Tahiti y e Buskeda di Paradijs

Pa hopi dia olanan di Lama Pacifico a suta e barco. Den e solo cayente, e nabegantenan tawata ripiti incansablemente e mesun rutina monotono. Sin duda nan tawata harta di e biña marga, di e awa bomba y di cuminda daña. Diripiente un di nan a grita: “Tera! Tera nos dilanti na man robes aya!” Leu aya nan por a mira e punta vago di un isla. Un par di ora despues, no tawatin duda mas: nan a yega un isla.

For di dia Europeonan a mira Tahiti pa prome bes, el a bira sinonimo di e palabra “paradijs.” E explorado Frances di siglo 18, Louis-Antoine de Bougainville, kende a guia e expedicion describi na cuminsamento, a skirbi despues: “Den mi pensamento ta den e hofi di Eden mi a yega.” Dos siglo despues ainda Tahiti ta atrae bishitante. Mescos cu esnan cu a bai mas prome, hopi hende ta bin en busca di paradijs.

Pero pakico hende ta asina fasina cu e soño di paradijs? Y dicon nan a mira Tahiti como e realisacion di e soño ei? Laga nos bai bek na cuminsamento di hende su existencia pa haya sa e contestanan.

Paradijs Perdi

No ta pornada e palabra “paradijs” ta resona den nos horea, pasobra simplemente nos a wordo crea pa biba den Paradijs! Segun Bijbel, Dios a bendiciona nos prome mayornan cu un hogar cu a wordo describi como un “paradijs”—un bunita parke of hofi. (Genesis 2:8) Aparentemente e parke aki tawata ocupa parti di e region cu yama Eden, cu ta nifica “Placer.” Aunke e sabionan di actualidad tin tendencia di mira Eden como un mito, Bijbel ta present’e como un realidad historico y ta duna detayenan confiabel di unda e tawata situa originalmente. (Genesis 2:10-14) Dos riu, esta Pison y Gihon, cu lo por a yuda nos haya sa unda e hofi tawata, no ta existi mas, pesei e sitio exacto di e hofi ta desconoci.

Nos prome mayornan a rebela contra Dios y pesei nos tur a perde Paradijs. (Genesis 3:1-23) No obstante, hende no por a elimina e deseo pa paradijs for di nan curason. Den mitologia di hopi pais tin caracteristicanan di e relato di Bijbel tocante dje. Por ehempel, e Griegonan a desaroya e mito di un Epoca di Oro, esta, un tempo ideal cu humanidad a hiba un bida trankil y pacifico.

Varios hende a purba haya e Eden cu hopi tempo pasa a bai perdi. Algun a busca Eden na Etiopia, sin exito naturalmente. Segun leyenda un pasto di siglo 6 cu yama Brendan a haya paradijs riba un isla den suitwest di Lama Atlantico. Otro leyendanan a pretende cu paradijs tawata scondi riba un sero halto. Frustra cu e contradiccionnan di e leyendanan aki, e famoso explorado Christoffel Columbus a lamenta: “Mi no a haya ni nunca mi no a lesa un texto Latin of Griego cu a bisa cu tur siguransa den ki skina di e planeta aki por haya e paradijs.” Cu tempo, el a haya e conviccion cu e tawata situa un caminda na suit di equator.

Despues di su tercer biaha pa e Mundo Nobo, Columbus a bisa: “E tera aki ta parce e paradijs, pasobra e ta cuadra cu e descripcion di e santonan y e teologonan erudito cu mi a menciona.” Sinembargo, e Mundo Nobo no tawata e paradijs cu Columbus a imagina.

Utopianan di Futuro

No obstante, algun erudito no a laga nada stroba nan. En bes di promove e idea di bai Eden bek, nan a bin cu e concepto di un futuro Paradijs cu hende a traha. Escritornan a cuminsa plama cuentanan di comunidadnan “perfecto”—un contraste ideal pa e comunidadnan corumpi den cua nan tawata biba. Sinembargo, ningun di e conceptonan imaginario aki tawata berdaderamente manera Eden. En bes di imagina nan un bida di libertad den un parke sin frontera, e personanan cu a bin cu e conceptonan aki a soña di un paradijs den forma di un stad bon organisa. Den siglo 16 por ehempel, e estadista Britanico Sir Thomas More a conta di un biahe imaginario pa un tera cu el a yama Utopia. E palabra aki ta nifica “niun caminda.”

Escritornan cu a bin despues a amplia riba e ideanan di More door di agrega algun di nan mes ideanan. Durante e siguiente siglonan hopi escritor Europeo a inventa nan mes “utopianan.” Atrobe, e comunidadnan “ideal” imaginario aki sigur no tawata hardinnan di placer. E promotornan di Utopia a purba mustra con felis e hendenan por ta door di impone reglanan stricto. Pero cu esei nan a frena hende su creatividad y libertad. No obstante, manera e profesor di historia Henri Baudet a remarca, e soñonan di un comunidad ideal a revela un “deseo continuo pa un miho bida . . . y un comunidad mas husto.”

Tahiti—Origen di un Leyenda

Den siglo 18, e lama birgen di suit a ofrece exploradonan un ultimo chens di descubri un paradijs. Pero ora Bougainville a nabega bai den direccion di Lama Pacifico na december 1766, su motibonan tawata principalmente pa explora, conkista colonianan nobo, y habri mercadonan nobo.

Despues di a pasa lunanan largo riba lama, Bougainville a descubri Tahiti. E no por a tira anker na e otro islanan cu el a mira pasobra ref di coral a strob’e di yega serca. Na Tahiti si e por a baha sin problema. Ei e nabegantenan morto cansa a topa un pueblo amigabel y un isla cu hopi rikesa natural. Loke nan a mira aparentemente a surpasa nan imaginacion. Tahiti tawata un paradijs tropical y hopi di su caracteristicanan a parce esnan di e utopianan di imaginacion.

