Belasting Ta e Prijs pa Por Tin un “Sosiedad Civilisa”?

“Belasting ta e prijs cu nos ta paga pa nos por tin un sosiedad civilisa.”—Inscripcion riba e edificio di Departamento di Belasting, Washington, D.C.

GOBIERNONAN ta argumenta cu belasting ta un necesidad desagradabel pero inevitabel, e prijs cu nos tin cu paga pa nos por tin un “sosiedad civilisa.” Sea cu bo ta di acuerdo cu e opinion ei of no, nos no por nenga cu por lo general e ta un prijs halto.

Nos por parti belasting den dos categoria: direct y indirect. Algun ehempel di belasting direct ta belasting riba entrada, riba ganashi y riba propiedad. Di esakinan, belasting riba entrada (inkomstenbelasting) ta probablemente esun cu mas ta irita hende. Esaki ta specialmente e caso den paisnan caminda belasting riba entrada ta progresivo, es decir, mas bo gana, mas belasting bo ta paga. Criticonan ta argumenta cu belasting progresivo ta straf hende pa nan trabou duro y pa nan exito.

OECD Observer, un publicacion di e Organisacion pa Cooperacion y Desaroyo Economico, ta recorda nos cu fuera di paga belasting na gobiernonan central, “hende cu tin entrada kisas tin cu paga inkomstenbelasting local, regional, provincial of estatal ademas di e inkomstenbelasting cu nan tin cu paga na gobierno central. Esaki ta e caso na Belgica, Canada, Corea, Hapon, Islandia, Merca, paisnan di Scandinavia, Spaña y Suisa.”

Belasting indirect ta entre otro, omzetbelasting, accijns riba bebida y sigaria, y derecho di importacion y exportacion. E tipo di belastingnan aki ta menos bisto cu belasting direct pero toch nan por ta un golpi financiero duro pa hende pober. Den e revista Frontline di India, escritor Jayali Ghosh a argumenta cu ta un mito cu pagadonan di belasting di clase medio y esnan rico ta esnan cu ta paga e parti mas grandi di belasting di India. Ghosh a bisa: “Pa e gobiernonan estatal, belasting indirect ta forma mas cu 95 porshento di e cantidad total cu nan ta ricibi di belasting. . . . Probablemente ta hende mas pober ta esnan cu en realidad ta paga un parti mas grandi di nan entrada na belasting, compara cu loke hende rico ta paga.” Belasting halto riba articulonan cu gran cantidad di hende ta uza, cosnan manera habon y cuminda, evidentemente ta causa e diferencia aki.

Pero ta kico gobiernonan ta haci cu tur e placa cu nan ta cobra?

Na Kico e Placa Ta Bai

Nos mester admiti cu ta costa masha hopi placa mes pa gobiernonan funciona y percura servicionan necesario. Por ehempel, na Francia 1 di cada 4 persona ta ambtenaar. Esaki ta inclui docentenan, trahadonan di postkantoor, personal di museo y hospital, polis y otro empleadonan di gobierno. Mester di belasting pa paga nan salario. Tambe ta placa di belasting ta paga pa caminda asfalta, scol y hospital y e ta yuda paga e gasto di servicionan manera recohemento di sushi y entrega di post.

E gasto militar ta un otro motibo importante pa cobra belasting. Na principio nan a cobra belasting riba entrada di Britaniconan rico pa financia e guera contra Francia na 1799. Sinembargo, durante Segundo Guera Mundial gobierno Britanico a cuminsa exigi di e clase laboral pa nan paga nan parti di belasting riba entrada. Awendia, te ainda ta costa hopi placa pa financia un nacion su forsanan arma, asta den tempo di pas. E Instituto Internacional di Investigacion pa Pas na Stockholm a calcula cu mundialmente e nacionnan su gasto militar na aña 2000 tawata aproximadamente 798 mil miyon dollar.

Medida pa Trece Cambionan Social

Belasting ta sirbi tambe como un manera pa trece cambionan social, un medio pa stimula of descurasha cierto comportacion. Por ehempel, cobrando accijns riba alcohol supuestamente ta frena bebemento di mas. Pesei den hopi pais, 35 porshento di e prijs di un cerbes ta consisti di belasting.

Riba tabaco tambe nan ta cobra accijns pisa. Na Sur Africa, 45 porshento di e costo di un paki di sigaria ta consisti di belasting. Sinembargo, no ta semper gobierno su motibo pa promove e tipo di belastingnan ei ta puramente pa bienestar di ciudadano. Manera escritor Kenneth Warner a comenta den e revista Foreign Policy, tabaco ta “un forsa economico potente cu anualmente ta genera miles di miyones di dollar na benta y miyones mas na entrada di belasting.”

