Kleuterschool sin Co’i Hunga

DI UN ESCRITOR DI SPIERTA! NA ALEMANIA

Un mainta ora e muchanan a yega nan kleuterschool, nan no a haya nada den nan klas cu excepcion di e mueblenan. Nan a busca e popchinan, e weganan y e peluchenan, pero nan no por a haya nan. No tawatin ningun buki ni bloki di hunga tampoco. Asta papel cu sker a disparce. A saca tur co’i hunga for di e klasnan y despues di tres luna lo a trece nan bek. Con bin?

E kleuterschool aki ta un tipo di scol cu ta birando mas y mas popular na Alemania, Austria y Suisa. Nan ta participando den un proyecto remarcabel y inovativo cu yama Kleuterschool sin Co’i Hunga. Pa straño cu e por zona, e proyecto aki su meta ta pa preveni adiccion. Expertonan di salu di Union Europeo a aplaudi e proyecto aki masha hopi. Den ultimo añanan investigadonan a bin realisa cu hende ta menos vulnerable pa cualkier tipo di adiccion si for di tempran den bida nan desaroya habilidadnan social. Segun un informe den corant, e habilidadnan ei ta encera, “habilidad di comunica y di busca contacto cu otro hende facilmente, di handle conflicto, di acepta responsabilidad pa bo accionnan, di pone metanan pa bo mes, di reconoce problema, di busca yudansa y di haya un solucion.” Segun esnan cu ta boga pa e programa aki, mester desaroya e habilidadnan ei mas tempran posibel, y e periodonan sin co’i hunga ta apropiado pa e proposito aki, door cu nan ta promove creatividad y confiansa propio.

E kleuterschool cuidadosamente a plania e tres lunanan sin co’i hunga y a papia di e asunto cu tanto e mayornan como e muchanan. Na principio, algun mucha no tawata sa kico pa haci sin co’i hunga. E informe a bisa cu “tin scol caminda e muchanan ta bira loco durante e prome cuater simannan”, y e kleuterleidsternan ta keda man na cabes. Pero e muchanan ta siña adapta y ta siña bira creativo. Como cu e muchanan no tin cos pa hunga cu ne, nan ta consulta cu otro, plania y hunga mas tanto hunto, y asina nan ta mehora nan habilidadnan social y di idioma. Muchanan cu tawatin custumber di “sconde” tras di nan co’i hunga awor ta sera amistad. Mayornan tambe a nota cambionan positivo. Segun nan, e muchanan ta comporta nan mes mas miho ora di hunga y nan a bira mas creativo cu prome.