Cerbes Historia di e Bebida Color di Oro

Di un escritor di Spierta! na Republica Checo

KICO hopi bes ta e deseo mas grandi di un homber cu tin un bon sed? Den hopi pais, sea e ta peon of homber di negoshi, lo e ta pensa riba un glas di su bebida faborito color di oro. Lo e ta imagina e scuma blanco y su dushi sabor marga. Anto lo e ta bisa den su mes: ‘Mare mi por a haya un glas di cerbes bon friu!’

Cerbes ta casi mes bieu cu humanidad. Pa miles di aña el a mantene su popularidad, y hopi caminda el a bira un parti integral di e cultura local. Lamentablemente, specialmente den paisnan Europeo, cerbes a bira un fuente di problema pa esnan cu ta beb’e di mas. Sinembargo, si bebe cerbes cu moderacion, su sabor y cualidadnan unico ta hacie un bebida masha agradabel. Laga nos analisa e historia di e bebida popular aki.

Cuanto Tempo Pasa Nan A Cuminsa Traha Cerbes?

Manera ta ser indica riba tablanan di spijkerschrift cu hende a haya den teritorio di e antiguo Sumerionan na Mesopotamia, rond di tres mil aña prome cu Cristo ya hende tawata traha cerbes einan. Durante e mesun periodo, e pueblonan di Babilonia y Egipto tambe tawatin cerbes riba mesa. Na Babilonia, caminda nan tawata conoce 19 sorto di cerbes, e trahamento di cerbes a ser regula asta door di lei cu a keda inclui den e Codigo di Hammurabi. E reglanan aki, por ehempel, a establece e prijs di cerbes, y cualkier violacion di e reglanan tawatin como castigo pena di morto. Den antiguo Egipto, nan tawata traha cerbes tur caminda, y e tawata un bebida popular. Cobamentonan arkeologico na Egipto a descubri e receta skirbi di mas bieu pa traha cerbes.

E tecnologia di traha cerbes cu tempo a yega Europa. Algun historiado Romano na principio di nos era a skirbi cu e pueblonan Kelta, Germano y otro tribunan tawata gusta cerbes. E Vikingonan tawata kere cu asta den Valhalla—segun mitologia di Scandinavia, e sala caminda guereronan balente a bai ora nan muri—copa di e hombernan lo tawata basha over cu cerbes.

Durante Edad Medio na Europa, trahamento di cerbes a pasa pa e monasterionan. Monniknan Europeo a mehora e tecnologia di e proceso, y a uza hop (flor seco di un tipo di mata marga) como preservativo. E revolucion industrial di siglo 19 a introduci uzo di mashin pa traha cerbes y esei a resulta di ta un logro significativo den e historia di e bebida popular aki. Anto despues a sigui algun descubrimento cientifico masha importante.

E kimico y microbiologo Frances Louis Pasteur a descubri cu e yeast cu ta pone cerbes fermenta a consisti di organismo bibo. E descubrimento ei a haci posibel cu hende por a controla mas precis e proceso di comberti sucu den alcohol. E botanico Danes Emil Christian Hansen a bira un di e personahenan mas grandi den historia di trahamento di cerbes. Henter su bida el a investiga y clasifica diferente tipo di yeast. Entre otro cosnan, su investigacion a consentra riba desaroya un tipo puro di yeast di cerbes. Di e manera aki Hansen literalmente a revoluciona e industria di cerbes.

Pero di berdad trahamento di cerbes ta asina dificil? Por parce increibel, pero di berdad e ta dificil. Laga nos considera brevemente e secreto tras di un dushi glas di cerbes.

Prome Cu E Yega Bo Glas

E tecnologia di traha cerbes a cambia considerablemente atrabes di siglonan y te awe e ta varia di un cerbeseria pa otro. Pero por lo general, casi tur cerbes ta contene cuater ingrediente principal: sebada, hop, awa y yeast. Nos por parti henter e proceso di traha cerbes den cuater paso: trahamento di e mout of malta, preparacion di e wort, fermentacion y maduracion.

Trahamento di e malta. Durante e etapa aki, ta sortia e sebada, pis’e y saca tur impuresa. Despues, ta pone e sebada muha den awa, un proceso necesario pa e sebada spruit. Pa e spruit ta dura entre cinco pa shete dia na un temperatura di 14 grado Celsius. Na final di e proceso aki nan ta yama e sebada malta berde, y ta transport’e pa fornonan special caminda ta sigui un proceso pa seca e sebada. Nan ta seca 95 pa 98 porshento di e likido di e malta berde pa asina stop e sebada di spruit. Caba nan ta kita e spruit for di e malta, y ta machica e malta pa kita e casca. E ora ei e malta ta cla pa e siguiente paso.

