Ta Para Skirbi Cu Lo Mi Mir’e

Segun e relato di Rosalía Phillips

“Lo bo tin hopi exito! Bo tin e talento pa yega basta leu!” Eseinan tawata e palabranan cu nos director musical, sinta na su piano, a bisa mi un poco prome cu e cortina di escenario a bai halto. E cuater otro miembronan di e grupo a haci un seña di bonbini na mi. Cu mi bisti cora tur na payet, mi tawata e cantante mas nobo den e grupo. Nervio a domina mi. Ata mi aki den un di e teaternan di mas importante na Ciudad di Mexico, haciendo mi debut, cuminsando un carera den e mundo di farandula! Tawata maart di 1976, y tawata falta un luna pa mi a haci 18 aña.

MI TATA a muri tres aña mas prome, y ainda e tawata bibo den mi memoria. E publico tambe tawatin bon recuerdo di dje. E tawata masha stima y admira como un di e miho actornan comico di e pais. El a aparece den mas cu 120 pelicula durante loke hopi bes ta ser yama e epoca di oro di cine Mexicano. Su nomber, Germán Valdés, alias “Tin-Tán”, tawata aparece riba entrada di teaternan rond Centro- y Sur America y den e areanan di abla Spaño di Merca y Europa. Te awe, mas cu 30 aña despues di su morto, tur ora nan ta pasa su peliculanan na television.

For di tempo mi tawata un hobensita, mi cas tawata un luga di encuentro pa hende famoso. Mi mama cu su ruman mohenan a forma un trio di cantante cu tawata yama Las Hermanitas Julián. Su ruman homber Julio Julián tawata un tenor di opera renombra na Europa, mientras cu su esposa Spaño, Conchita Domínguez, tawata canta soprano. Ademas, e rumannan di mi tata, Manuel “Loco” Valdés y Ramón Valdés, miho conoci como Don Ramón, tawata comediantenan famoso di television.

Studionan di filmacion y di grabacion, y tambe teaternan tawata luganan conoci pa ami cu mi ruman Carlos, pasobra hopi bes ora mi tata tawata bai trabou y riba su giranan e tawata bai cu nos; den e forma ei e tawata tene e famia uni. Ki un contraste grandi tawatin entre e ambiente superficial di e mundo di farandula ei y nos hogar, caminda a reina berdadero harmonia y amor! Mi ta corda mi tata como un homber masha tierno, yen di vitalidad y amor pa bida. E tawata sumamente generoso, tin biaha asta di mas. El a siña mi cu felicidad no ta bini di loke bo tin sino di loke bo ta duna.

Un Cambio Devastador

Na fin di aña 1971, mi mama a duna ami cu mi ruman e noticia tristo cu docternan a diagnostica cu nos tata tawatin un enfermedad incurabel. Un aña y mei largo mi a mir’e sufri segun cu e tawata lucha bou di influencia di remedinan fuerte.

Te awe mi ta corda e dia cu mi a mira ambulans bini nos cas pa hib’e hospital. Mi tawata sa cu lo e no bolbe bek nunca mas. Casi mi no por describi mi dolor. Mi a dicidi cu ya cu e tawata sufriendo, ami tambe lo mester a sufri. Mi a paga un sigaria den mi planta di man y a yora sin cu ni un hende por a consola mi. Dia 29 di juni 1973 mi tata a fayece. Mi a cuminsa puntra mi mes: ‘Pakico un hende asina bon, cu a trece asina tanto alegria, tin cu bai laga nos? Unda e ta awor? E por tende mi si mi papia cu ne? Awor cu e no t’ei mas, ki nificacion mi bida tin?’

Un Carera sin Proposito

Despues cu mi a tuma poco tempo pa recobra emocionalmente, mi a cuminsa un estudio pa bira binnenhuisarchitect. Pero mi tawata poco rebelde, y mi a kita for di scol. Ami cu mi mama a dicidi di sali mas tanto. Nos tawata bai fiestanan elegante den e mundo di entretenimento. Hopi bes e anfitrion tawata caba fiesta bisando, “Rosalía, toca un di bo piesanan pa nos.” Nan tawata gusta mi stem y e sintimento cu mi tawata hinca den mi musica. Nan tawata bisa cu mi a hereda e talento di mi mayornan.

