Hobennan Sa Puntra . . .

Con Mi Por Logra Haya Mi Propio Identidad?

“Mi tata ta un anciano bon conoci den un congregacion di Testigonan di Yehova. Mi tin respet p’e, pero tin bes mi no ta gusta e echo cu tur caminda hende conoce mi simplemente como yiu di Bill.”—Larry.a

“Door cu mi tata ta un anciano prominente, mi tawata sinti cu tur hende tawata spera hopi di mi, y tawata masha dificil pa mi ta mi mes.”—Alexander.

SEGUN cu bo ta bira grandi, ta masha normal pa bo desea un grado di independencia, esta, pa bo por haya bo propio identidad of reputacion. Ora bo a nace bo mayornan a scohe un nomber pa bo cu nan a gusta. Awor cu bo ta creciendo, bo kier tin e oportunidad pa scohe bo propio “nomber”, es decir, traha bo propio reputacion.

Rei Salomon a skirbi: “Un bon nomber ta mas di desea cu gran rikesa, y aprecio ta miho cu plata y oro.” (Proverbionan 22:1) Probablemente lo bo kier cuminsa haya bo propio identidad for di awor cu bo ta jong.

Identifica cu Bo Mayornan

Mescos cu Larry y Alexander, algun hoben ta sinti cu nan ta wordo identifica cu e nomber y logronan di nan mayornan. Kisas nan mayornan ta bon conoci den comunidad pa motibo di nan trabou of educacion. Of kisas nan ta bon conoci den e congregacion cristian. Si bo mayornan ta den un di e situacionnan aki, tin bes lo bo por sinti cu bo ta den spotlight y cu hende ta wak tur cos cu bo haci. Kisas bo no ta gusta e presion cu bo ta haya pa comporta bo mes di cierto manera djis pa motibo cu bo mayornan ta bon conoci.

Por ehempel, Ivan su tata ta un anciano den un congregacion di Testigonan di Yehova. Ivan ta bisa: “Door cu tur hende tawata conoce mi tata y e tawata un homber respeta, semper mi a sinti cu mi mester tawata un bon ehempel tanto na scol como na cas. Mi tawata sinti cu otro mayornan tawata mira mi como un ehempel pa nan yiunan. Maske esaki ta duna bo un dushi sintimento, e tawata pone mi bou di presion pisa pa mi comporta mi mes bon dilanti otro hende. Como consecuencia, tin bes mi tawata bira orguyoso y no tawata kier a reconoce mi foutnan.” Alexander ta bisa: “Mi tawata sinti cu henter ora bai hende ta wak loke mi ta haci, anto si mi a haci un fout, nan tawata cla pa mustra dede riba mi.”

Larry, cu a ser menciona na comienso di e articulo aki, a purba di no hala atencion na su mes door di keda sin bisa hende su fam. E ta bisa: “Ora mi a topa un hende pa prome bes na un get-together, mi tawata bis’e: ‘Conta bai, mi nomber ta Larry’, anto para einan, sin bisa mi fam. Ora mi mester a firma, si tawata posibel, mi tawata pone mi prome nomber so. Mi tawatin miedo cu hende lo trata mi diferente si nan a haya sa ta yiu di ken mi ta. Mi tawata kier pa mi amigonan trata mi normal.”

Naturalmente, ta logico cu si bo tata ta un anciano cristian of un sirbido ministerial, hende kisas lo spera hopi di bo. Con cu bai bin, hombernan nombra den tal puesto di responsabilidad mester “sa di maneha nan yiunan y nan mes cas.” (1 Timoteo 3:5, 12) Pues, no ta nada straño cu hende ta spera pa bo ta un bon ehempel! Pero esei riba su mes ta algo malo? No si bo tuma na cuenta cu Pablo a scohe e hoben cristian Timoteo, tempo cu e tawata un teenager ainda, pa biaha cu ne y participa den e trabou importante di sirbishi. (1 Tesalonicensenan 3:1-3) Bo tin cu percura pa bo ta un bon ehempel, sea cu bo tata ta un anciano nombra of no.

No Ta Sabi pa Rebela

Toch, algun hoben ta purba haya nan propio identidad door di rebela. Ivan ta bisa: “Tawatin momento cu mi tawata sinti mi irita pa motibo cu mi mester ta un bon ehempel. Mi tawata rebela door di wak te con largo mi por a laga mi cabei crece sin cu un hende bisa mi algo.”

Absalon, un di Rei David su yiunan, a rebela. Su tata tawata bon conoci pa su debocion na Yehova y hopi hende den e nacion di Israel tawata stim’e. Como yiu di David, hende tawata spera hopi di dje. En bes di haci e cosnan cu hende por a spera di dje, Absalon a scohe pa duna su mes e mala fama di a rebela contra su tata. Pero siendo cu David tawata un representante scohi pa Yehova, en realidad Absalon tawata rebelando contra Yehova. Su accionnan a causa berguensa pa su famia y calamidad pa su mes.—2 Samuel 15:1-15; 16:20-22; 18:9-15.

