E Toren di London—Monumento Historico di un Pasado Turbulento

E Toren di London—Monumento Historico di un Pasado Turbulento

DI UN ESCRITOR DI SPIERTA! NA GRAN BRETANIA

SITUA prominentemente riba un serito na oriya di Riu Thames na Oost London tin un di e monumentonan mas famoso na mundo—e Toren di London. Pa casi mil aña, e gran baluarte, palacio y prizon aki a hunga un papel importante den e historia turbulento di Inglatera. Tawatin rei, reina, cortesano, clero, politico y hues cu a pasa door di su portanan; algun a sali bek den triunfo, otronan nunca mas hende a mira nan na bida. Dicon nan a traha e Toren, y ki susesonan dramatico y emocionante cu a tuma luga paden di su murayanan a influencia e rumbo di historia di Inglatera?

Fort di Cas Real

Despues cu Duke Willem di Normandia a invadi Inglatera na aña 1066, el a construi un serie di kasteel pa intimida e pueblo Anglosahon hostil. E edificio mas formidabel cu el a lanta tawata den stad di London. Inicialmente el a traha e baluarte di palo, den e skina suitost di e murayanan bieu di stad cu e Romanonan a construi. Despues di poco tempo nan a remplasa e baluarte di palo pa un edificio enorme di piedra, e Gran Toren. E edificio tawata casi vierkant, y a midi 32 pa 36 meter. E tawatin un aparencia impresionante, ya cu e tawata 27 meter halto, y a hinca miedo den e habitantenan local. Un rei cu a bin mas despues a laga blanch’e, y el a bira conoci como e Toren Blanco.

Otro reinan cu a bin despues a agrega torennan di varios tamaño, dos muraya masivo tur rond y un canal hundo di awa, y asina a hacie un di e baluartenan mas impenetrabel di Europa. De echo, algun biaha monarcanan tawatin cu busca refugio tras di su murayanan pa scapa di nan subditonan rebelde. Den tempo di guera civil, e banda victorioso tawata esun cu a gana control di e Toren, ya cu nan a mir’e como un simbolo di poder y autoridad. Den temponan mas pacifico, e Toren tawata e punto di salida di procesionnan impresionante riba dia di coronacion. Ora cu e rei tawata keda einan, e cu esnan cu a compañ’e a biba den apartamentonan di palacio masha bunita decora, caminda nan a entretene nan amigonan cu banketenan masha grandi. Sinembargo, enemigonan di rei a haya completamente un otro acohida.

Prizon Estatal

E Toren tawata un prizon diferente, y ta conoci cu e prome preso a biba den dje na aña 1100. E tawata reserva como un prizon pa hende importante y di rango. Entre su detenidonan prominente tawatin reinan derota di Escocia y di Francia y tambe miembronan di aristocracia y di clero cu a bira impopular of traido. De bes en cuando tawatin ehecucion y asta asesinato. Nan a mata Henry VI den e Toren, y tambe Edward V di 12 aña y su ruman homber mas jong.

Nan tawata acomoda presonan na unda cu tawatin luga y tawata sea restringi nan na cierto cuartonan y vigila nan strictamente of tawata permiti nan cana rond den cura di e kasteel. Algun sentencia di prizon tawata cortico, otronan largo. William Penn, kende despues a bira fundado di e colonia Mericano Pennsylvania, tawata encarsela pa ocho luna pa motibo di su creencianan religioso. Despues di un derota den bataya, Charles, subrino di rei di Francia y Duke di Orleans, a keda 25 aña deteni—cu algun interupcion—te ora cu nan a paga un rescate masha grandi p’e. E cortesano, explorado y escritor Sir Walter Raleigh a pasa 13 aña tristo skirbiendo su History of the World (Historia di Mundo) prome cu nan a libr’e temporalmente y despues a ehecut’e.

