Con pa Enfrenta e Problemanan Como un Mama Teenager

EMBARASO hubenil ta trece cu ne e carga di tin cu tuma decisionnan di hende adulto. Un mama teenager a bisa: “Mi ta sinti como si fuera mi tin 40 aña. Mi a perde henter mi hubentud.” Si, despues cu un hobensita haya sa cu e ta na estado, lo e por sintie completamente aplasta pa miedo y precupacion.

Si bo ta un teenager na estado, kisas bo mes tambe ta sinti bo asina. Sinembargo, bo no ta logra nada door di laga emocionnan negativo paralisa bo. Bijbel ta bisa: “Esun cu observa biento no ta sembra, y esun cu observa e nubianan no ta cosecha.” (Eclesiastes 7:8; 11:4) Un cunukero cu ta stop di traha pasobra e ta precupa pa motibo di e weer, lo no tuma e accionnan necesario. Pues, no laga e situacion paralisa bo. Tardi of tempran bo tin cu sigui cu bo bida y carga bo propio carga di responsabilidad.—Galationan 6:5.

Ki opcionnan bo tin? Podise tin hende ta bisa bo pa pensa riba aborto. Pero esaki no ta un opcion pa hende cu kier haci loke ta agrada Dios, ya cu Bijbel ta mustra bon cla cu aborto ta contra e lei di Dios. (Exodo 20:13; 21:22, 23, NW; Salmo 139:14-16) Den bista di Dios, bida di cualkier embryo of substancia sin forma ta precioso, incluso di uno consebi pafo di matrimonio.

Kico di casa cu tata di e baby y cria boso yiu hunto? Kisas bo ta pensa cu casamento por lo menos lo scapa bo di poco berguensa. Pero asta ora un tata hoben ta sinti un responsabilidad moral pa yuda cu criansa di su yiu, casamento no ta semper un opcion sabi.a E echo cu un mucha homber por procrea, no necesariamente kiermen cu e tin e capasidad emocional y mental pa ta un bon casa y tata. Tampoco esei kiermen cu financieramente e por mantene un esposa y un yiu. Ademas, si bo casa cu un mucha homber cu no tin e mesun creencianan religioso cu bo, bo ta bai contra di e conseho biblico pa casa “basta ta den Señor.” (1 Corintionan 7:39) Experencia ta mustra cu core casa prome cu tempo—y kisas pa corto tempo—por resulta solamente den mas dolor y sufrimento.

Kico di laga un otro hende adopta e baby? Aunke esaki di mes ta mas miho cu aborto, bo mester tene cuenta cu e echo cu apesar di bo circunstancia dificil, bo tin e oportunidad di cuida y cria bo yiu.

Con pa Enfrenta e Problemanan

Ta berdad cu no ta facil pa cria un yiu sin un casa. Sinembargo, door di sigui principionan biblico lo miho cu bo por y door di confia den Dios pa duna bo forsa y guia, bo por enfrenta e tantisimo problemanan cu exito. At’aki algun paso cu bo por tuma pa yuda bo trata cu e situacion.

● Drecha bo relacion cu Dios. Bo tin cu realisa cu relacion sexual sin ta casa ta un pica contra Dios, un violacion contra su normanan moral halto. (Galationan 5:19-21; 1 Tesalonicensenan 4:3, 4) Pues, un prome paso hopi importante ta di repenti y pidi Dios pordon. (Salmo 32:5; 1 Huan 2:1, 2) Kisas berdad bo ta sinti cu bo no ta digno di su yudansa. Sinembargo, Yehova ta priminti cu e ta pordona, y e ta yuda esnan cu arepenti di nan picanan. (Isaias 55:6, 7) Na Isaias 1:18, Yehova ta bisa: “Maske boso picanan ta manera escarlata [pisa, serio], nan lo bira blanco manera sneu [limpi limpi].” Tambe Bijbel ta anima hende cu a haci malo pa probecha di e yudansa spiritual cu e ancianonan nombra den congregacion ta ofrece.—Santiago 5:14, 15.

● Stop di tene relacion sexual sin ta casa. Esei probablemente ta nifica cu bo tin cu kibra bo amistad cu e tata di bo yiu. Siguiendo cu e amistad ei sin ta casa cu ne solamente lo pone presion riba bo pa sigui haci cosnan cu ta desagrada Dios. No lubida nunca cu e leinan di Dios, maske nan ta stricto, t’ei pa proteha nos. Nicole, cita anteriormente den e serie aki, ta corda: “Mi a bin realisa cu Dios tin rason. E kier pa nos saca beneficio.”—Isaias 48:17, 18.

● Bisa bo mayornan. Podise cu tur rason bo tin miedo cu bo mayornan lo rabia cu bo. Ta berdad cu nan lo ta malcontento y precupa ora nan haya sa cu bo ta na estado. Kisas nan por asta sinti cu nan a laga bo na caya como mayor y culpa nan mes pa bo mal comportacion. Sinembargo, si bo mayornan realmente ta teme Dios, probablemente cu tempo e pena y dolor fuerte cu nan ta sinti ta pasa. Ta bo mayornan nan ta, y apesar di bo erornan, nan stima bo. Ora nan mira na bo actitud cu bo a repenti, sin duda nan lo sinti nan conmovi pa imita e tata den Hesus su ilustracion di e yiu perdi, y pordona bo amorosamente.—Lucas 15:11-32.

