Un Bishita na e Isla di Glas
DI UN ESCRITOR DI SPIERTA! NA ITALIA
UN ARTESANO maestro ta hinca su pipa of tubo di supla glas den e buraco di gloria, un buraco chikito den banda di un forno super cayente. E bola di glas likido cu e ta saca ta briya manera ora solo ta baha. Un hilo fini color oraño ta flash entre e forno y e pipa y ta disparce rapidamente. E artesano ta drei e glas likido aki riba un mesa di metal, y e bola ta haya forma di cilinder. Cu un supla cortico den e pipa, e ta pone e masa reis, anto ta bolbe drei e, his’e na laira, examin’e y bent’e bek den candela.
Nos ta na Murano, un isla chikito den e Lagun di Venecia, Italia. E isla ta famoso pa su productonan di glas (arte Murano). De echo, pa mas cu 1.000 aña nan ta supla glas den e region aki. E restonan di un fabrica di glas na Torcello, un isla biciña den e lagun, ta data for di siglo 7 di nos era. Sinembargo, e prome evidencia di produccion di glas na Venecia mes ta bini di un acta di aña 982 di nos era, pa cua un cierto “Domenicus e trahado di glas”, a para testigo.
Pa aña 1224, trahadonan di glas di Venecia tawatin un asociacion di artesano. Na 1291 e Gran Consilio di Venecia a ordena pa saca tur forno di traha glas for di e stad, kisas pa motibonan di siguridad. Hopi di nan a muda pa Murano, cu ta keda mas o menos un kilometer na otro banda di e lagun, y ei nan a keda te awe.
Dicon Glas di Venecia Ta Asina Famoso?
Siendo cu for di antiguedad hende tawata traha glas den hopi parti di mundo, ta kico ta haci e arte Murano, of glas di Venecia, asina special? Nan ta kere cu e artesanonan local a logra refina nan arte y bira asina excelente trahado di glas debi na e contacto frecuente entre Venecia cu otro regionnan cu tawatin un historia largo den trahamento di glas, paisnan manera Egipto, Fenicia, Siria y Corinto di e periodo di Imperio Bizantino. De echo, ta parce cu e fabricanan mas bieu cu nan conoce di Venecia a siña hopi di e fabricanan oriental di supla glas. E tecnicanan cu nan a uza na Murano a alcansa un nivel di habilidad y calidad cu podise ningun otro centro Europeo di traha glas no a alcansa.
Den Europa di siglo 13 y 14, Venecia tawata “e unico centro di traha glas cu por a produci ‘obranan di arte’ di glas supla”, segun e buki Glass in Murano. Nan tawata exporta productonan di Venecia pa luganan leu, den parti oost di Mediteraneo y den Nort Europa. Na aña 1399, Rei Richard II di Inglatera a permiti dos barco di Venecia mara den haf di London pa bende productonan di glas. Den e mesun periodo ei, glas di Venecia tawata entre e pocesionnan di aristocratnan di Francia. Cu tempo, Murano a bira famoso pa entre otro, spiel, chandelier, obhetonan di glas di color, decoracionnan di oro y di glazuur, cristal, piedranan precioso di imitacion, kelkinan cu pia masha elabora y obhetonan masha fini diseña.
Venecia tawata vigila su secretonan di negoshi masha bon mes y a haci tur esfuerso pa evita cu lo a lanta fabricanan pafo di Venecia cu lo por a forma competencia pa nan. For di siglo 13, tawata prohibi pa trahadonan di glas muda bai otro caminda. Medidanan di proteccion a bira mas severo, y tawata permiti solamente hende cu pleno ciudadania di Murano pa ta trahado di glas of pa siña e ofishi. Na un tempo, trahadonan di glas cu hui for di e region y ser gara, tawata haya boet pisa y sentencia na cinco aña como remado di barco cu nan pia na cadena.
Asina mes, trahadonan tawata emigra ilegalmente pa sitionan rond Italia y Europa y a cuminsa competi cu Murano, produciendo e mesun productonan y uzando e mesun metodonan. Den hopi caso tawata casi imposibel pa distingui nan producto—cu a bira conoci como à la façon de Venise, es decir, estilo di Venecia—for di esnan traha na Murano.
Artesania di Venecia a alcansa su punto culminante den siglo 15 y 16. Murano a domina e mercado y su productonan tawata ser uza na mesa di reinan. Algun di su specialidadnan tawata e formanan creativo di su cristal fini supla, su glazuurnan pinta, su glas mat lattimo, y su reticello (glas di canchi).