Na principio di siglo 20 tawatin un ehempel notabel di uza medida pa cambia comportacion social. Legisladonan Mericano tawata busca un manera pa stroba formacion di dinastianan di famia rico. Con? Door di bin cu belasting riba propiedad hereda (successierecht). Ora un homber rico muri, belasting ta kita un porcion grandi for di e rikesa cu el a acumula. Esnan cu ta boga pa esaki ta argumenta cu e belasting “ta saca fondo for di famianan aristocrat y ta uza e placa ei na bienestar di e masanan y di comunidad.” Podise ta asina, pero pagadonan di belasting cu ta rico a desaroya cantidad di strategia pa reduci e suma di e belasting ei.

Gobiernonan ta sigui uza belasting pa promove varios desaroyo social, manera por ehempel medioambiente. The Environmental Magazine a informa: “Nuebe pais di West Europa resientemente a implementa cambionan den belasting di medioambiente, principalmente como un manera pa reduci contaminacion di aire.” Belasting progresivo riba entrada, menciona anteriormente, tambe ta un otro intento pa trece cambionan social; e idea ta pa asina reduci e diferencia grandi cu tin entre rico y pober. Tambe algun gobierno ta permiti hende deduci cierto montante si nan haci donacion na organisacionnan caritativo of si nan ta pareha cu tin yiu.

Dicon Lei di Belasting Ta Asina Complica?

Ki ora cu propone un belasting nobo, legisladonan ta purba sera tur posibel buraco den e lei. Corda: Ta sumanan gigantesco ta den wega. Cu ki resultado? Leinan di belasting sa ta complica y sumamente tecnico. Un articulo den e revista Time a splica cu hopi di e complicacionnan di lei di belasting Mericano “ta relaciona cu e definicion di kico ta entrada”, es decir, con pa determina riba ki entrada mester paga belasting. Mas complicacion ta bin door di miles di regla “cu ta permiti varios deduccion y despensacion.” Pero no ta Merca so tin leinan complica di belasting. Un publicacion resiente di e leinan fiscal di Gran Bretania y Nort Irlanda tawata consisti di 9.521 pagina, y a yena dies tomo.

E Departamento di Investigacion di Sistema di Belasting na Universidad di Michigan a informa: “Tur aña pagadonan di belasting Mericano ta dedica mas cu tres mil miyon ora na yena nan papel di belasting. . . . En total, e tempo y placa cu pagadonan di belasting Mericano ta dedica [na yena papel di belasting] ta suma te na 100 mil miyon dollar pa aña, of 10% di e belasting cu ta ser cobra. Gran parti di e suma aki cu hende ta paga pa cumpli cu lei di belasting ta debi na e manera sumamente complica cu lei di belasting ta.” Reuben, menciona na principio di e prome articulo di e serie aki, a bisa: “Antes mi mes tawata purba yena e papel di belasting, pero esei tawata tuma hopi tempo, y hopi bes mi tawata sinti cu mi tawata paga mas di loke mi mester paga. Pesei awor mi ta paga un accountant pa e yena mi papelnan di belasting.”—Wak e cuadro “Cumpliendo cu Lei di Belasting”, na pagina 8.

Tin Ta Paga, Otronan Ta Evita, y Tin Esnan Cu Ta Evadi

Mayoria hende lo reconoce, maske ta di mala gana, cu belasting ta trece beneficio pa nan comunidad. Hefe di e Departamento di Belasting Nacional Britanico a yega di splica: “Niun hende no ta gusta paga belasting riba entrada, pero masha tiki hende lo argumenta cu nos lo ta miho sin dje.” Tin experto ta calcula cu na Merca te cu 90 porshento di esnan cu mester paga belasting ta paga. Un autoridad di belasting a admiti: “Gran parti di esnan cu no ta cumpli cu belasting ta pasobra cu e lei y proceduranan ta dificil, y no ta asina cu deliberadamente nan ta evadi [ontduik] belasting.”

Asina mes, hopi hende ta haya maneranan pa evita di paga cierto belasting. Por ehempel, considera loke un articulo den U.S.News & World Report ta bisa tocante belasting riba ganashi: “Hopi empresa na un manera legal ta evita di paga un gran parti di nan belasting—y tin biaha henter nan belasting—door di haci uzo di gastonan cu nan por deduci y di maniobranan den tenemento di buki.” Dunando un ehempel di esei, e articulo a sigui bisa: “Un compania Mericano ta establece un empresa den un pais den exterior cu tin tarifanan hopi faborabel di belasting. Caba e ta haci e compania Mericano un filial di e empresa den exterior.” Di e manera ei e compania no tin cu paga belasting Mericano—cu lo por ta te cu 35 porshento—apesar cu e “oficina principal [den exterior] kisas no ta nada mas cu un cashi di file y un adres.”