Na un di e fiestanan ei, e compositor y director di Arturo Castro y Su Castronan 76 a tende mi canta y a invita mi pa join su grupo. Na prome instante, mi no a gusta e idea masha. Aunke mi a stima musica y mi tawata toca guitara y compone for di tempo mi tawatin 14 aña, mi no kier a bira un artista profesional. Pero mi mama a keda insisti pa mi dal bai, y asina yuda mi famia financieramente. Pues finalmente, mi a acepta. Esei a hiba na mi debut describi anteriormente.

For di cuminsamento di mi carera, mi tawatin trabou constantemente. Nos grupo a haci un gira rond Mexico, y nos tawata duna presentacion dos biaha riba un anochi. Nos a traha na Guatemala, Venezuela, New York y Las Vegas. Mi a keda cu e grupo dos aña largo. Despues mi a haya un oferta pa hunga den pelicula. Mi a haya dos papel secundario den pelicula y un rol principal, pa cua mi a gana dos premio importante.

Un dia mi a ricibi un yamada di e compania di television mas importante di e pais. Nan a ofrece mi un contract exclusivo cu lo a permiti mi bira un di nan actrisnan principal y tambe protagonista den un novela cu a carga mi nomber. Esei lo a hiba mi na e top di e mundo di entretenimento. Lo mi a ricibi un salario fabuloso, asta si mi no a traha regularmente. E sintimento cu mi no a merece tur esei y miedo di perde mi libertad a pone mi nenga e oferta. Mi a acepta si pa hunga den e novela, pero cu e condicion cu lo mi por a sigui studia arte dramatico na universidad. Toch, mi no tawata felis. Loke a molestia mi ta cu otro actornan tawatin cu lucha hopi aña pa por haya un papel principal, mientras cu ami a hay’e djis pasobra mi ta yiu di Tin-Tán.

Despues mi a cuminsa graba disco. Mi prome grabacion tawata un piesa pa e novela. Mi mes a compone tanto e letranan como e musica. Despues mi a graba den un studio famoso na London. Mi a graba mas piesa, pelicula y novela. E prome paginanan di seccion di farandula den corantnan a cuminsa presenta articulonan tocante mi, pues bo por bisa cu mi a alcansa e top di exito. Toch mi a sinti falta di algo. Mi tawata mira con arogante y obsesiona e actornan tawata, y tambe tawatin hopi inmoralidad y falta di sinseridad entre nan. Mi a perde confiansa den hende.

Un dia den e herfst di 1980, mi a mira mi omo Julio na un reunion di famia. El a dicidi di bandona opera, y mi a scuch’e papia tocante un paraiso cu Dios a priminti. Omo Julio a bisa cu inhusticia y tristesa lo disparce for di tera y cu amor lo prevalece. Tambe el a bisa cu e nomber di e Dios berdadero ta Yehova. Loke a atrae mi mas tanto tawata ora mi a tende cu den Paraiso nos sernan keri lo wordo resusita. Mi a keda encanta cu e posibilidad di mira mi tata atrobe. Nunca mi a stop di sinti su falta y anhela su sosten y cariño. Lo ta algo maraviyoso di por mir’e bek atrobe! Pero den mi sintimentonan di mas profundo esei a parce mi imposibel. Omo Julio a duna mi un Bijbel y a invita ami cu mi mama pa asisti na un congreso di Testigonan di Yehova cu lo a bai tuma luga den un par di siman. Nos a bis’e cu podise nos lo a bai.