Ehecucionnan Ta Aumenta

E Toren su reputacion como un luga cu ta trata presonan severamente, ta data realmente for di tempo di Reformacion. Henry VIII, desespera pa haya un heredero homber, a kibra cu Iglesia Catolico Romano y a cuminsa ehecuta hende cu a nenga di reconoce e como cabes di Iglesia Anglicano. Henry su di dos casa, Anne Boleyn, no a logra dun’e un yiu homber y a ser decapita den e Toren pa supuesto traicion y adulterio, hunto cu su ruman homber y cuater persona mas. Catherine Howard, Henry su di cinco casa, tambe a ser decapita den e Toren. Ademas, hopi hende di noblesa cu tawatin sanger real, y pues tawata un menasa pa e trono, a ser encarsela den e Toren y a muri sea decapita of horca.

Ora cu Henry su yiu jong, e protestant Edward VI a bira rei, el a sigui cu e ehecucionnan cruel. El a muri den menos cu seis aña y a ser sigui pa Henry su yiu mohe, Mary, un catolico Romano celoso. Mary no a perde tempo y a decapita Lady Jane Grey di 16 aña cu su casa hoben, kendenan tawata simplemente marioneta den e lucha pa poder. Awor tawata tempo pa enemigonan protestant muri. Mary su mitar ruman Elizabeth a pasa hopi siman yen di angustia den e Toren prome cu el a ser libra, pero ora e mes a bira reina, el a encarsela y ehecuta esnan cu a nenga di renuncia nan fe catolico of cu a opone su gobernacion.

Aunke miles di persona a ser encarsela den e Toren, ta cinco mohe y dos homber so nan a decapita paden di su murayanan, pa scapa nan e berguensa di un ehecucion publico. Tres di e mohenan tawata Reina—Anne Boleyn, Catherine Howard y Jane Grey, kende a reina apenas nuebe dia. Mayoria di e otro ehecucionnan—por lo general decapitacion—a tuma luga riba e sero djis pega, Tower Hill, caminda multitudnan masha grandi y desordena a para wak. E cabes kita, nan a pone riba un staca na Brug di London como un spiertamento pa otro hende, y e curpa sin cabes nan a hiba bek na e Toren pa der’e bou di e capia. Cu tempo, mas cu 1.500 cadaver a keda dera einan.

Tawatin biaha cu nan a tortura presonan pa haya un confesion, pero por lo general solamente cu permit oficial. Na aña 1605, Guy Fawkes, kende a purba bula e rei y Parlamento den e Conspiracion di Polvora, a ser tortura riba pijnbank di e Toren pa oblig’e revela nomber di su complicenan prome cu nan a ehecut’e.

Pa un tempo cortico durante siglo 17, Inglatera y e Toren tawata bou di control di Oliver Cromwell y e Parlamentarionan, pero despues cu nan a restaura Charles II riba trono, nan a manda menos preso na e Toren. Na aña 1747 nan a decapita e ultimo hende riba Tower Hill, pero e papel di e Toren como prizon estatal no a termina. Durante prome guera mundial, nan a encarsela 11 spion Aleman einan y a ehecuta nan pa medio di un peloton di fusilamento. Durante segundo guera mundial, e Toren pa un periodo cortico tawatin presonan di guera, entre nan, Rudolf Hess, kende tawata e di tres homber despues di Hitler. E ultimo victima cu a muri paden di su murayanan tawata e spion Joseph Jakobs, cu nan a tira mata na augustus 1941.

Soldanan di e Guardia Real y e Hoyanan di Cas Real

For di principio di e Toren, tawatin bewaker pa vigila tanto e presonan como e edificionan. Pero e soldanan of bewakernan specialmente selecta yama yeoman warder ta data for di aña 1485. Den e temponan ei presonan hopi bes tawata yega via riu y a drenta e Toren via e Porta di Traido. Ora e acusado tawata regresa for di su huicio, espectadornan tawata wak bon pa mira con e bewaker (yeoman gaoler) cu a compañ’e a tene su hacha. Si e blad di e hacha tawata den direccion di e preso esei a indica un otro ehecucion.

