E Tera di Moneda Grandi

Di un escritor di Spierta! na Guam

LEU aya den e inmenso Oceano Pacifico, bo ta haya e islanan di Yap. Bunitesa tropical y un clima confortabel ta haci e grupo di isla aki un refugio agradabel pa biaheronan cu ta busca privasidad. Pero hopi bes e turistanan ta keda masha straño di mira con e hendenan ta laga nan placa cu nan a spar riba caya.

Na tur parti di e islanan aki, bo por mira piedra plat den forma di disco dilanti edificionan y canto di caminda. E disconan ei, cu yama rai den e idioma local, ta forma e moneda local di Yap. Aunke algun hende ta warda nan monedanan di piedra na cas, mayoria ta uza “banco” di pueblo. Na e luganan aki no tin bewaker ta para vigila ni cahero pa yuda cliente. Kisas bo no ta mira un edificio mes. En bes di warda placa den un caha fuerte, e “banconan” aki tin nan bienesnan gewoon pafo. Ei na aire liber tin mas disco di piedra, cada un cu un buraco meimei, ta para len contra palo di coco y muraya. Algun di e piedranan aki tin un diameter di cuater meter y ta pisa mas cu cinco ton.

Caminda abo ta biba, kisas bo ta cana cu cen den bo saco, pero aki e monedanan ta asina grandi cu nan no ta pas ni den un auto. For di 1931 nan no a traha ningun di e monedanan aki mas. Pero ainda nan ta moneda legal riba e islanan. Di unda e monedanan straño aki a bini?

Dificil pa Obtene

Segun leyenda, hopi tempo pasa, un grupo di biahero di Yap a yega na e isla di Palau y a haya algun di su bunita piedranan. Nan a hiba nan bek na Yap, y einan e pueblo a dicidi di uza nan como moneda. Nan a cuminsa corta e piedranan den forma di disco, paresido na luna yen, pero cu un buraco meimei.

Pa loke ta e material cu e hendenan di Yap a uza, nan tawata masha selectivo. Nan a prefera mineralnan cu awe nos conoce como aragoniet y calciet. Aragoniet, cu ta wordo haya den tera, ta un substancia cu ta wordo haya tambe den perla, y calciet ta e componente principal den marmer. Tur dos ta keda hopi bunita ora corta nan habilmente, pero ningun di nan dos ta ser haya na Yap. Pues e hendenan di Yap a sigui bai busca piedra na Palau. Palau ta keda rond di 400 kilometer suitwest di Yap, un biahe di cinco dia riba un lama peligroso den canoa cu vlot pega na dje.

Na Palau, despues cu e hendenan di Yap a haya permit di e hefe di e isla, nan a cuminsa e trabou di coba den baranca masivo. Cu uzo di hermentnan primitivo, nan tawata corta pidanan grandi di piedra for di cuebanan bou di tera y duna nan forma di disco. Por a tuma lunanan y tin biaha añanan di trabou cu martiu cu beitel pa traha djis un di e monedanan ei!

Nan tawata traha buraco den e piedranan pa por a pasa palo largo y duro door di nan riba cua nan por a carga e piedranan aki hiba cant’i beach. Ei nan tawata pone e monedanan nobo riba canoa of vlot di bambu. Pa transporta un pida grandi, e trahadonan tawata pon’e para den awa y despues traha un vlot grandi rond di dje. Cu biento den e belanan y brasa fuerte tras di e remanan, nan tawata hiba e vlot cu e monedanan nobo pa Yap.

Tur e trabou aki tawata sosode na man, y e proceso tawata peligroso. Si, hopi tawata esnan cu a sufri lesion of muri ora nan tawata corta y move pidanan masivo di baranca riba tera. Y e biahe bek pa Yap tambe tawatin su peligernan cu ne. Rond di Yap y Palau tin moneda di piedra visibel den fondo di lama, loke ta indica cu no ta tur e monedanan ni tur hende cu a hala e monedanan a yega Yap sano y salvo. Sinembargo, cada moneda bou di awa ta pertenece na un hende di Yap. Nan tin mes balor cu e piedranan den forma di disco riba tera.