Mi A Dicidi di Cambia Mi Bida

Un anochi mi tawata huma riba cama mientras mi tawata lesa e Bijbel cu mi omo a duna mi. Loke mi a lesa den e buki di Proverbionan a pone mi yega na e conclusion cu lus, comprondemento y bida a origina cu Dios, mientras cu scuridad, confusion y morto a bini for di un fuente contrario. E mesun anochi ei, mi a paga e ultimo sigaria cu mi a yega di huma y a warda mi mama yega cas. Cu awa na wowo, mi a pidie yuda mi tuma algun decision grandi. Despues, mi a bai na e teater caminda mi tawata ensayando e papel di Cordelia den e obra Rei Lear di Shakespeare. Mi a stop di actua y a kibra cu mi mucha homber, cu tawata un di e actornan principal.

Sinembargo, ainda mi no a siña sirbi Dios, pues mi no tawatin nada pa len ariba. Mi a cai den un depresion profundo. Mi a resa na Dios pa e yuda mi haya e sintimento cu mi ta echt pertenece na algo pa loke mi ta como persona, y no pa cualkier talento hereda of un nomber di hopi fama. Mi a pone fin na tur mi asociacionnan y actividadnan regular.

E Caminda pa Berdadero Exito

Meimei di mi confusion, mi a corda e invitacion cu Omo a duna mi pa asisti na un congreso. Mi a yam’e, y el a hiba mi e stadion. Loke mi a mira ei a conmove mi. Mi a mira hende nechi bisti cu no tawata papia palabra malo ni huma, y no tawata purba impresiona ni un hende. Loke mi a tende for di Bijbel a pone mi corda loke mi a lesa den e buki chikito titula E Bijbel realmente ta Palabra di Dios?a cu mi a haya na cas un poco despues cu mi tata a muri.

Rond di e tempo aki nan a ofrece mi un otro papel principal den un novela. Mi a gusta e papel, ya cu el a parce di sostene e balornan cu ta agrada Dios cu mi a siña na e congreso. En bista di esei, mi a acepta e rol. Di otro banda, e palabranan di Bijbel aki a sigui pasa den mi mente: “No uni boso mes den yugo desigual cu incredulonan, pasobra . . . ki comunion lus tin cu scuridad?”—2 Corintionan 6:14.

E deseo pa agrada Dios tawata bira ora pa ora mas fuerte den mi. Mi kier a bai un reunion na Salon di Reino cu mi omo y tanta. Nan congregacion tawata un ora for di mi cas, pero e siguiente tres diadomingonan mi a bai. Mi omo a dicidi di hiba mi na un congregacion den mi bicindario. Nos a yega net ora e reunion tawata cabando, y ei mi a topa Isabel, un mucha mohe di mi edad. E tawata bondadoso y no tawata un hende cu idea. Ora mi omo a introduci mi na dje como Rosalía Valdés, e no a presta ni un tiki atencion na mi nomber. Esei a haci mi masha contento. El a ofrece pa studia Bijbel cu mi na mi mes cas.

Nos a cuminsa studia Bijbel uzando e buki E berdad cu ta hiba na bida eterna.b Isabel a adapta su mes gustosamente na mi programa. Tin dia e tawatin cu warda mi te anochi laat, ora mi a caba cu filmacion di e novela. Mi tawata hopi gradicido cu aki tawatin un persona interesa den mi simplemente pasobra mi kier a siña e berdadnan di Bijbel! E tawata un persona honesto y cu masha bon manera, esta, cualidadnan cu mi a kere cu un hende por a haya solamente door di studia filosofia y arte. Nos a haci areglo pa studia pa hopi ora, tin biaha varios bes pa siman.

Na principio tawata dificil pa mi pa elimina mi ideanan robes, pero gradualmente e berdad di Bijbel a cuminsa remplasa nan. Mi ta corda con e siguiente promesa di Dios a lanta mi animo: “Aki poco tempo e malbado lo no t’ei mas; maske cuanto bo busca su luga, e lo no t’ei. Ma e humildenan lo hereda e tera, y lo deleita nan mes den pas abundante.” (Salmo 37:10, 11) Ademas, e speransa di mira mi tata atrobe den Paraiso a cuminsa bira real pa mi. Hopi bes mi tawata pensa riba e palabranan di Hesus: “No straña boso di esaki, pasobra e ora lo yega den cual tur cu ta den graf lo tende su bos, y lo sali; esnan cu a haci bon, pa un resureccion di bida.”—Huan 5:28, 29.

