E Dia Cu Ningun Hende Nunca Mas Lo Sinti Nan Solitario

E REGISTRO na Genesis 2:18 ta declara cu despues di a crea e prome ser humano, Yehova Dios a bisa: “No ta bon pa e homber ta so; lo mi traha un yudado p’e cu ta pas cu ne.” Hende a ser crea pa ta cu otro hende y pa depende di nan.

E miho Amigo cu nos por tin ta Yehova Dios. Apostel Pablo a reconoce Yehova como “e Tata di misericordianan y Dios di tur consuelo, kende ta consola nos den tur nos afliccion.” (2 Corintionan 1:3, 4) Yehova mes ta expresa tristesa pa e sufrimento di su sirbidonan. E ta un Dios di compasion. “E sa di kico nos ta traha; e ta corda cu ta stof nos ta.” (Salmo 103:14) Bo no ta sinti bo atrai na Yehova Dios y bo no ta gradicido pa su atencion amoroso, bondadoso y comprensivo?

Yehova Ta Sostene Esnan Solitario

Den pasado hopi sirbido di Dios a pasa den circunstancianan den cua nan a sinti nan solitario. Pa nan, Yehova tawata un fuente di sosten y consuelo. Tuma por ehempel Yeremias, kende Dios a yama pa ta profeta tempo cu e tawata jong. Entre e 40 escritornan di e Scritura, Yeremias kisas ta esun cu mas a expresa su sintimentonan personal. El a sintie timido y inadecua ora cu el a haya su prome asignacion serca Dios. (Yeremias 1:6) Pa por a cumpli cu ne, e mester a depende plenamente riba Yehova. Di berdad Yehova tawata cu ne “manera un guerero poderoso.”—Yeremias 1:18, 19; 20:11.

Un 300 aña prome cu Yeremias, ora cu Reina Jezabel a tende cu a mata su profetanan di Baal, el a hura cu lo e laga mata Elias. Elias a hui 450 kilometer bai te na Horeb den e Peninsula di Sinai. Einan el a drenta den un cueba pa pasa anochi y Yehova Dios a puntr’e: “Kico bo ta haci akinan, Elias?” Elias a splica cu el a sinti cu e tawata e unico adorado di Yehova den henter Israel, e unico profeta cu a keda cu tawata celoso pa e sirbishi di Dios. Yehova a garantis’e cu e no tawata su so. Yehova tawata cu ne, y tawatin 7.000 Israelita cu tambe tawata cu ne, maske e no a conoce nan. Yehova a consola Elias y a edifica su fe. El a touch Elias su curason, y a curasha e profeta pa no bandona su asignacion. (1 Reinan 19:4, 9-12, 15-18) Si un dia nos, mescos cu Elias, mester sinti nos solitario of cu nos no ta bal nada, nos tambe por pidi Yehova pa fortalesa. Ademas, door di uza discernimento, ancianonan cristian por consola of curasha rumannan fiel, y yuda nan mira nan papel den e realisacion di Dios su proposito.—1 Tesalonicensenan 5:14.

For di e ehempelnan aki y otronan mas, nos por compronde cu Yehova ta dispuesto pa duna sosten y consuelo amoroso na personanan cu ta sinti nan solitario. Si, Yehova “lo ta un refugio pa e opriminan, un refugio den temponan di angustia.”—Salmo 9:9; 46:1; Nahum 1:7.

Un Homber cu Sintimentonan Profundo y Simpatia

Hesucristo merece nos admiracion pa su emocionnan perfectamente balansa den imitacion di Yehova. Lucas ta describi Hesus su reaccion ora cu el a topa un procesion di entiero den e stad di Nain: “Un morto tawata wordo hiba pa dera, e unico yiu homber di su mama . . . Y ora Señor a mir’e, el a sinti compasion p’e, y a bis’e: ‘No yora.’ Y el a yega serca y a mishi cu e caha di morto; y e cargadonan di morto a keda para. Y el a bisa: ‘Hoben, mi ta bisa bo: Lanta!’ Y e morto a lanta sinta y a cuminsa papia. Y Hesus a entreg’e bek na su mama.” (Lucas 7:12-15) Hesus su emocionnan tawata profundamente conmovi. E tawata un homber compasivo. Imagina bo con felis Hesus a haci e biuda solitario ora cu el a dun’e su yiu bek! Awor e biuda no tawata solitario mas.