Awendia e bewakernan ei ainda ta vigila e Toren pero nan ta fungi como guia bon informa pa bishitante. Na ocasionnan ceremonial nan ta bisti nan uniform magnifico estilo tudor, cu ta consisti di un camisa color cora cu oro y un kraag blanco stijf forma di wiel. Pero pa cumpli cu nan debernan normal nan ta bisti nan uniform blou cu cora estilo victoriano. E bewakernan a bira popularmente conoci como beefeaters (comedo di carni di baca), un beinam cu probablemente a cuminsa como un palabra di menosprecio durante tempo di hamber. Mientras cu habitantenan di London tawatin scarsedad di cuminda, e bewakernan di cas real semper tawata ricibi un racion di carni di baca pa haci sigur cu nan ta keda fiel na e monarkia.

E bewaker di raaf ta responsabel pa e raafnan grandi cu tin den e Toren. Segun supersticion, desaster lo bin riba Inglatera si un dia e parhanan bandona e Toren, pesei nan ta corta hala di e raafnan.

Bewakernan di e Cas di Hoya ta proteha e famoso hoyanan di e cas real Britanico, cu for di siglo 17 ta ser exhibi na publico. E djamanta corta di alta calidad y mas grandi na mundo, e djamanta Cullinan I, ta un di e piedranan preciosisimo den e coronanan, bolanan real y scepternan cu ainda e famia real ta uza.

Parke di Bestia, Fabrica di Moneda y Arsenal

Na principio di siglo 13, Rei John tawata cria leon den e Toren, pero e parke di bestia salbahe di cas real a cuminsa mes mes ora cu su susesor, Henry III, a haya tres leopardo, un oso polar y un olifanti serca soberanonan Europeo. Aunke e bestianan tawata pa entretene e rei y su corte, henter London por a disfruta di e espectaculo ora cu e oso tawata bai landa den Riu Thames pa cohe pisca, pero mara na un cabuya. Atrabes di añanan a bini mas bestia exotico, y e parke di bestia salbahe tawata habri pa publico for di tempo di Reina Elizabeth den siglo 16. Nan a ser’e den decada di 1830 ora cu a traslada e bestianan pa e parke nobo di bestia cu nan a caba di habri den London na Regent’s Park.

Pa mas cu 500 aña, un sucursal grandi di e Cas Real di Moneda a opera paden di e cura di e Toren. Un di su temponan mas druk tawata durante e reinado di Henry VIII, ora cu nan tawata traha moneda di e plata confisca for di monasterionan cu nan a caba di sera. Tambe e Toren tawata proteha registronan legal y estatal importante y a fabrica y warda ekipo militar pa rei y su ehersito.

Un Recuerdo di Pasado

Awe e Toren di London ta un di e atraccionnan turistico di mas grandi di Gran Bretania. Su aparencia a keda casi mescos cu antes, pesei ora bo ta cana rond di su torennan sombrio y shinishi y den su cayanan di piedra, bo no por keda sin corda riba e violencia, sufrimento y tragedia humano cu a tuma luga paden di e murayanan di e Toren atrabes di siglonan. Tin un bon resumen di su pasado turbulento na e sitio caminda nan tawata decapita of horca hende riba Tower Hill. Einan tin un plakkaat chikito cu ta conmemora ‘e historia tragico, y den hopi caso e morto di martirio, di esnan cu pa motibo di nan fe, pais of idealnan a risca nan bida y a perd’e.’

[Plachinan na pagina 13]

Anne Boleyn

Catherine Howard

Jane Grey

William Penn

[Reconocemento]

Boleyn y Howard: For di e buki Heroes of the Reformation, 1904; Grey: For di e buki The World’s Famous Events; Penn: For di e buki The Library of Historic Characters and Famous Events, Vol. V, 1895

[Plachi na pagina 13]

Un apartamento di e toren cu despues nan a uza pa sera preso

[Reconocemento]

[Plachi na pagina 14]

E wardado di preso “yeoman gaoler”

[Reconocemento]

[Plachi na pagina 15]

Algun di e hoyanan di cas real

[Reconocemento]

[Plachi na pagina 15]

Un moneda di siglo 16 cu cara di Henry VIII

[Reconocemento pa Potret na pagina 12]