Preparacion di e wort. Nan ta mescla e malta machica cu awa pa produci un papa cu nan ta keinta pocopoco. Na cierto temperaturanan e enzimnan ta cuminsa comberti zetmeel di e sebada den sucu simpel. E paso aki ta dura mas cu cuater ora y ta produci loke nan ta yama wort, cu siguientemente nan ta filtra pa saca tur impuresa. Caba ta sigui e proceso di herbe e mescla, locual ta stop e actividad di e enzimnan. Durante cu e wort ta herbe, nan ta agrega hop na dje pa dun’e e sabor marga tipico di cerbes. Despues di herbe e wort pa mas o menos dos ora, nan ta lag’e fria na e temperatura rekeri.

Fermentacion. Esaki ta probablemente e etapa mas importante di e proceso di traha cerbes. E sucu cu tin den e wort ta ser comberti mediante e yeast den alcohol y kooldioxide. Cuanto e proceso di fermentacion lo dura (no mas tanto cu un siman) y na ki temperatura, ta depende di ki tipo di cerbes ta ser produci, sea ale of lager. Anto nan ta transferi e cerbes berde (of, cerbes jong) aki pa tankinan den bodega pa e madura.

Maduracion. Durante e etapa aki, cerbes ta haya su sabor y aroma tipico; kooldioxide cu e cerbes mes ta produci ta dun’e su gas. Cerbes ta madura durante un periodo cu por varia di entre tres siman pa un par di luna, dependiendo di e tipo di cerbes. Por ultimo, ta pone e cerbes den bari of den boter y e ta cla pa bai su destinacion final, anto kisas cu tempo lo e yega riba bo mesa. Pero ki tipo di cerbes lo bo tin gana di purba?

Diferente Tipo di Cerbes

Pues anto, cerbes por varia masha hopi mes for di otro. Bo por disfruta di un cerbes color cla of scur, dushi of marga, y tambe tin cerbes traha di sebada of di trigo. E sabor di cerbes ta depende di hopi factor, entre otro di e calidad di e awa cu a uza, e tipo di grano cu a uza pa e malta, y tambe e tecnologia y yeast cu a uza den e proceso.

Un di e cerbesnan mas renombra ta pilsner (of pils), un cerbes color cla di e tipo lager clasico. Cientos di cerbeseria rond mundo ta produci e tipo di cerbes aki. Sinembargo, pilsner autentico ta ser traha solamente den e stad di Plzeň, of Pilsen, situa den Republica Checo. E secreto di su produccion ta sinta no solamente den e tecnologia sino tambe den e materia prima cu nan ta uza: awa dushi, malta di calidad halto y e tipo corecto di yeast di cerbes.—Wak e cuadro adhunto.

Un otro tipo di cerbes excelente ta cerbes weiss (cerbes blanco), un cerbes di trigo cu ta masha popular na Alemania. E specialidadnan Britanico ta cerbes porter y stout. Porter ta un cerbes fuerte, cu ta fermenta na superficie di e wort, y ta ser traha di malta tosta locual ta duna e bebida aki un color hopi scur. Nan a cuminsa traha cerbes porter na London den siglo 18. Originalmente, e intencion tawata pa uz’e como un bebida “nutritivo” pa hombernan cu ta traha duro, manera por ehempel porter. Stout, un cerbes hopi scur y pisa—cu famia Guinness a haci famoso na Irlanda y na mundo—ta un variacion di e cerbes porter tradicional. Bo por purba sea e cerbes Ingles stout dushi, cu por lo general ta contene sucu di lechi, of e cerbes Irlandes stout seco, cu ta marga y ta contene mas alcohol.

Un otro factor importante pa hopi hende cu gusta cerbes ta con nan ta beb’e, sea na boter, bleki of for di tap. Mericanonan sa gusta nan cerbes bon friu. Otro hende ta prefera e cerbes na temperatura di camber of un tiki friu y sirbi direct for di bari warda den bodega di un bar.

