Mamanan Mucho Jong

“Mi mucha homber tawata un nechi gai. E tawatin cen, y nos tawata sali y pasa pret. Ora mi no a haya mi regla, mi a compronde cu un cos no tawata bon. Mi no tawata sa con pa bisa mi mama. Con e cos aki por a pasa cu mi? Mi tawatin 16 aña so, y mi no tawata sa kico pa haci.”—Nicole.

AWE Nicolea tin trinta y pico aña y ta mama di tres yiu. E ta un mama activo cu confiansa propio. Su yiu mayo tin 20 aña. Si, añanan pasa Nicole tawata un di e miyones di teenagernan soltero na estado. Mescos cu otro mamanan teenager, el a sinti su mes confundi y a pensa cu e no por a trata cu e situacion confuso y e problemanan pisa, decisionnan dificil y perspectiva insigur cu el a confronta.

Masha poco biaha Nicole sa papia tocante e shock, e nengamento di realidad, e miedo, e rabia y e desesperacion cu a caracterisa su ultimo añanan como teenager; un periodo cu muchanan di su edad tawata precupa tocante paña y ki punto nan lo haya riba nan raport. No obstante, Nicole su situacion no tawata sin speransa. El a bin di un famia amoroso cu a purba inculca principionan moral halto den dje. Aunke pa un tempo el a prefera di no haci caso di e principionan ei—y a sufri e consecuencia—mas despues, e mesun principionan moral ei a yud’e hiba un bida productivo y cu proposito. Su lema a bira: “Tur speransa no a caba.”

Desafortunadamente, no ta tur mama teenager tin un famia cu ta apoy’e, of un punto di bista positivo manera Nicole. Hopi mama teenager ta haya nan mes masha lihe den un situacion di pobresa aparentemente sin salida. Debi cu algun di nan tawata victima di violacion of di violencia, nan tin cu trata cu dolor emocional.

Ademas, e problemanan cu mamanan teenager ta confronta por tin un efecto negativo riba nan yiunan. Segun e buki Teen Moms—The Pain and the Promise (Mamanan Teenager—E Dolor y e Promesa), baby di mamanan teenager “sa nace bou di peso, sa haya mas malesa di mucha, mas caso di morto infantil, cuido medico di menos calidad, sa sufri mas hamber y mal nutricion; nan ta confronta mas violencia y ta desaroya menos lihe cu yiunan cu nace di mamanan mas grandi.” De echo, compara cu yiunan cu nace di mamanan mas grandi, yiunan mohe di mamanan teenager tin mas chens di bira mama teenager.

Embaraso hubenil ta algo comun? Con mamanan teenager por tin exito den enfrenta e problemanan di cria nan baby? Tin manera pa yuda hobennan pa asina nan no tin nodi cai mes den tanto angustia? E siguiente articulonan lo analisa e preguntanan aki.

[Nota]