Por ehempel, Tahiti tawata un comunidad di isla mescos cu e teranan di utopia cu hende tawatin den nan imaginacion. Ademas, en berdad e tawata parce un paradijs. Su paisahe natural pintoresco, rico na vegetacion, a conta cu centenares di waterval y riu di awa cu ta core rapido. Mata y palo berde a crece y bona den naturalesa. E clima saludabel di Tahiti y ausencia di e peligernan cu ta tipico pa paisnan tropical a contribui na e bunitesa di e isla aki. No tawatin colebra, ni insecto peligroso ni volcan activo riba e isla aki.

Anto tawatin e Tahitianonan mes tambe—hende halto, bon tipo y saludabel. Nan djentenan blanco a impresiona e nabegantenan cu a perde djente riba lama y cu tawatin nan carni di djente tur hincha debi na e malesa di scheurbuik. Tambe e habitantenan tawata hende alegre; masha lihe nan a atrae e nabegantenan cu nan hospitalidad. Ademas, por lo menos na prome bista, a parce cu tur e Tahitianonan tawata igual—un di e caracteristicanan basico di literatura tocante utopia. Nan no tawata conoce pobresa. E Tahitianonan a biba sin restriccion sexual. En berdad, e nabegantenan a tene relacion inmoral cu algun di e bunita mucha mohenan Tahitiano.

Si, pa Bougainville y su nabegantenan, Tahiti a parce un Eden recobra. Pesei el a bandona e isla, ansioso pa conta mundo tocante e paradijs cu el a descubri. Ora el a completa su biahe di tres aña rond mundo, el a publica un buki di su aventuranan. E best-seller aki a plama e mito cu e isla exotico tawata perfecto den tur sentido. Paradijs a bai perdi, pero tur cos a mustra cu ta Tahiti tawata e berdadero Paradijs cu hende por a disfruta di dje awor!

E Peligernan di un Mito

Pero hopi bes mitonan ta choca cu realidad. Por ehempel, e Tahitianonan a sufri di enfermedad y muri mescos cu tur otro hende. Y no ta tur tawata igual pasobra tawatin diferente nivel social y na dado momento nan a biba bou di un gobernacion stricto cu tawata asta opresivo. Tawatin guera entre e tribunan y nan tawata ofrece sacrificio humano. Mescos cu hende en general, no ta tur Tahitiano tawata un beyesa of tawatin nechi tipo. Y e historiado K. R. Howe ta kere cu e mohenan cu Bougainville su hombernan a topa probablemente a wordo “manda pa sirbi como prostituta” pa haci e invasornan contento.

Toch, e mito di “paradijs haya” a plama mas y mas. Escritornan y artistanan, manera e pintor Frances Paul Gauguin, a basha bai ayanan. E manera colorido cu Gauguin a describi bida na Tahiti a yuda aumenta e popularidad di e isla. Cu ki consecuencia pa Tahiti? E mito a pinta un concepto demasiado simplifica di e isla y su habitantenan. Ora cu hende bai Tahiti y despues regresa cas, un di e preguntanan cu nan ta haya semper ta: “Conta nos di bo aventuranan cu e mohenan di Tahiti.”

Paradijs—Un Speransa Perdi?

Den añanan resien Tahiti a pasa den mas problema. Ciclon a suta e isla na cuminsamento di decada 80 di siglo pasa, dañando su rifnan di coral. Pero e menasa mayor a bin di hende mes. Proyectonan di construccion a causa erosion di tera y contaminacion. Donna Leong, un experto riba maneho di sushi, ta bisa: “E industria di turismo ta genera gran cantidad di sushi. . . . Si Tahiti y e otro islanan no cuida nan medio ambiente, nan lo no ta e tera di un flora y fauna abundante ni lagonan blou manera cristal mas.”

No obstante, e speransa di un paradijs restaura no ta morto, pasobra Hesucristo mes a priminti un malechor repenti: “Lo bo ta serca mi den Paraiso”! (Lucas 23:43) Hesus no tawata referiendo na un utopia rigido, manera hende ta imagina nan, sino na un paradijs mundial, supervisa pa un gobierno celestial.a E mas cu 1.700 Testigonan di Yehova na Tahiti ta pone nan speransa den e futuro Paradijs aki. Nan ta ofrece nan tempo pa comparti e speransa ei cu nan prohimo. Aunke e bunita isla di Tahiti tin hopi caracteristica di un paradijs, e no ta nada na comparacion cu e Paradijs mundial cu Dios lo trece pronto. E buskeda pa e Paradijs aki no ta en vano.

[Nota]

[Plachi na pagina 24]

Tahiti tawata parce un paradijs di encanto

[Reconocemento]

Pintura di William Hodges, 1766

Yale Center for British Art, Paul Mellon Collection, USA/Photo: Bridgeman Art Library

[Plachi na pagina 25]

Tahitianonan amigabel a mustra hospitalidad na Bougainville

[Reconocemento]

Cu permit di National Library of Australia NK 5066

[Plachi na pagina 26]

Pa Testigonan di Yehova ta un placer pa papia cu nan prohimo tocante e Paradijs cu lo bin pronto

[Reconocemento pa Potret na pagina 25]

Potret pa cortesia di Tahiti Tourisme

[Reconocemento pa Potret na pagina 27]

Pagina 26: Hende sinta den canoa, waterval, y background: Potretnan pa cortesia di Tahiti Tourisme