Con pa Trata y Supera Soledad

NO TA facil pa trata y supera soledad. Tin emocionnan fuerte envolvi. Con un persona por trata cu soledad? Kico algun hende a haci pa supera e sintimento fuerte aki?

Con pa Enfrenta Soledad

Helena ta gusta pa e ta so ora di tuma cierto decisionnan, pero e ta sinti cu soledad por ta peligroso. Tempo cu e tawata mucha, e no tawatin bon comunicacion cu su mayornan. Como cu e no tawata sa con pa haya nan atencion, e tawata sera su mes den su camber. E ta conta: “Mi a cuminsa haya problema cu comemento. Depresion tawata aplasta mi. Mi tawata bisa mi mes: ‘Pakico mi tin cu worry cu e problemanan di mi mayornan siendo cu nan si no ta worry cu di mi?’ Anto mi a cuminsa pensa cu matrimonio lo por a yena e bashi di mi soledad. Mi a busca matrimonio como un escape. Pero poco despues mi a cuminsa rasona: ‘Pakico mi tin cu daña bida di un otro persona? Prome, mi tin cu drecha mi propio manera di pensa!’ Mi a busca e yudansa di Yehova den oracion, y a desahoga tur mi angustia.

Den Bijbel mi a haya palabranan di gran consuelo, manera esnan di Isaias 41:10: ‘No tene miedo, pasobra mi ta cu bo; no desmaya, pasobra mi ta bo Dios. Lo mi fortalece bo, si, lo mi yuda bo, si, lo mi sostene bo cu mi man drechi di husticia.’ E palabranan aki a yuda mi hopi pasobra mi tawata sinti como si fuera mi no tawatin tata. Awor mi ta lesa Bijbel regularmente y ta haci oracion na mi Tata celestial. Mi a siña supera mi soledad.”

Morto di un ser keri ta causa tristesa, y esei por hiba na soledad. Luisa, cu tin 16 aña, a expresa su angustia: “Mi tata a muri tempo cu mi tawatin cinco aña. Mi a busca consuelo serca mi wela, pero nunca mi a sinti cu e stima mi. Mi no a haya hopi cariño durante mi infancia, tempo cu mi tawatin mas mester di dje. Entre ocho pa nuebe aña di edad, mi a purba mata mi curpa tres biaha. Mi a pensa cu esei lo tawata e miho cos pa mi famia pasobra mi mama tawata lucha pa percura cuminda pa mi cu mi tres ruman mohenan. Despues nos a cuminsa asocia cu Testigonan di Yehova. Un pareha casa a mustra berdadero interes den mi. Nan tawata bisa mi: ‘Nos ta aprecia bo y nos tin mester di bo.’ E palabranan ‘nos tin mester di bo’ a duna mi hopi fortalesa. Tin biaha mi no por expresa mi sintimentonan na otro hende, pero ora mi lesa articulonan cu ta sali den E Toren di Vigilancia of Spierta! mi ta gradici Yehova, pasobra mediante e publicacionnan aki mi a sinti su amor. Mi a haci hopi cambio. Awor mi por smile, y mi por expresa mi tristesa of alegria na mi mama. Tin biaha e recuerdonan di pasado ta lanta cabes, pero no manera antes tempo cu mi a purba mata mi curpa of tempo cu mi tawata stop di papia cu mi sernan keri. Semper mi ta corda loke e salmista David a bisa: ‘Pa motibo di mi rumannan y mi amigonan lo mi bisa awor: “Cu pas lo reina den bo.”’”—Salmo 122:8.

Martha tin 22 aña diborcia, y durante e tempo ei el a cria un yiu. E ta bisa: “Sintimento di soledad y di no ta bal nada, sa lanta cabes ora cu mi pensa cu mi a faya den algo.” Con e ta trata cu e sintimentonan aki? El a splica: “Mi a ripara cu e miho manera pa trata cu nan ta door di papia mesora cu Yehova Dios tocante nan. Ora mi haci oracion, mi sa cu mi no ta so. Yehova ta compronde mi miho cu ami ta compronde mi mes. Tambe mi ta purba haya maneranan pa mustra interes personal den otro hende. Specialmente mi sirbishi di predica tempo completo ta un arma hopi potente contra sintimentonan negativo. Ora bo ta papia cu otro hende tocante e bendicionnan di e Reino di Dios y bo ta realisa cu bo oyentenan no tin ningun clase di speransa y ta mira nan problemanan como permanente, bo ta ripara cu bo tin motibonan fuerte pa kier keda na bida y sigui lucha.”