Pues en berdad tin diferente tipo di cerbes. Si bo bebe cerbes cu moderacion, bo salu lo por haya algun beneficio. De echo, cerbes ta contene varios vitamina y mineral importante, manera vitamina B2, acido folico, cromo y zink. Segun algun autoridad, bebemento modera di cerbes por yuda preveni malesa di curason y problema di cuero. Si bo scohe bon for di tur e marca- y tiponan cu tin disponibel, y si bo ta balansa den bo uzo di cerbes, lo bo por disfruta di e bebida sabroso y refrescante aki. Pues, e siguiente biaha cu bo tin bo dilanti un glas di e bebida color di oro aki cu su corona di scuma blanco, corda riba su historia fasinante!

[Cuadro/Plachi na pagina 13]

E Actornan Principal

Den pasado, tabatin un kantidat grandi di fishi enbolbí den produkshon di serbes. Esaki ta algun di nan.

◼ Trahado di Malta—e prome actor den e drama di trahamento di cerbes. E tawata asigna pa traha e malta di sebada of di trigo. El a supervisa e proceso di laga e grano spruit y di seca e malta berde den forno. E tawata carga un responsabilidad pisa, ya cu e sabor di e cerbes a depende considerablemente di e calidad di e malta.

◼ Cerbesero (mustra ariba)—e homber encarga cu e trabou di herbe e mescla. Prome, el a mescla e malta machica cu awa, anto segun cu tawata herbe e mescla, el a agrega e hop. E producto final di su trabou tawata e wort.

◼ Hefe di Bodega—un specialista cu experencia kende a supervisa fermentacion di e cerbes den tobo y maduracion di e cerbes den bodega. Despues, el a hinca e cerbes cla pa consumo den barinan mas chikito.

[Reconocemento]

S laskavým svolením Pivovarského muzea v Plzni

[Cuadro/Plachinan na pagina 14]

Pilsner—E Original Mas Imita

Su produccion a cuminsa na aña 1295. Wenceslas II, Rei di Bohemia, a funda e stad Plzeň, y poco despues di esei el a otorga 260 ciudadano di Plzeň e derecho di traha cerbes. Na principio e ciudadanonan tawata traha cerbes den nan cas y solamente na cantidad chikito, pero despues nan a forma asociacionnan y a funda cerbeserianan. Sinembargo, cu tempo e economia y cultura di Bohemia a bai atras, y esaki a afecta e trahamento di cerbes. E cerbeseronan a pasa por halto di e tecnologia tradicional y a uza nan propio recetanan, locual hopi bes a resulta den un bebida masha malo cu no tawata digno di ser yama cerbes.

E tempo ei nan tawata produci dos tipo di cerbes na Europa. Specialmente na Bohemia nan tawata produci cerbes cu a fermenta na superficie di e mescla, mientras cu cerbes cu a fermenta den bom—locual tawata di hopi mas miho calidad—tawata popular principalmente na Bavaria. Tawatin un diferencia grandi entre cerbes di Bavaria y esnan di Plzeň.

Un cambio decisivo a tuma luga na 1839. Rond di 200 ciudadano di Plzeň a dicidi di haci algo tocante e situacion. Nan a funda e Cerbeseria Burgues, caminda tawatin mag di traha solamente cerbes cu a fermenta den bom, esta, cerbes estilo di Bavaria. Nan a manda busca e famoso cerbesero Josef Groll for di Bavaria. Mesora el a cuminsa produci un tipo di cerbes tipico di Bavaria. E resultado tawata hopi distinto, pero hopi mas miho di loke el a spera. Groll su experencia hunto cu e excelente materia prima local a yuda produci un cerbes cu rapidamente a bira popular rond mundo. Dicon? Debi na su sabor, color y aroma unico. Sinembargo, e fama di cerbes Plzeň tawatin su desbentaha. Hopi cerbesero, cu kier a probecha di su popularidad, a cuminsa yama nan producto pilsner. Asina pilsner a bira no solamente famoso, sino tambe e cerbes mas imita.

[Plachinan]

Josef Groll

Tanki di awa di un cerbeseria di Plzeň

[Reconocemento]

S laskavým svolením Pivovarského muzea v Plzni

[Mapa na pagina 12]

(Pa e teksto den su formato kompleto, wak e publikashon)

Plzeň

[Plachi na pagina 12, 13]

Un maquette Egipcio cu ta mustra con nan a traha pan y cerbes

[Reconocemento]

Su concessione del Ministero per i Beni e le Attività Culturali - Museo Egizio - Torino

[Plachinan na pagina 15]

Hop, malta y un cerbeseria