E Punto di Bista Biblico

Suavidad Ta un Señal di Debilidad?

“E sirbido di Señor no mester ta pleitado, ma cariñoso cu tur hende.”—2 TIMOTEO 2:24.

H OPI tempo prome cu nos nace, segun cu nos cuero ta desaroya nos ta haya heful. For di nos nacemento nos ta cuminsa anhela e caricia tierno di nos mama. Durante nos infancia, nos tendencia pa smile, nos capasidad pa desaroya emocionalmente y asta nos deseo pa desaroya habilidadnan di comunica ta depende di e cantidad di cariño cu nos ta ricibi di nos mayornan.

Sinembargo, Bijbel a profetisa cu den e ultimo dianan, hende lo ta “desobedecido na mayornan, ingrato, impio, sin amor [“cariño natural”, NW].” Cualidadnan cu ta refleha suavidad tal como cariño y compasion lo a bira masha scars, ya cu hende lo ta “stimado di nan mes” y “grosero, odiado di loke ta bon.”—2 Timoteo 3:1-3.

Hopi hende awe ta pensa cu nan mester ta bruto sin ningun sintimento pa otronan. Nan ta pensa cu ser suave of cariñoso ta un señal di debilidad. Pero esei ta asina?

Suave, Pero Toch Poderoso

Bijbel ta describi Yehova Dios como “un guerero.” (Exodo 15:3) E ta e Fuente principal di tur poder. (Salmo 62:11; Romanonan 1:20) Toch, Yehova su fortalesa no a strob’e di ta ‘yen di compasion y misericordioso’ ora el a recompensa e homber fiel Job. (Santiago 5:11) Den su trato cu e pueblo di Israel, Yehova a describi e relacion di mas tierno cu por existi door di compara su sintimentonan cu esnan di un mama cu ta duna yiu pecho y cu ta sinti duele di e “yiu di su bariga.”—Isaias 49:15, NW.

Hesus tambe a demostra tanto poder como suavidad. Di un manera combencente y firme el a denuncia e lidernan religioso hipocrita di su tempo. (Mateo 23:1-33) Cu un vigor tambe el a core cu e cambiadonan di placa golos for di e tempel. (Mateo 21:12, 13) Pero Hesus su odio contra corupcion y golosidad a pon’e perde heful? Di ningun manera! Hesus tawata conoci como un persona cu tawata trata otronan cu cariño of suavidad. Si, el a asta compara su mes cu un galiña cu “ta hunta su puyitonan bou di su halanan.”—Lucas 13:34.

Duro di Pafo of Fuerte di Paden?

Bijbel ta anima cristiannan berdadero pa imita Cristo door di bisti “e hende nobo, cu a wordo crea segun Dios.” (Efesionan 4:20-24) E ta bisa nos pa “pone un banda e hende bieu cu su practicanan malbado”, mescos cu un cangreu ta kita su casca bieu pa e por crece. (Colosensenan 3:9) Sinembargo, distinto di e curpa di cangreu cu ta bira duro atrobe despues cu e kita su casca bieu, Bijbel ta manda nos pa bisti nos mes permanentemente cu “un curason di compasion, cariño . . . y pasenshi.” (Colosensenan 3:12) Pesei anto, nos mester tin un caracter suave.

E echo cu nos tin un caracter suave no ta nifica cu nos ta debil. Al contrario, e ta rekeri cu nos tin cu laga ‘e spirito di Yehova fortalece e hende cu nos ta di paden.’ (Efesionan 3:16) Por ehempel, un homber cu yama Lee a bisa: “No mucho tempo pasa, mi tawata un persona cruel y malbado. Asta mi aparencia tawata intimidante, pasobra mi a laga bora varios parti di mi curpa pa bisti renchi. Mi tawata dicidido pa gana hopi placa y no tawata basila pa uza palabra malo ni violencia pa logra loke mi kier. Mi no tawatin compasion.” Apesar di esei, Lee a cuminsa studia Bijbel cu un compañero di trabou y a siña conoce Yehova Dios y stim’e. El a kita su personalidad bieu y a siña eherce dominio propio. Awor e ta expresa su amor pa hende door di uza su tempo boluntariamente pa yuda nan studia Bijbel.

Un tempo, apostel Pablo tambe tawata un homber “masha agresivo mes” cu a uza violencia pa logra su metanan. (1 Timoteo 1:13; Echonan 9:1, 2) Sinembargo, ora Pablo a bin compronde y aprecia e misericordia y amor cu Yehova Dios y Hesucristo a mustra na dje, el a reacciona door di haci esfuerso pa imita e cualidadnan ei. (1 Corintionan 11:1) Aunke Pablo a para firme pa principionan cristian, el a siña ser suave ora e tawata trata cu otro hende. Si, Pablo a expresa su tierno cariño na su rumannan sin reserva.—Echonan 20:31, 36-38; Filemon 12.

Con pa Haya e Forsa pa Ser Suave

Manera e experencianan di tanto Lee como di apostel Pablo ta mustra, pa un persona siña trata otro hende cu suavidad, e no tin nodo di tin un caracter debil. Al contrario, pa un persona transforma su mente y accionnan y pa lucha contra e tendencia carnal di “paga malo cu malo”, e mester ta hopi fuerte.—Romanonan 12:2, 17.

Nos tambe por siña ser tierno y compasivo door di lesa e Palabra di Dios riba un base regular y medita riba e amor y misericordia cu Yehova Dios y su Yiu, Hesucristo, a extende na nos caba. Door di haci esei, nos lo permiti e poder di e Palabra di Dios suavisa nos curason. (2 Cronicanan 34:26, 27; Hebreonan 4:12) Sin importa e background di nos famia of ki cosnan cruel nos a experencia den bida, nos por siña pa ta “cariñoso cu tur hende.”—2 Timoteo 2:24.

[Plachi na pagina 18]

Un bon tata ta cariñoso cu su yiunan