Elba, di 93 aña y kende su unico yiu ta sirbi como misionero den un otro pais, ta conta tocante con e ta trata cu soledad: “Ora cu mi yiu mohe cu su casa a ricibi invitacion pa asisti na e Scol Biblico di Galad di Watchtower, mi a mira nan caranan radiante di alegria, y mi a alegra hunto cu nan. Despues, ora cu nan a haya asignacion pa sirbi den exterior, mi a cuminsa sinti un poco egoista. Mi tawata sa cu lo mi no tin nan serca di mi mas, y mi a sinti un poco tristo. E situacion a parce mi mescos cu esun di Jefte cu su unico yiu mohe, describi den Huesnan capitulo 11. Mi tawatin cu haci oracion na Yehova cu awa na wowo, pidiend’e pordon. Mi yiunan ta keda den contacto cu mi. Mi sa cu nan ta hopi ocupa, pero na unda cu nan ta sirbi, nan ta traha tempo pa tene mi na haltura y comparti e experencianan cu nan tawatin den sirbishi di veld. Mi ta lesa nan cartanan bes tras bes. Ta como si fuera nan ta papia cu mi tur siman, y mi ta masha gradicido pa esei. Ademas, e ancianonan cristian den mi congregacion ta duna e debido atencion na nos cu ta di edad of enfermo, y nan ta haci sigur cu nos tin transport pa bai e reunionnan di congregacion y tambe nan ta percura pa otro necesidadnan. Mi ta considera mi rumannan spiritual como un bendicion for di Yehova.”

Bo Tambe Por Trata y Supera Soledad

Sea cu bo ta hoben of mas grandi, soltero of casa, un mucha cu tin su mayornan of un huerfano y sea cu bo a perde sernan keri of ta sintiendo cualkier otro tipo di soledad, tin maneranan pa trata cu bo sintimentonan. Jocabed, un mucha mohe di 18 aña kende su tata a bandona su casa y su cinco yiunan y bai biba den un otro pais, a bisa: “Papia! Ta importante pa nos expresa nos mes. Si nos no hacie, ningun hende lo no compronde nos.” El a recomenda: “Stop di pensa mucho riba bo mes. Busca yudansa serca esnan maduro, no serca hobennan cu kisas ta mas mal para cu bo.” Luisa, menciona anteriormente, a bisa: “Oracion sinsero na Yehova ta duna nos e yudansa cu nos mester pa sali for di loke bo por yama un caya sin salida.” Jorge, kende su casa a muri, a comenta riba e manera cu e ta trata cu soledad: “Bo mester persisti. Demostra interes den otro hende a yuda mi hopi. Mustrando ‘compasion’ ora nos ta combersa cu otro hende por haci nos combersacion significativo y por yuda nos descubri e cualidadnan bunita cu otro hende tin.”—1 Pedro 3:8.

Nos por haci hopi cos pa combati soledad. Pero lo yega un dia cu soledad lo pasa pa historia? Si ta asina, con esei lo sosode? E siguiente articulo lo contesta e preguntanan aki.

[Nota]

[Comentario na pagina 8]

‘Oracion sinsero na Yehova ta duna nos e yudansa cu nos mester pa sali for di un caya sin salida.’—Luisa

[Cuadro/Plachinan na pagina 7]

Loke Bo Por Haci pa Supera Soledad

◼ Keda corda cu bo por cambia bo situacion, cu e no ta permanente pero cu e ta un situacion cu otro hende tambe ta pasa aden.

◼ No exigi demasiado di bo mes.

◼ Sinti bo en general satisfecho cu bo mes.

◼ Cultiva bon custumber di come y di haci ehercicio, y drumi suficiente.

◼ Uza e tempo cu bo ta bo so pa haci cosnan creativo y pa siña habilidadnan nobo.

◼ Tene cuidou pa no husga hende cu bo topa a base di bo experencianan di pasado.

◼ Aprecia bo amigonan y nan cualidadnan unico. Haci esfuerso pa forma un bon circulo di amigo. Pidi sugerencia serca personanan mas grandi y cu tin experencia.

◼ Haci algo pa otro hende; smile cu nan, expresa un palabra bondadoso, comparti un pensamento for di Bijbel cu nan. Sinti cu bo ta importante pa otro hende ta yuda bo combati soledad.

◼ No fantasia cu artistanan di cine of di television of cu personahenan di Internet of di buki, y no imagina cu bo tin un amistad cu nan.

◼ Si bo ta casa, no spera cu bo casa lo satisface tur bo necesidadnan emocional. Siña duna y tuma, y siña yuda y sostene otro.

◼ Siña papia cu otro hende y ser un bon scuchado. Consentra riba otro hende y loke ta interesa nan. Mustra compasion.

◼ Reconoce cu bo ta sinti bo solitario, y papia cu un amigo of amiga maduro, un persona cu bo ta confia. No sufri den silencio.

◼ No bebe di mas, of no bebe mes. Alcohol no ta elimina bo problemanan; cu tempo nan ta bolbe lanta cabes.

◼ Evita orguyo. Pordona esnan cu ofende bo, y drecha e relacion. Sea dispuesto pa ta menos desconfia di hende.

[Plachi na pagina 6]

Con un persona por trata cu soledad?