Rebeldia por tin consecuencianan desastroso pa abo tambe. Pensa un rato riba loke Bijbel ta conta nos tocante Nehemias. Algun di su enemigonan a purba pon’e bai contra principionan di Dios. Dicon nan a haci esei? Nehemias a bisa: “Esei lo a duna nan motibo pa cana papia malo di mi y susha mi nomber.” (Nehemias 6:13, Beibel na papiamentu koriente) Rebeldia lo por duna bo un mal nomber, esta, un nomber cu hende lo no lubida lihe.

Loke tampoco bo no mester pasa por halto ta e efecto cu conducta rebelde por tin riba otro hende. Pa cuminsa, bo ta haci bo mayornan tristo sin tin nodi. (Proverbionan 10:1) Tambe bo accionnan por tin un efecto negativo riba otro hobennan. Ivan ta reconoce: “Mi conducta tawatin un mal efecto riba mi ruman homber. Pa un tempo el a bandona e congregacion cristian completamente y a haci net e cosnan cu e tawata sa cu no ta na harmonia cu normanan biblico. Menos mal cu el a bin bei y awor e ta sirbi Yehova atrobe y ta felis.”

Un Miho Manera

Absalon su ruman parti di tata, Salomon, a scohe un otro rumbo. E tawata dispuesto pa siña humildemente for di su tata, David. (1 Reinan 2:1-4) En bes di busca fama pa su mes, Salomon a busca manera pa traha un bon nomber den bista di Dios. Tanten cu el a haci esei, el a duna honor na su famia y a bira conoci como un di e reinan mas famoso di Israel.—1 Reinan 3:4-14.

E bon ehempel di Salomon ta siña nos dos punto importante: Di prome, bo ta haya bo propio identidad, no door di aleha di bo famia, sino door di siña di e cosnan bon di bo famia. E revista Adolescence ta bisa: “Di ningun manera hobennan no mester sinti cu durante adolecencia nan mester aleha di nan mayornan pa nan por echt haya nan propio identidad.” Segun e revista, e echo cu bo “mayornan ta yuda bo no ta stroba bo” di haya bo propio identidad; “al contrario, ta yuda nan ta yuda bo desaroy’e.”

Ta interesante cu Salomon mes a conseha: “Scucha na bo tata cu a engendra bo, y no desprecia bo mama ora cu e bira bieu.” (Proverbionan 23:22) Claramente Salomon no a dirigi su mes na mucha chikito pasobra ora mayornan “bira bieu”, e yiunan probablemente ta adulto caba. Pues, kico ta e punto? Asta si bo ta grandi caba y bo tin bo mes famia, toch bo por sigui beneficia di e sabiduria di bo mayornan. Ivan a bin compronde esei. El a bisa: “Segun cu mi ta bira grandi, mi ta purba imita e cosnan bon di mi mayornan y evita nan foutnan.”

E di dos punto cu nos ta siña ta cu Salomon su prioridad tawata, no pa purba haya su propio “identidad”, sino pa agrada Yehova. Si, hende tawata spera hopi di dje door cu e tawata yiu di David. Pero loke a yuda Salomon carga su responsabilidadnan tawata cu el a depende riba Yehova. Alexander tambe a scohe pa mira cosnan di e manera ei. El a bisa: “Awor mi ta acepta e echo cu por lo general mas ta ser spera di yiunan di anciano. Mi a dicidi di uza e punto di bista aki di un manera positivo, y esaki a resulta di ta un proteccion pa mi. Mi a bin realisa cu e cos di mas importante ta loke Yehova ta pensa di mi. E conoce mi pa loke mi ta y no djis pa yiu di ken mi ta.”

Daryn su tata ta un graduado di e Scol Biblico di Galad di Watchtower.b E scol aki ta entrena misioneronan. Daryn tambe a siña con pa deal cu e echo cu su mayornan ta bon conoci. El a bisa: “Ora mi a batisa, mi a dedica mi mes na Yehova y no na ningun otro hende. Door di haci tur mi esfuerso pa cumpli cu mi dedicacion, mi ta sinti un pas cu ta bin di e echo cu mi sa cu Yehova ta contento cu mi, asta si mi no por cumpli cu tur e cosnan cu mi mayornan a haci.”

Rei Salomon a haci e siguiente remarke: “Te asta un mucha ta conoci pa su echonan, si su conducta ta puro y recto.” (Proverbionan 20:11) Al fin y al cabo, hende lo corda bo pa loke bo bisa y haci. Percura pa bo ta un ehempel “den palabra, conducta, amor, fe y puresa.” Si bo haci esei, hende lo stima bo y respeta bo pa loke bo ta!—1 Timoteo 4:12.

E problema di otro hobennan ta cu nan no kier wordo identifica cu nan rumannan cu ta hopi exitoso. Den futuro, un articulo lo splica bo con bo por deal cu e reto aki.

[Nota]

[Plachi na pagina 26]

Bo bon ehempel por beneficia otro hende

[Komentario na pagina 26]

Loke bo ta logra cu rebeldia ta di haci bo mayornan tristo y daña bo nomber