E tempo ei, segun un historiado di arte di glas, “e biahero curioso cu yega na e lagun durante e periodo cu e fornonan tawata traha lo no a keda sin bishita nan.” Nos tampoco no kier a perde esei. Pesei awemainta nos ta bai coi un vaporetto, un boto di motor cu ta fungi como bus, for di Gran Canal pa Murano. Ban hunto cu nos.
Forno- y Showroomnan
Asina cu nos baha for di e vaporetto na e prome parada di Murano, hende ta dirigi nos na e fabricanan di glas cu ta keda mas serca, caminda nos por mira demostracionnan gratis di e arte di e trahadonan di glas. Nos ta wak con un artesano ta supla y zuai un bola di glas likido hacie un blas largo na punta di su pipa. Anto uzando pins cu sker na un manera masha habil, e ta rek, corta y primi e masa sin forma y combirtie den cabes, pia y rabo di un cabai.
Ora nos sali for di e prome fabrica, nos ta cana keiro a lo largo di Rio dei vetrai, e canal di trahadonan di glas. E ta un canal di awa trankil caminda, mescos cu den gran parti di Venecia, e unico trafico ta riba acera y riba awa. Aki nos a realisa cu Murano tin cantidad di tayer y showroom. Algun di nan ta show articulonan elegante y di calidad—manera set di servies, candela y esculturanan solido y impresionante—cu sin duda ta rekeri basta habilidad y atencion pa produci nan. Otro tayernan ta ofrece productonan mas pagabel, for di cralchi te na vas y cosnan pa wanta papel traha di glas colorido. Hopi di nan ta masha bunita mes. Tur ta traha na man.
Nos ta keda fasina ora nos mira con nan ta traha e varios articulonan. Glas di Murano ta consisti pa 70 porshento di santo y 30 porshento di soda, calki, nitrato di potasio of di sodio, y arsenico. E glas ta bira likido na 1.400 grado Celsius y duro rond di 500 grado Celsius. Na e temperatura corecto entre e dosnan aki, e glas ta moli y manehabel. Pesei pa supla e glas of pa form’e e artesano tin cu hinc’e bes tras bes den candela pa renoba su flexibilidad. E artesano ta sinta na un banki entre dos brasa horizontal, riba cua e ta pone su pipa y ta drei e. Segun cu e ta drei e pipa cu un man, e otro man ta tene un herment of un forma papa muha traha di palo di peer—cu ta hopi resistente contra candela—pa asina forma e masa di glas likido.
Nos ta para wak con un artesano ta supla un blas den un forma cu canal den dje, anto ta laga un asistent corta un banda di e blas, caba e artesano ta drei su pipa rond di su as pa laga e blas habri manera e conopi di un flor. E ta sigui keinta e glas y form’e y cu pins ta dobla e rand di manera cu e ta comberti e glas den un lampi forma di leli pa un chandelier.
Pa agrega color na e masa di glas likido transparente, e artesano ta stroi puiro di color cu por dirti. Nan ta obtene e efecto di flor door di uza e tecnica di murrine, esta, nan ta agrega pidanan di bara fini di glas prepara, forma di moneda, cu tin patronchinan di color ta pasa den nan. Nan ta lora un masa di glas likido di tal manera cu nan ta cubri e parti pafo di su superficie cu e baranan di glas of cu seccionnan di bara di glas cu nan ta pone paralelo riba un plachi di metal. Ora hinca e baranan di glas aki bek den forno—sea nan ta multicolor, manera canchi of forma di spiral—nan ta dirti y ta drenta den e masa, cu e ora ei por ser supla den forma di un vas, un lampi of loke sea ta e forma desea. Articulonan di glas diki cu tin varios capa di glas di color of glas transparente ta ser traha door di hinca e obheto den varios weya pa dirti.
Si, cada obheto ta parce di tin un historia y un tecnica special su tras. Gracias na nan tradicionnan di siglonan bieu, e trahadonan di glas di Venecia su isla historico por uza candela pa transforma santo den creacionnan esplendido y briyante.
[Plachi na pagina 16]
Rio dei vetrai, Murano, Italia
[Plachi na pagina 17]
“Copa di Barovier” di siglo 15
[Plachi na pagina 17]
Un kelki di siglo 16 graba cu punta di djamanta
[Plachinan na pagina 18]
1. E buraco di gloria
2. Un artesano ta duna forma na un clompi di glas
3. Ta bolbe keinta e glas pa renoba su flexibilidad
4. Uzando pins cu sker, e artesano ta agrega pia na un cabai
5. E resultado final
[Reconocemento]
Potretnan cortesia di http://philip.greenspun.com