E Punto di Bista Biblico

Con Nos Tin cu Trata Hende di Edad?

DEN e zomer di 2003, miles di hende rond Europa a muri debi na un di e piyo olanan di calor den 60 aña cu a asota e continente. Mayoria di e mortonan tawata hende di edad. Algun di nan a keda nan so atras door cu nan famianan a bai cu facansi. Segun informenan, otronan a ser descuida of neglisha door di hospital y personal di casnan di cuido cu tawatin nan mannan yen e dianan ei. E corant Le Parisien a informa cu na Paris so, tawatin 450 cadaver cu ningun famia no a bin reclama. “Ta den ki tipo di situacion nos ta bibando cu nos ta lubida riba nos mama cu tata y nos welanan?” e corant a puntra relaciona cu situacion di e personanan cu a muri nan so sin cu ningun hende tawata sa mes ta ken nan ta.

Den un mundo caminda e poblacion di 65 aña bai ariba ta creciendo cu un rapides nunca bisto di 795.000 persona pa luna, cuido di hende grandi a bira un di e mayor precupacionnan djawe. Nancy Gordon, directora adhunto di programanan demografico di e Departamento di Censo Mericano, a bisa: “E proporcion di hende grandi na tur parti di mundo ta aumentando na un ritmo nunca bisto y nos lo tin cu paga masha tino na con paisnan ta reacciona na e retonan y oportunidadnan di bira hende grandi.”

Nos Creador tambe tin interes den hende di edad. De echo, su Palabra, Bijbel, ta duna nos guia riba con nos mester trata nan.

Respeta Hende di Edad

E Lei di Dios, duna na Moises, a anima e pueblo pa respeta hende di edad. E Lei a declara: “Lanta para pa esun cu tin cabei blanco, honra e anciano.” (Levitico 19:32) Adoradonan obediente di Dios mester a “lanta para” pa hende di edad (1) como un señal di respet pa un persona mas grandi y (2) como muestra di e temor respetuoso cu adoradonan di Dios mester tin p’e. Pues, mester a honra hende di edad y mira nan como personanan util y di gran balor.—Proverbionan 16:31; 23:22.

Aunke awe cristiannan no ta bou di e Lei di Moises, su principionan ta revela e pensamento- y prioridadnan di Yehova, y no ta laga duda cu hende di edad tin gran balor den su bista. Miembronan di e congregacion cristian di prome siglo a compronde e principionan aki. E prome evidencia di esei nos ta haya den e buki biblico di Echonan. Entre e cristiannan na Herusalem di e tempo ei tawatin algun biuda den necesidad. Casi sigur varios di nan tawata hende di edad. E apostelnan a nombra shete “homber di bon reputacion” pa haci sigur cu e mohenan aki a ricibi suministro diario di cuminda na un manera ordena. E apostelnan a considera e cuido special ei como un “tarea” di e congregacion.—Echonan 6:1-7.

Apostel Pablo a aplica e principio di ‘lanta para pa cabei blanco’ na e congregacion cristian. El a bisa e superintendente cristian mas hoben, Timoteo: “No reprende un homber bieu na manera bruto, ma mas bien spiert’e manera ta spierta un tata. Trata . . . e mohenan mas bieu manera mama.” (1 Timoteo 5:1, 2) Aunke e hoben Timoteo tawatin cierto autoridad riba cristiannan di edad, apostel Pablo a bis’e pa no menosprecia un homber di edad. Mas bien, e mester a respet’e manera un tata. Y e mester a mustra e mesun honor aki na mohenan di edad den e congregacion. Eigenlijk, apostel Pablo a spierta Timoteo—locual ta aplica na tur miembro di e congregacion cristian tambe—pa ‘lanta para pa cabei blanco.’

Naturalmente, hende deboto na Dios no tin mester di un set di lei pa trata hende di edad cu dignidad y respet. Considera e ehempel biblico di Yosef (Hose). Ningun esfuerso pa trece su tata di edad Egipto tawata di mas p’e, y door di esei el a salba Yacob di 130 aña di un hamber extenso. Ora Yosef a mira su tata pa prome bes den mas cu dos decada, “el a cai den su brasa y a yora . . . pa un bon rato.” (Genesis 46:29) Cu su accion Yosef a refleha e punto di bista di Dios hopi tempo prome cu e asunto di trata hende di edad cu compasion y respet profundo a bira lei pa e Israelitanan.

Durante Hesus su ministerio, e tambe a mustra interes den hende di edad. Energicamente el a condena e lidernan religioso cu a neglisha nan mayornan di edad, hustificando esei cu nan tradicionnan religioso. (Mateo 15:3-9) Hesus, como muestra di su amor, a percura pa su mes mama tambe. Den tur e dolor agonisante cu e tawata sufriendo riba e staca di tormento, el a haci sigur cu Huan, su apostel stima, lo a cuida su mama di edad.—Huan 19:26, 27.

Dios No Ta Bandona Hende Cu Ta Leal na Dje

E salmista a pidi den oracion: “No benta mi afo den tempo di biehes; no bandona mi ora mi forsa ta faya.” (Salmo 71:9) Dios no ta “benta” su sirbidonan fiel “afo” ni ora nan mes haya cu nan no ta util mas. E salmista no a sinti cu Yehova a bandon’e; mas bien el a reconoce cu e mes tawatin cu depende riba su Creador mas cu nunca segun cu e tawata birando bieu. Yehova ta recompensa e lealtad ei door di sostene nos den henter nos bida. (Salmo 18:25, NW) Hopi bes e sosten ei ta bini mediante nos rumannan cristian.

En bista di loke nos a considera, nos a mira bon cla cu tur hende cu kier honra Dios mester honra hende di edad tambe. En berdad, hende grandi ta precioso den bista di nos Creador. Como criaturanan traha den Dios su imagen, laga nos semper manifesta su punto di bista di “cabei blanco.”—Salmo 71:18.

[Plachi na pagina 25]

Cristiannan ta trata hende di edad cu honor y respet