Nos por tin sigur cu Hesus “por compadece di nos debilidadnan.” Definitivamente e ta sinti simpatia pa esnan recto cu ta solitario y ta compadece di nan. De echo, mediante Hesus “nos [por] ricibi misericordia y haya gracia pa yuda den tempo di necesidad.” (Hebreonan 4:15, 16) Door di imita Hesus nos por cultiva compasion y simpatia pa hende cu ta den tristesa y ta sufri di afliccion y soledad. Nos lo tin menos chens di ta solitario ora nos ta yuda otro hende. Pero tin un manera mas cu nos por haya yudansa pa supera e sintimentonan negativo di soledad.

E Palabra di Yehova Por Yuda Nos Supera Soledad

Hopi hende a ripara cu pa medio di e “encurashamento di Scrituranan nos por tin speransa.” E Palabra di Dios ta yen di conseho practico cu por yuda nos supera soledad. (Romanonan 15:4; Salmo 32:8) Por ehempel, e Palabra di Dios ta anima nos ‘pa no pensa mas halto di nos mes cu nos mester pensa.’ (Romanonan 12:3) Pa aplica e conseho aki, kisas nos tin cu haci ahuste den nos manera di pensa. Teniendo un punto di bista realistico di nos limitacionnan, sigur lo yuda nos cultiva expectativanan balansa y rasonabel. Tambe e Palabra di Dios ta conseha nos pa cultiva un interes personal sinsero den otro hende. (Filipensenan 2:4) Esaki ta un caya di dos direccion. Pasobra segun cu bo ta haci esfuerso pa mustra interes den otro hende, abo lo ricibi for di otro hende. E bon intercambio aki cu otro hende ta yuda alivia e bashi cu nos ta sinti y ta duna nos bida proposito.

Bijbel ta anima nos como cristian pa ‘no laga di asisti na nos reunionnan.’ (Hebreonan 10:24, 25) Pesei participa den actividadnan constructivo, por ehempel, asisti na e reunionnan di Testigonan di Yehova cu regularidad. Sin duda, reunionnan cristian por contribui na nos bienestar spiritual, emocional y fisico. Un dushi manera pa yena nos bida cu actividad sano ta door di papia cu otro hende tocante e bon noticia di e Reino di Dios. Esei ta yuda nos mente keda enfoca den e direccion corecto, ta fortifica nos fe y ta proteha nos speransa.—Efesionan 6:14-17.

Hala serca Yehova den oracion. David a anima nos: “Tira bo carga riba SEÑOR, y e lo sostene bo; nunca e lo no permiti pa e husto wordo movi.” (Salmo 55:22) Door di studia e Palabra di Dios, lo bo sinti bo felis. (Salmo 1:1-3) Si sintimentonan di soledad ataca bo, medita riba Yehova su cuido amoroso cu ta ser revela mediante su Palabra. E salmista a skirbi: “Mi alma ta pega duro na stof; rebiba mi segun bo palabra.”—Salmo 119:25.

Tempo Cu Ningun Hende Lo Bisa: “Mi Ta Solitario”

Yehova Dios a priminti nos un mundo nobo caminda lo no tin ansiedad, frustracion ni sintimentonan negativo. Bijbel ta declara: “E lo seca tur lagrima kita for di nan wowo; y lo no tin morto mas; lo no tin lamento mas, ni yoramento, ni dolor; e prome cosnan a pasa.” (Revelacion 21:4) Si, entre e cosnan cu lo a pasa ta e dolornan fisico, mental y emocional cu nos ta sinti awe.

Mundo lo ta yen di hende amigabel, cu lo enrikece nos bida. Yehova mediante su Reino celestial den man di Hesucristo lo cura nos pa semper di nos soledad. Lo e duna nos cosnan nobo y maraviyoso pa haci riba un tera comberti den Paradijs. Pronto e dia lo yega ora cu nunca mas nos lo bisa: “Mi ta solitario.”

[Plachi na pagina 8, 9]

Cu e sosten di Yehova, nos lo no sinti nos solitario, ni ora nos ta so

[Plachinan na pagina 10]

Kico e relato biblico di Yeremias y Elias ta siña nos?