Tambe tin hende cu deliberadamente ta bula pipa pa paga belasting na maneranan ilegal, locual ta ser yama evasion di impuesto. Segun un informe, den un cierto nacion Europeo nan ta considera evasion di impuesto como un “deporte nacional.” Segun un encuesta na Merca, solamente 58 porshento di hende homber entre 25 pa 29 aña ta kere cu ta malo pa no declara tur entrada cu bo tin. E autornan di e encuesta a admiti: “E informe ta revela cu e nivel di etica y moralidad di nos sosiedad ta laga hopi di desea.” Na Mexico nan ta calcula cu 35 porshento di pagado di belasting ta evadi impuesto.

Pero en general, hende ta reconoce cu belasting ta necesario y nan no ta worry cu nan tin cu paga loke nan debe. Sinembargo, e palabranan famoso atribui na Tiberio Cesar ta parce berdad: “Un bon wardado ta pela su carnenan, no soya nan.” Si bo ta sinti cu bo ta victima di un sistema di belasting cu ta parce un peso, inhusto y demasiado complica, con precis bo mester mira pagamento di belasting?

[Cuadro na pagina 7]

Pensa Prome Cu Bo Muda!

Sistemanan di belasting ta varia di un pais pa otro. De echo, belasting local riba entrada por varia drasticamente den e mesun pais. Ta bale la pena considera si bo mester muda pa un area caminda tarifa di belasting ta mas abou? Kisas, pero lo bo mester pensa bon prome cu bo muda.

Por ehempel, un articulo den e revista OECD Observer ta recorda lectornan cu nan no tin cu wak solamente e tarifa basico di belasting riba entrada. E revista a bisa: “E aanslag definitivo di cada pagado di belasting ta refleha tambe e impacto di varios deduccion.” Por ehempel, algun pais tin un tarifa abou di inkomstenbelasting. Pero nan ta ofrece “masha tiki cos basico cu bo por deduci of haya despensacion p’e.” Como resultado, lo bo por haya bo ta paga mas belasting cu den paisnan caminda e tarifa ta halto pero cu ta duna bo mas cos cu bo por deduci of haya despensacion p’e.

Na Merca, algun hende ta pensa pa muda pa estadonan cu no tin belasting riba entrada. Pero esaki necesariamente ta yuda nan spar placa? No segun e buki Kiplinger’s Personal Finance (Finanza Personal di Kiplinger), cu ta bisa: “Den varios caso, nos investigacion a revela cu e estadonan cu no tin belasting riba entrada ta compensa esei door di cobra tarifanan mas halto di belasting riba propiedad, di omzetbelasting y otro categorianan di belasting.”

[Cuadro na pagina 8]

Cumpliendo cu Lei di Belasting

Pa hopi di nos, pagamento di belasting ta un carga cu ta causa stress. Pesei Spierta! a pidi un experto di belasting pa duna algun sugerencia practico.

“Busca bon conseho. Esaki ta importante, pasobra lei di belasting por ta complica. Anto masha poco biaha nan sa acepta e excuse cu bo no tawata sa kico lei ta bisa, como un excuse valido pa no a cumpli cu lei. Aunke un pagado di belasting kisas ta pensa cu funcionarionan di belasting ta su enemigo, net nan hopi bes por duna instruccionnan exacto y simpel tocante con pa trata cu asunto di belasting. Autoridadnan di belasting ta prefera pa bo yena bo aangifte bon for di e prome biaha. Nan no kier hiba bo dilanti pasobra bo no a cumpli cu lei.

Si bo asuntonan financiero ta complica, busca conseho serca un profesional di belasting. Pero tene cuidou! Aunke tin hopi profesional di belasting cu tin bo bienestar na pecho, tambe tin bastante cu no tin esei. Busca un recomendacion serca un amigo of conoci di negoshi, y investiga e credencialnan di e profesional.

Actua umbes. Bo por haya boet pisa ora bo entrega bo papel di belasting laat.

Tene bo bukinan na ordo. Sea cual sea bo sistema di administracion, percura pa ten’e na ordo. Di e manera ei lo bo tin masha tiki trabou na momento di yena bo papelnan di belasting. Tambe lo bo ta den un miho posicion den caso cu nan mester controla bo bukinan.

Sea honesto. Kisas bo por sinti e tentacion pa gaña of adapta e reglanan un tiki na bo cumbiniencia. Pero funcionarionan di belasting tin hopi manera ingenioso pa detecta deduccionnan falso. Semper ta miho pa bo ta honesto.

Sea bon informa. Si bo paga un hende pa yena bo papel di belasting y e entrega informacion robes, toch abo ta keda responsabel. Pesei percura pa bo representante actua di acuerdo cu bo deseonan.”

[Plachi na pagina 7]

Den hopi pais nan ta cobra accijns halto riba productonan di tabaco y bebida alcoholico

[Plachinan na pagina 8, 9]

Belasting ta financia hopi di e servicionan cu nos ta acepta como normal