Observando Mundo
Sushi Como Cuminda
“Ta asombroso pa mira con importante sushi a bira como fuente di cuminda pa hopi parha y mamifero”, segun e biologo Wilfried Meyer. “Na algun luga a para bira cu ta sushi ta garantisa sobrevivencia di algun especie.” Manera e revista di noticia Der Spiegel a informa, un proyecto di investigacion mundial a mustra cu casi 70 especie di parha y 50 especie di mamifero ta come sushi. Na dump a desaroya henter un cadena di cuminda. Insectonan ta multiplica debi na e calor cu e sushi den estado di descomposicion ta produci. Parhanan y mamiferonan chikito ta come e insectonan aki y despues nan mes ta bira victima di parha yagdo y otro roofdier. Ta interesante pa nota cu algun parha cu di naturalesa ta timido no ta worry cu zonido duro di mashin cu ta comprimi sushi, ni e presencia di otro bestia y hende caminda nan ta dump sushi.
Bandidonan Grandi di Caretera
Ta parce cu no ta hende so ta ladron di caretera. Segun Bangkok Post, olifantinan tambe a join e filanan. Olifantinan golos di e selvanan oost di Bangkok ta blokia e cayanan cu trucknan di caña ta uza y horta nan cargamento suculento. Normalmente, tin mas o menos 130 olifanti ta biba den e reservaat di Ang Lue Nai, pero secura a caba cu e vegetacion disponibel pa nan, y esei a obliga e olifantinan golos pa sali for di selva en busca di cuminda. E supervisor principal di e reservaat, Yoo Senatham, a informa cu algun olifanti a cuminsa invadi plantacionnan, mientras cu otronan ta recohe caña cu chauffeurnan di truck di bon curason ta laga cai pa nan.
Antibiotica pa Bestia
Pa hopi tempo, e Organisacion Mundial di Salu (OMS) a spierta contra uzo excesivo y innecesario di antibiotica pa bestia di crio cu no ta sufri di ningun enfermedad. Segun e corant Spaño ABC, riba un base regular nan ta bruha antibiotica den cuminda di bestia “pa gorda bestia di crio lihe.” Resientemente, un estudio Danes a mustra cu sin yudansa di antibiotica mes, crio di animal por ta rendable. Ora e criadonan a elimina antibiotica for di cuminda di bestia, e produccion di galiña a keda intacto y e costo di produccion di porco a aumenta cu solamente un porshento. OMS a aplaudi e iniciativa Danes y ta animando otro paisnan pa nan tambe tuma e medida ei. Segun e corant, “si nan hacie, lo e ta beneficioso pa salu publico tambe.”
Hungadonan di Ahedrez Tramposo
“Hopi hungado di ahedrez no ta tuma e reglanan tur ora mucho na serio”, segun Frankfurter Allgemeine Zeitung. Un ehempel ta di un hungado amateur cu a gana un gran maestro. Pero despues nan a haya sa cu bou di su cabei largo e tawatin un microfon, un headphone y un camara pa e por a comunica cu un hungado di ahedrez sinta na un computer den un otro sala. Ta conoci cu otronan ta bai toilet, sera porta y saca un mini-computer pa calcula nan siguiente hugadanan. Hungamento on-line tambe sa tin masha triki. Algun tramposo, tanten cu nan ta hunga on-line, tin un programa di ahedrez habri riba nan computer. Den otro casonan e hungado ta participa bou di dos nomber y hunga contra su mes; door cu semper un nomber ta perde, e otro ta clasifica mas halto. E corant ta bisa: “Pa hopi hende no ta cuestion di gana un premio. . . . Mayoria biaha, e motivacion no ta golosidad, sino djis pa e kick.”
Nunca Mucho Bieu pa Siña!
E corant Daily Nation di Nairobi a declara: “Ora e muchanan di seis aña ta tuma les na [un scol basico na Rift Valley Province di Kenia], un di e alumnonan a ‘keda manera mi so den boso.’” Ta trata di un homber di 84 aña cu resientemente a join e muchanan di eerste klas pa “e por siña lesa Bijbel.” Aunke e tin nieto den klasnan mas halto cu ne, toch e ta bai su lesnan. E homber a bisa e corant: “E hendenan ta bisa mi cierto cosnan di Bijbel cu ami no sa si nan ta berdad of laga. Pesei mi mes kier lesa e Buki Sagrado ei pa haya sa kico ta kico.” Completo cu su uniform y otro cosnan di scol, e ta haci su best pa adapta su mes na e reglanan stricto di scol. Tin otro cos si cu nan ta haci un excepcion p’e. Por ehempel, ora e otro alumnonan ta haci gymnastiek y core rond, e “tin mag di strech su musculonan suavemente.”
Temblornan Mortal den 2003
Segun un comunicado di prensa, “e Departamento Geologico Mericano ta bisa cu 2003 tawata e aña mas mortal pa loke ta temblor for di 1990, 25 biaha mas fatal cu aña 2002. Na 2002, 1711 hende a muri den temblornan rond mundo”, mientras cu aña pasa 43.819 hende a perde nan bida. Rond di 41.000 di e mortonan ei a tuma luga na Iran ora un temblor cu magnitud di 6,6 a asota e stad di Bam dia 26 di december. E temblor mas fuerte, y e unico cu por ser cualifica como un temblor “grandi”, tawata esun cu a tuma luga na Hokkaido, Japon, dia 25 di september. E tawatin un magnitud di 8,3. Segun e informe, “e Departamento Geologico Mericano ta localisa rond di 50 temblor pa dia. . . . Como promedio, tin 18 temblor principal (magnitud di 7,0 pa 7,9) y un temblor grandi (8,0 of mas halto) pa aña rond mundo. Tur aña tin miyones y miyones di temblor rond mundo, pero hopi no ta ser detecta pasobra nan ta tuma luga den areanan remoto of nan tin un magnitud masha chikito.”
Pakico Tin Tanto Delincuencia Hubenil?
Specialistanan ta kere cu problema di famia ta e causa di e aumento rapido den e cantidad di mucha criminal. Manera un informe den e corant Surafricano Weekend Witness a señala, mayoria di e muchanan aki ta bini di famianan kibra of famianan caminda ambos mayor ta traha y ta “mucho druk, cansa of na careda” pa atende cu nan. Segun e criminologo dr. Irma Labuschagne, hopi teenager no ta ni compronde e concepto di “famia” y “tin masha deseo di haya amor y aceptacion.” Pesei nan ta busca e cosnan aki otro caminda y ta bira victima facil di gangnan criminal cu ta duna nan e sintimento cu nan ta wordo acepta door di e grupo. E psicologo dr. Cecelia Jansen a remarca cu mayornan “ta asina ocupa den nan mes buskeda pa un miho nivel di bida, exito y materialismo cu nan no sa kico ta pasando den bida di e miembronan di nan famia.” E corant ta bisa cu tanto Labuschagne como Jansen ta recomenda pa “bai bek na e balornan di famia di antes.” E ta conclui: “No tin nada mas miho cu un bida di famia salu, felis y normal.”