente e edificio mas impresionante di Madrid, e palacio aki ta situa na e luga di un antiguo baluarte Moro riba cua nan a construi Madrid inicialmente. Nan ta uz’e pa funcionnan importante di Estado, aunke cu for di 1931 nan no a uz’e mas como residencia real. E hardinnan simetrico ta extende for di e palacio te na e riu mas abou.

Palacio Aranjuez. Aranjuez ta keda un 50 kilometer suit di e capital, a lo largo di Riu Tajo. Su terenonan fertil y clima mas suave a hacie un sitio faborito di Felipe II, kende a inicia construccion di e palacio. E palacio y su hardinnan bunita a ser completa den siglo 18 door di Carlos III.

El Escorial. Un poco despues cu Felipe II a haci Madrid su capital, el a cuminsa construi e inmenso compleho aki cu a consisti di monasterio, biblioteca, mausoleo y palacio. A dura 20 aña pa construye, y el a bira e centro di e imperio di Felipe, un luga simpel sin luho caminda e por a traha sin molester. E palacio ta conserva un di Spaña su coleccionnan mas importante di manuscrito, incluso varios version Spaño di Bijbel cu ta data di Edad Medio.

Palacio El Pardo. E cas real aki cu nan tawata uza ora di yag ta situa den e parke regional cu ta keda pega cu Madrid. E tata di Felipe II a traha e structura original, y e interior di e patio ta data di e periodo ei.

Na La Granja de San Ildefonso, 80 kilometer nort, tin un palacio mas luhoso. Felipe V a trah’e como un imitacion di Palacio Versailles, caminda el a pasa su infancia. E hardinnan y fonteinnan elabora ta forma un contraste cu e inmenso mondi di palo di pino cu ta cubri e seronan rond di dje.

[Reconocemento]

Foto: Cortesía del Patrimonio Nacional, Madrid, España

[Cuadro/Plachinan na pagina 26]

ALGUN DI MADRID SU MONUMENTONAN FAMOSO

Plaza Mayor (1). Pa mas cu tres siglo, e plenchi aki a sirbi como mercado y como e sitio principal pa eventonan publico manera pelea di toro, coronacion di rei y ehecucion di e asina yama herehenan (ketters). Un cuadro den Museo Prado (2) ta describi un panorama bibo di Plaza Mayor durante un auto-da-fé grandi, es decir un huicio publico di herehenan, teni na Madrid na 1680.

E stadhuis ta keda na Plaza de la Villa, un plenchi masha bieu y encantador caminda e prome reunionnan oficial di e stad a tuma luga. E plenchi ta rondona pa edificionan antiguo y ainda tin e ambiente di Madrid di siglo 16. No mucho leu, e bishitante por mira Puerta del Sol, e plenchi mas druk di e stad y e comienso di tur caya cu ta sali for di Madrid pa bai na e provincianan. E monumentonan historico aki ta pertenece na e parti mas bieu di e stad.

Segun cu Madrid a expande, reinan di e dinastia di Bourbon—specialmente Carlos III—a traha of promove otro monumentonan, hopi bes siguiendo e estilo arkitectonico di Francia, pais natal di e famia Bourbon. Algun ehempel di esaki ta Palacio Real, Biblioteca Nacional (3), Museo Municipal (4), Fontein di Cibeles (5), Fontein di Neptuno y Puerta de Alcalá (6).

[Reconocemento]

Potret 2: MUSEO NACIONAL DEL PRADO; potret 5 cu  6: Godo-Foto