Un Beneficio pa Comunidad

DI UN ESCRITOR DI SPIERTA! NA SPAÑA

PA SIGLONAN ciudadnan Spaño tawata duna tereno gratis pa traha luganan di adoracion. Autoridadnan municipal tawata di opinion cu fe religioso lo a beneficia nan comunidad. Siendo cu catolicismo tawata e religion estatal, propiedad municipal tradicionalmente tawata ser duna casi exclusivamente na Iglesia Catolico. Pero tempo a cambia.

Na 1980 un lei Spaño cu a garantisa libertad di religion, a declara cu “ningun religion lo ta e religion Oficial di Estado.” Esaki a motiva algun funcionario municipal pa reconoce publicamente e trabou cu Testigonan di Yehova ta haci. Como prueba di e reconocemento aki, nan a duna nan tereno gratis pa construi Salonnan di Reino.

Varios municipio a expresa e opinion cu tal donacion ta bon mereci debi na “e caracter educativo di e obra [di Testigonan di Yehova]”, y debi na su “beneficionan publico y social.” Otro funcionarionan a menciona “e presencia notabel di Testigonan di Yehova den e ciudad” y “e echo cu nan obra no ta wordo haci cu e proposito di haci ganashi.”

E Testigonan a traha hopi di nan Salonnan di Reino denter di 48 ora, haciendo uzo di metodonan special di construccion implementa door di teamnan di construccion cu a consisti di Testigonan boluntario. E alcalde di ciudad La Línea, den parti suitwest di Spaña, a comenta: “E actitud sin egoismo di e boluntarionan a impresiona mi masha, y mi ta kere cu nan merece nos apoyo. Nos tin mester di mas hende cu e actitud aki den e mundo dividi djawe.” El a yama e Salon di Reino nobo “un monumento na e spirito di cooperacion.”

Biciñanan tambe a observa e spirito of actitud di cooperacion aki. Durante e construccion di dos Salon di Reino pega na otro na Vitoria, den nort di Spaña, Marian, cu ta biba djis eibanda, a bisa: “Si tur hende tawata refleha e clase di amor aki, e problemanan cu nos ta sufri di dje awe, lo no a existi.” Despues cu un arkitecto local a mira construccion di e edificio, el a declara: “Mi kier ta un Testigo di Yehova pa mi por sinti boso goso!”

Den e ciudad Zaragoza, den nortost di Spaña, funcionarionan a duna e Testigonan un tereno di 600 meter cuadra gratis. Un corant local a describi e sitio di construccion manera “un neishi di fruminga di Testigonan di Yehova, y centenares di fruminga trahando hunto.” Biciñanan a duna e trahadonan un caloroso bonbini. Un di e biciñanan a bisa: “Pastonan a pone mi perde mi fe, pero boso a duna mi e bek.”

E Testigonan ta gradicido pa e yudansa cu tanto biciña- como autoridadnan local ta duna na e construccion di nan luganan di adoracion. Nan ta dicidido pa uza nan Salonnan di Reino pa e miho obra educativo cu tin disponibel pa comunidad: e obra di predica y siña e Palabra di Dios.

[Plachi na pagina 29]

La Línea, Cádiz, Spaña