E Punto di Bista Biblico

Odio Etnico Ta Hustifica?

C ON lo bo sinti si hende ta pensa cu bo ta un persona tramposo, violento, bobo of inmoral djis pasobra bo ta pertenece na un cierto grupo etnico?a Ta sigur cu lo bo no gusta esei. Lamentablemente, esaki ta loke miyones di hende ta experencia. Ademas, atrabes di historia humano un cantidad incontabel di hende inocente a yega di bira victima di abuso y asta a ser mata djis pa motibo di nan rasa of nacionalidad. Realmente, mayoria conflicto sangriento cu ta tuma luga awe ta debi na odio etnico. Toch, hopi hende cu ta apoya e tipo di violencia ei ta bisa cu nan ta kere den Dios y den Bijbel. Tin hende tambe cu ta pretende cu rasismo ta un parti di naturalesa humano, y pesei e t’ei pa keda.

Bijbel ta condena odio etnico? Tin circunstancia cu ta hustifica pa bo odia hende cu ta di un otro cultura of rasa? Tin speransa pa un futuro sin odio etnico? Kico ta e punto di bista biblico?

Nan Echonan A Condena Nan

Un repaso aribariba di e manera cu Dios a trata cu hende na antes kisas por pone un persona saca un conclusion robes, esta, cu eigenlijk Dios a apoya odio etnico. Tin varios relato di Bijbel cu ta describi Dios como un persona cu a ehecuta tribu- y nacionnan completo, no ta berdad? Si, pero un examinacion mas profundo ta indica cu Dios a condena e pueblonan aki pa motibo di e manera baho cu nan a ignora su leinan, y no pa motibo cu nan tawata di un cierto grupo etnico.

Por ehempel, Yehova Dios a condena e Cananeonan pa motibo di nan ritonan sexual degrada y demoniaco. Nan a asta kima nan yiunan como sacrificio na diosnan falso! (Deuteronomio 7:5; 18:9-12) Sinembargo, den algun caso tawatin cierto Cananeonan cu a demostra fe den Dios y a repenti. Pesei, Yehova a spar nan bida y a bendiciona nan. (Hosue 9:3, 25-27; Hebreonan 11:31) Un señora di Canan cu yama Rahab a asta bira antepasado di Hesucristo, e Mesias priminti.—Mateo 1:5.

E Lei cu Dios a duna e Israelitanan ta mustra cu e no ta haci distincion di persona. Al contrario, Dios ta desplega berdadero interes den e bienestar di tur hende. Na Levitico 19:33 y 34, nos ta haya e siguiente mandato yen di compasion cu Dios a duna e Israelitanan: “Ora cu un stranhero ta biba serca boso den boso tera, no trat’e malo. E stranhero cu ta biba serca boso mester ta pa boso manera un yiu di tera meimei di boso; stim’e manera bo mes, pasobra boso tawata stranhero na tera di Egipto: Ami ta SEÑOR boso Dios.” Den e bukinan biblico di Exodo y Deuteronomio nos ta haya mandamentonan similar. Ta bisto anto cu Yehova no a hustifica odio etnico. El a insisti pa tin harmonia entre gruponan etnico.

Hesus A Promove Tolerancia Etnico

Tempo cu Hesus tawata riba tera, Hudiu y Samaritano tawatin e tendencia di menosprecia otro. Na un ocasion e habitantenan di un pueblito Samaritano a nenga di ricibi Hesus djis pasobra e tawata un Hudiu cu tawata bayendo Herusalem. Con abo lo a reacciona riba e rechaso aki? E disipelnan di Hesus kisas a refleha e prehuicio cu a existi e tempo ei, ora nan a puntr’e: “Señor, bo kier pa nos ordena candela baha for di shelo y caba cu nan?” (Lucas 9:51-56) Hesus a laga e prehuicio di su disipelnan influenci’e? Al contrario, el a scual nan y di un manera pacifico el a bai busca luga di keda den un otro pueblo. Djis despues di esei Hesus a conta e parabola di e bon Samaritano. Esaki tawata un comparacion poderoso cu a mustra cu un persona su antecedente etnico so no ta hacie un enemigo. De echo, e por resulta asta di ta un bon prohimo!

Gruponan Etnico den e Congregacion Cristian

Durante su ministerio riba tera, Hesus a enfoca principalmente riba hende cu tawatin mesun nacionalidad cu ne pa haci nan su disipel. Pero el a indica cu otro hende tambe cu tempo lo a bira su disipel. (Mateo 28:19) Lo e acepta hende di tur grupo etnico? Si! Apostel Pedro a declara: “Di berdad mi ta compronde awor cu Dios no ta haci distincion di persona, ma den tur nacion e hende cu ta tem’e y cu ta haci husticia ta aceptabel p’e.” (Echonan 10:34, 35) Despues apostel Pablo a confirma e concepto aki ora el a bisa bon cla cu un persona su antecedente etnico no ta di ningun importancia den e congregacion cristian.—Colosensenan 3:11.

Den e buki biblico di Revelacion nos ta haya un otro indicacion cu Dios ta acepta hende di tur grupo etnico. Den un vision inspira door di Dios, apostel Huan a mira “un multitud grandi . . . di tur nacion y tur tribu y pueblo y lenga”, cu a ricibi salbacion for di Dios. (Revelacion 7:9, 10) E “multitud grandi” aki lo ta e fundeshi di un sosiedad humano nobo den cua hende di tur background lo biba hunto na pas, uni door di nan amor pa Dios.

Mientrastanto, cristiannan mester lucha contra e impulso pa husga otro hende a base di nan background etnico. E proceder husto y amoroso ta, di mira cada hende como un persona riba su mes—manera Dios ta mira nan—y no djis como hende di cierto grupo etnico. No ta asina bo kier pa hende considera bo? Cu rason Hesus a spierta nos: “Pesei, tur loke boso kier pa hende haci pa boso, haci mescos pa nan.” (Mateo 7:12) Ta dushi pa biba sin odio etnico. Hende lo tin mas pas mental y nan lo ta na pas un cu otro. Loke ta mas importante, e ta trece nos den union cu nos Creador imparcial, Yehova Dios. Ki un motibo fuerte pa rechasa odio etnico!

[Nota]