Ora mi a caba cu e novela, mesora otro ofertanan a drenta su tras. Aunke e proyectonan ei lo por a haci mi mas famoso, si mi a participa den nan, esei lo a nifica cu lo mi a aproba inmoralidad, idolatria y otro ideanan falso. Mi a siña cu Satanas ta un persona real y cu e no kier pa nos sirbi Yehova. Pesei mi a nenga e ofertanan y a cuminsa asisti na tur e reunionnan. Naturalmente, ni mi mama ni mi ruman homber no a compronde pakico mi tawata desperdiciando asina tanto oportunidad y asina tanto placa. Na mesun tempo, nan por a mira un transformacion den mi. Mi tawata cambiando for di un persona infelis y deprimi pa uno bibito y yen di goso. Porfin, mi bida a haya un proposito!

Mi a sinti e deseo pa comparti loke mi tawata siñando cu otro hende y un poco despues mi a bira un publicado di e bunita mensahe di e Reino di Dios. Ora mi tawata predica, tin biaha tawata dificil pa capta e doño di cas su atencion; hopi tawata reconoce mi como actris. Na mas cu un ocasion, ami cu mi compañera a yega cas di hende net na momento cu nan tawata wak e novela cu mi tawata hunga aden. E hendenan no por a kere cu ta ami tawata para na nan stupi!

Dia 11 di september 1982, mi a batisa como simbolo di mi dedicacion na Yehova. Awor mi bida tawatin un berdadero proposito, y mi tawatin un otro tipo di carera mi dilanti. Isabel su entusiasmo pa e ministerio a motiva mi. E tawata traha como pionero regular, manera nan ta yama e ministernan di Testigonan di Yehova cu ta traha full-time den sirbishi. No a tarda mucho cu mi tawata compañ’e segun cu e tawata studia Bijbel cu otro personanan. Isabel a bira mi miho amiga.

Practicamente mi a stop cu mi trabou como artista, pues ami cu mi mama tawatin cu contenta nos cu un nivel di bida mas abou. Mientrastanto, mi a compone musica pa mi di cuater disco, locual a inclui algun cantica tocante mi balor- y creencianan nobo. Mi a skirbi un cantica tocante e speransa firme cu mi tawatin di mira mi tata atrobe. E titulo cu mi a duna e cantica ta: “Ta Para Skirbi—Lo Mi Mir’e.” Ora mi a cant’e prome bes pa mi mama, esei a conmov’e profundamente. El a sinti mi conviccion genuino. Mi a bira hopi contento ora el a expresa su deseo di studia Bijbel. Dos aña despues, el a batisa como sirbido di Yehova. Te na e dia djawe e ta activo den su sirbishi.

Segun cu tempo a pasa, a bira mas facil pa mi nenga oferta di trabou. Y ora mi a haya mi enfrenta cu prueba of tentacion, mi tawata imagina mi e esena maraviyoso di mi tata hunto cu nos den un bunita paraiso, locual a fortalece mi confiansa y determinacion pa sigui sirbi Yehova.

Un dia nan a pidi mi pa actua den e version Spaño di e programa pa mucha, Sesame Street. Mi a pensa cu lo mi no por hacie y mi a informa e productor cu mi principionan biblico lo no a permiti mi promove cosnan manera dia di fiesta y celebracion di cumpleaño. E productor a contesta mi cu si mi a acepta e trabou, lo el a respeta mi creencianan y cu nos lo por a firma un contract cu lo a contene e detayenan spesifico ei di mi posicion. Pesei mi a acepta y a filma 200 episodio. Esei tawata mi ultimo proyecto como actris.

Tawatin un contract mas pendiente ainda cu e compania di grabacion; pues mi a graba dies di mi composicionnan cu ne, incluso e cantica cu mi a compone tocante mi tata y resureccion. Mi a haya oportunidad pa canta e cantica ei na television y na algun presentacion personal, durante cua semper mi a menciona mi creencianan. Sinembargo, e compania a cuminsa pone presion riba mi pa mi presenta un imagen mas sensual. Ei mi a entrega mi retiro.

