E Punto di Bista Biblico

Hipnotismo Ta pa Cristiannan?

“No mester ta haya den bo ningun hende cu . . . ta mara otronan cu un maldicion.”—DEUTERONOMIO 18:10, 11, NW.

HIPNOTISMO ta topico di hopi debate y controversia.a Asta expertonan riba e tereno ei ta haya cu ta dificil pa splic’e. Por lo general hende ta compronde cu hipnosis ta manera un trans, un estado conciente pero diferente for di normal. Sinembargo, mayoria hende ta mas interesa den kico hipnotismo por haci cu den kico e ta.

Den ultimo añanan a bira normal cu docternan den algun pais ta recomenda hipnotismo como tratamento. Por ehempel, e revista Psychology Today ta declara: “Hipnoterapia por trata dolor di cabes, suavisa dolor di parto, yuda bo stop di huma, remplasa anestesia y mehora custumbernan di siña; y tur esei sin efectonan secundario.” Di otro banda, hopi hende ta asocia hipnotismo cu spiritismo y asuntonan sobrenatural.

Kico ta e punto di bista biblico? Bon, Bijbel mes no ta un manual di salu, y e no ta haci ningun mencion direct di hipnotismo. Pero e principionan cu tin den e Palabra di Dios por yuda nos determina Dios su punto di bista.

Tin un Conexion Entre Hipnotismo y Asuntonan Sobrenatural?

E idea cu hipnotismo ta conecta cu asuntonan sobrenatural ta simplemente e invento di un hende su imaginacion? Cuentanan di fantasia den pelicula y buki kisas a fomenta e idea, pero en berdad ta existi un conexion entre hipnotismo y spiritismo. Relaciona cu hipnotismo, e Encyclopedia of Occultism and Parapsychology ta splica: “[Hipnotismo] su historia ta masha liga cu asuntonan sobrenatural.” Cai den trans religioso, un cos cu durante henter historia tawata un parti di bruheria y magia, por lo general ta ser considera como un forma di hipnosis. Tambe, e sacerdotenan di Egipto y Grecia di antiguedad a causa un tipo di hipnosis ora nan tawata purba cura malesanan den nomber di nan diosnan falso.

E enciclopedia cita ariba ta bisa: “Asta awe gran parti di e fenomenonan di hipnosis ta ser clasifica como ‘spiritualismo.’” Aunke ta dificil pa determina te na ki grado varios forma di hipnotismo tin di aber cu asuntonan sobrenatural, echo ta cu Dios claramente ta condena tur forma di spiritismo. (Deuteronomio 18:9-12; Revelacion 21:8) Pues, cristiannan no por ignora e aspectonan di hipnotismo cu claramente ta bai contra e Scritura.

Efecto Riba Comportacion

Kico di e efecto di hipnosis riba un persona su mente y comportacion? E tin su riesgonan? Un precupacion valido ta cu na momento cu un persona ta hipnotisa, e tin masha tiki control riba su comportacion. Hipnotisadonan cu ta duna show, ta haci uzo di e caracteristica aki pa obliga e boluntarionan haci cosnan cu normalmente nan lo no a haci, asta pa parce manera nan ta burachi.

The Encyclopedia Americana ta bisa tocante e shownan publico aki di hipnotismo: “E persona hipnotisa kisas ta masha receptivo pa asta sugerencianan indirecto. Kisas e tin acceso mas facil na su impulsonan inconciente cu por lo general ta hopi mas scondi, y talbes ora cu e ta hipnotisa e ta sinti su mes liber di tur restriccion social y personal riba su comportacion.” Collier’s Encyclopedia ta declara: “E persona hipnotisa ta experencia un consentracion completo di su facultadnan, locual ta hacie sumamente atento na e sugerencianan di e hipnotisado y cla pa coopera cu e sugerencianan ei.”

Esei ta zona manera algo inofensivo? Lo ta consehabel pa un cristian berdadero laga otro hende influencia su mente mediante sugerencianan durante un hipnosis? Esaki lo ta contrario na apostel Pablo su spiertamento: “Presenta boso curpa como un sacrificio bibo, santo, aceptabel na Dios, un sirbishi sagrado cu boso facultad di rasona. Y stop di ser forma segun e sistema di cosnan aki, mas bien sea transforma door di rehaci boso mente, pa boso por proba pa boso mes loke ta e bon y aceptabel y perfecto boluntad di Dios.”—Romanonan 12:1, 2, NW.

Un cristian lo por “mantene un bon consenshi” si e permiti un otro hende hinc’e den un estado cu e no tin pleno control riba su pensamentonan ni deseonan ni accionnan? (1 Pedro 3:16) Bijbel ta spierta: “Cada un di boso [mester] sa con pa tene su mes curpa den santificacion y honor.” (1 Tesalonicensenan 4:4) Claramente, e practica di hipnosis lo stroba un hende di por sigui tal conseho.

Un Speransa pa Salu Perfecto

En bista di e principionan biblico menciona ariba, Testigonan di Yehova ta evita terapianan cu ta encera hipnosis (incluso autohipnosis). Nan ta obedece e mandamento na Deuteronomio 18:10 y 11 (NW): “No mester ta haya den bo ningun hende cu . . . ta mara otronan cu un maldicion.” Pa esnan cu ta confrontando problema di salu, tin hopi otro tratamento cu no ta expone nan na e peligernan cu tin di aber cu asuntonan sobrenatural ni ta permiti otro hende manipula nan mente.

Door di keda leu for di practicanan cu ta contrario na principionan biblico, cristiannan por tin e speransa di biba pa semper den Dios su husto mundo nobo. Na e tempo ei humanidad lo disfruta di salu perfecto di curpa y di mente sin tin nodi recori na hipnotismo.—Revelacion 21:3, 4.

[Nota]