● Demostra gratitud. Mayornan, famia y amigonan hopi bes ta resulta di ta un bon fuente di yudansa y sosten. Por ehempel, bo mayornan kisas ta haci areglo pa bo haya cuido medico. Despues cu bo baby nace, kisas nan ta yuda bo siña e cosnan basico di cuido di yiu; tambe nan por ofrece pa wak e yiu pa bo. Nicole a bisa di su mama: “Ami a haya e baby, pero mi mama a yuda mi masha hopi mes.” Amigonan tambe kisas ta yuda, podise door di percura discretamente pa bo haya paña di baby y otro articulonan cu lo por ta util. (Proverbionan 17:17) Ora hende mustra bondad na bo, sigui e conseho di Bijbel y mustra cu bo ta “gradicido.” (Colosensenan 3:15) Palabranan di aprecio por evita cu e personanan ei ta sinti cu bo no a duna masha balor na nan actonan amoroso.

● Siña desempeña e papel di mama. Claro cu lo bo no kier depende riba bo famia y amigonan pa semper. Pues cuminsa cultiva e habilidadnan cu lo yuda bo te na cierto grado pa bira competente den cuida bo yiu y percura pa un famia. No ta facil pa siña percura pa un ser humano cu tin mester di hopi cuido y atencion. Tin hopi cos cu bo tin cu siña tocante nutricion, salu y otro aspectonan di cuido di yiu. Un punto interesante ta cu Bijbel ta curasha mohenan cristian mas grandi pa anima mohenan mas hoben pa nan ta “bon ama di cas.” (Tito 2:5) Casi sigur bo mama—y kisas otro miembronan mas grandi di e congregacion cristian—por duna bo algun entrenamento balioso den e aspecto aki.

● Maneha placa na un manera sabi. Bijbel ta bisa cu “placa ta proteccion.” (Eclesiastes 7:12) Nacemento di un baby lo resulta den bastante gasto.

Kisas na principio lo bo kier haci uzo di cualkier yudansa publico cu bo ta bin na remarca p’e. Sinembargo, hopi bes un mucha mohe toch tin cu depende financieramente riba su mayornan. Si den bo caso ta asina, lo ta sabi y un muestra di consideracion di bo parti pa baha gasto mas tanto posibel. Aunke sin duda lo bo tin gana di cumpra cos nobo pa bo baby, kisas bo por spar placa door di cumpra cosnan segunda mano.

● Purba haya un educacion. Proverbionan 10:14 ta bisa: “E hende sabi ta montona sabiduria.” Aunke esaki ta cierto specialmente di conocemento biblico, e ta cierto tambe di educacion escolar. Bo tin cu desaroya e habilidadnan necesario pa gana bo pan.

Ta berdad cu ta dificil pa bai scol y alabes cuida un baby. Sinembargo, un falta di educacion basico lo por obliga abo y bo yiu na hiba un bida di pobresa, di biba di onderstand, di tin poco entrada, cas inadecua of sufri di mal nutricion. Pesei haci tur loke ta posibel pa bo sigui bai scol. E mama di Nicole a insisti pa e caba scol, y como resultado, despues Nicole por a sigui un curso pa mantene su mes como un asistent di abogado.

Pakico bo no ta investiga cua ta e oportunidadnan di educacion cu tin disponibel? Si ta mucho dificil pa bo bai sinta den klas, kisas bo por wak si bo por siña na cas. Por ehempel, cursonan via corespondencia por resulta practico pa bo situacion.

Bo Por Tin Exito

Cria un yiu sin ta casa ta dificil pa un mucha mohe. Pero bo por tin exito! Cu pasenshi, determinacion y e yudansa di Yehova Dios, bo por bira un mayor amoroso, capas y competente. Y yiunan di mamanan soltero por crece bira adultonan emocionalmente stabil. Podise lo bo por tin asta e goso di mira bo yiu reacciona positivo riba e formacion y entrenamento cu bo ta dun’e, anto bira un persona cu ta stima Yehova.—Efesionan 6:4.

Nicole a expres’e asin’aki: “Cu Dios su yudansa—y aunke lo por a parce improbabel—mi tawatin e goso di yuda mi yiuchi bira un dams bondadoso, respetuoso y responsabel. Ora mi wak e, mi ta corda riba tur e anochinan cu mi a pasa sin drumi, pero tambe mi curason ta yena cu felicidad.”

Pero con hende grandi mester trata mamanan teenager y nan yiunan? Tin un manera pa yuda hobennan pa asina nan no tin nodi pasa den e dolor di embaraso hubenil?

[Nota]

[Plachinan na pagina 8, 9]

Mamanan teenager ta confronta hopi problema pa cria nan yiu

[Plachi na pagina 10]

Core casa prome cu tempo no ta e solucion

[Plachi na pagina 10]

Ancianonan cristian por yuda hobennan cu a faya pa nan drecha nan relacion cu Dios

[Plachi na pagina 11]

Ta sabi pa mamanan soltero caba nan educacion basico