Bendicionnan den Sirbishi di Dios

Na december 1983, ami cu Isabel a bishita e facilidadnan di Testigonan di Yehova na Brooklyn, New York. Ei mi a topa e homber cu despues a bira mi casa, Russell Phillips. Nos a skirbi otro pa casi dos aña. Mi ta corda cla cla e dia cu mi a cuminsa mi sirbishi como pionero regular; Russell a manda un boeket di rosa pa mi for di New York!

Pa un aña largo mi a traha pionero cu Isabel. Despues el a ser invita pa sirbi na e sucursal di Testigonan di Yehova na Mexico. Su combersacionnan tocante su asignacion nobo a lanta den mi e deseo pa aumenta mi sirbishi y, si tawata Yehova su boluntad, pa mi tambe sirbi na Betel.

Russell tawata un otro bendicion den mi bida. Gracias na su amor pa Yehova y Su organisacion, mi a siña stima sirbishi di tempo completo. E tawata stima Betel y a sirbi na Betel na Brooklyn pa tres aña. Despues cu nos a casa, nos a sirbi hunto como pionero regular na Colorado, Merca. Despues, nan a invita nos pa sirbi como trahado internacional den construccion na sucursalnan nobo den otro paisnan. Grandi tawata nos sorpresa ora nos a haya sa cu nan a asigna nos pa bai sirbi na Mexico! Na april di 1990, nos a acepta gustosamente e privilegio gososo di bira miembro di e famia di Betel na Mexico. E ehempel di Russell tawata un tremendo estimulo pa mi. Mi a admira e spirito di sacrificio propio cu a motiv’e pa bandona su pais natal y famia pa promove interesnan di Reino aki na Mexico.

Ami cu Russell a disfruta hopi di nos privilegio di sirbishi na e sucursal di Mexico. Pero cosnan a cambia diripiente ora mi a sali na estado. E noticia a cohe nos di sorpresa. No obstante, semper nos a admira mayornan cu a lanta nan yiunan den e caminda di e berdad, y cu un curason gradicido nos a acepta esaki como un asignacion nobo. Na october 1993, Evan a nace, y dos aña y mei despues, Gianna. Aunke lantamento di yiu ta rekeri esfuerso continuo, cada biaha cu nos dos yiunan di 11 y 8 aña di edad expresa nan propio fe ora nan ta den sirbishi, esei ta duna nos hopi satisfaccion.

Actualmente Russell ta sirbiendo den un Comite Regional di Construccion di Salon di Reino, y ami resientemente a cuminsa bek cu e sirbishi di tempo completo como pionero. Durante e ultimo 20 añanan, mi por a yuda 12 miembro di mi famia, y tambe 8 otro hende, siña e berdad di Bijbel y sirbi Yehova.

Ora mi yiunan puntra mi, ‘Mami, tawata dificil pa bo laga e mundo di farandula?’ mi ta cita e palabranan di apostel Pablo: “Mi ta considera tur cos como pierde compara cu e balor superior di conoce Cristo Hesus mi Señor, pa kende mi a sufri pierde di tur cos, y ta considera nan como basura, pa mi por gana Cristo.” (Filipensenan 3:8) Mi ta hopi gradicido cu Yehova a rescata mi for di un bida vano y sin proposito y a permiti mi bira parti di su pueblo maraviyoso! Nunca mi ta cansa di gradicie pa e tantisimo bendicionnan cu el a percura pa medio di su Yiu, Hesucristo. Hopi bes mi ta canta gososamente e cantica cu mi a skirbi tocante mi tata. Mi tin confiansa cu lo mi mir’e atrobe.

[Nota]

[Plachi na pagina 24]

Ami hunto cu mi mayornan y mi ruman homber tempo mi tawatin un aña

[Plachi na pagina 26, 27]

Cantando cu Arturo Castro y Su Castronan 76

[Reconocemento]

Angel Otero

[Plachi na pagina 28]

Ami hunto cu mi famia awe

[Reconocemento pa Potret na pagina 24]

Activa, 1979