Cuanto Nan Ta Bal?

Despues cu un hende cumpra un cos y paga cu rai, por lo general e doño nobo ta laga e piedra caminda e ta. Hopi di nan ta na nan luga actual pa hopi decada y ta bastante leu for di cas di nan doñonan actual. Ladronicia no ta un problema.

Si un ladron haya gana di cohe un moneda di piedra, lo e mester tin hopi forsa pa his’e bai cu ne. Ademas, e mester tin suficiente curashi, pasobra e biciñanan sa bon ken ta doño di cada wiel di piedra y nan tin masha respet pa derecho di propiedad.

Con bo ta determina e balor di un moneda di piedra? Na prome luga, bo ta tuma nota di su tamaño, su bunitesa natural y e calidad di e escultura. Despues bo ta considera su historia. Con bieu e ta? Tawata dificil pa cob’e, sac’e y cort’e? Bida di e hendenan cu a transport’e pa Yap tawata na peliger? Tin cu asta a perde nan bida? Finalmente, kico ta e posicion social di e personanan envolvi den e transaccion? Moneda di piedra den man di un hefe tin mas balor cu esun cu un hende gewoon tin.

Na 1960, ora un banco stranhero a cumpra un moneda di piedra cu tawata un meter y mei hancho, e historia di e piedra ei a bira conoci pa e mundo di pafo. Aparentemente e tawata den circulacion for di 1880. Un tempo el a sirbi pa paga trahado cu a construi un cas. Na un otro ocasion e habitantenan di un pueblo a regal’e na hende di un otro pueblo biciña pa nan presentacion di un baile special. Despues un doño di cas a uz’e pa paga un suministro di plachi di zim pa dak. Tur e transaccionnan aki a tuma luga sin cu e piedra a move for di su sitio original, y nan no a tene ningun registro tampoco. Tur hende riba Yap sa precis ken ta doño di e piedranan y e historia tras di nan.

Mas Grandi No Ta Semper Miho

Ora a introduci rai centenares di aña pasa, e monedanan di piedra tawata asina scars y balioso cu ta solamente e hefenan por a posee nan. Despues, na cabamento di siglo 19, hermentnan di hero y barco di carga a haci posibel pa corta y transporta hopi mas di e monedanan aki, incluso e grandinan. Aunke e monedanan mas nobo ta mas grandi cu esnan mas bieu, nan tin menos balor ya cu nan no a ser traha segun e sistema tradicional cu a exigi mucho mas esfuerso.

Na 1929 un conteo oficial a mustra cu tawatin 13.281 piedra—mas cu e poblacion di e islanan! Segunda Guera Mundial a trece un cambio den esei. Trupanan a confisca hopi di e monedanan di piedra y a kibra algun di nan pa traha pista di aterisahe y luganan fortifica. Ta mitar di e disconan di piedra so a sobra. Hende cu ta gusta souvenir y coleccionistanan priva tambe a bai cu hopi di nan. Awe, gobierno ta considera e monedanan di piedra aki como un tesoro cultural y ta duna nan proteccion legal.

Na Yap, placa no ta crece na palo, pero ainda e hendenan ta laga nan rikesa riba caya pa tur hende mira!

[Mapanan na pagina 20]

(Pa e texto den su formato completo, wak e publicacion)

Japon

OCEANO PACIFICO

Filipinas

Saipan

Guam

Yap

Palau

[Reconocemento]

Planeta: Mountain High Maps® Copyright © 1997 Digital Wisdom, Inc.

[Plachi na pagina 21]

“Banco” di moneda di piedra

[Plachi na pagina 22]

Algun di e monedanan aki na Yap por pisa mas cu cinco ton