Dicon Tin Asina Tanto Hende Solitario?

HOPI hende den nos sosiedad djawe ta experencia soledad. E ta afecta hende di tur edad y di tur rasa, nivel social y religion. Abo a yega di sinti bo solitario? Bo ta sinti bo solitario na e momento aki? Eigenlijk, nos tur na un tempo of otro a sinti e necesidad di compaño; e necesidad di un hende pa scucha nos, pa trankilisa nos of talbes pa bai di acuerdo cu nos sintimentonan profundo of cu loke nos ta pensa, y pa compronde nos como persona. Nos tin mester di un persona cu ta tene consideracion cu nos emocionnan.

Pero e echo cu nos ta sin compaño, no ta nifica necesariamente cu nos ta solitario. Un persona por ta su so pa un tempo largo, disfrutando di loke e ta haci, sin sinti ni un tiki soledad. Na contraste, tin hende cu no por wanta pa ta nan so.

Soledad ta un emocion fuerte, y e por ta masha doloroso. Bo ta sinti un bashi. Bo tin e sensacion di ta aisla, separa for di otro hende. Nos por bira emocionalmente suak y haya miedo. Escritora Judith Viorst aptamente a describie asin’aki: “Soledad ta pisa manera un piedra riba e curason. . . . Soledad ta laga nos bashi y desespera. Soledad ta laga nos sinti nos mes manera un yiu sin mama, manera un lamchi cu a dual, asina chikito y perdi den un mundo asina inmenso y desinteresa.” Abo a yega di sinti asina? Kico ta causa soledad?

Problema-, situacion- y condicionnan por afecta hende na diferente manera. Podise bo ta sinti cu bo pareunan ta rechasa bo debi na bo aparencia, bo rasa of religion. Cambio di ambiente—manera cuminsa na un scol of trabou nobo, of muda pa un bario, stad of pais nobo—por pone bo sinti solitario pasobra bo tin cu bai laga amigonan bieu atras. Morto di un mayor of di bo casa por resulta den soledad, y kisas pa hopi aña. Tambe, segun cu nos ta bira bieu, nos circulo di amigo y conoci ta cambia, ta bira mas chikito of ta disparce.

Matrimonio no ta semper un garantia cu un hende lo no sinti soledad. Mal comprondemento entre e pareha of falta di compatibilidad kisas ta causa tension cu por produci insiguridad y por asta resulta cu e pareha y yiunan ta isola nan mes. Pero fuera di soledad causa door di morto di un ser keri, diborcio of isolacion fisico of emocional, tin un otro tipo di soledad cu por afecta nos profundamente. Esaki ta surgi ora cu nos relacion cu Dios ta bai atras y nos ta sinti nos separa for di dje.

Abo a yega di experencia un di e situacionnan menciona ariba? Ta posibel pa trata y supera soledad?

[Plachinan na pagina 4]

Cambionan den bida por causa soledad, por ehempel, cuminsa na un scol nobo of perde bo casa