“Mare Nan Por Tawata Sa!”

DESPUES di a caba scol secundario, den un tempo cu hopi hoben ta fiha nan bista riba metanan materialista, David tawatin otro plan. Na september 2003, e hunto cu un amigo di dje a muda for di Illinois, Merca, bai Republica Dominicana.a Davey, manera su amigonan y famia tawata yam’e, a dicidi di siña Spaño y join Congregacion Navas di Testigonan di Yehova den nan obra di siña hende Bijbel. E congregacion a lag’e sintie na cas. Juan, e unico anciano di e congregacion ei, a bisa: “Kico cu bo pidi Davey e tawata haci pa bo. Semper e tawata cla pa yuda otro hende, y e rumannan tawata stim’e.”

Davey tawata stima su asignacion. El a skirbi un amigo di dje na Merca: “Mi ta pasando e miho momentonan di mi bida aki. E ministerio ta hopi refrescante! Nos ta papia rond di 20 minuut na cada cas pasobra e hendenan kier tende tur loke bo tin di bisa nan. Mi ta dirigiendo seis estudio di Bijbel caba, pero nos tin mester di mas yudansa. Na un reunion, nos congregacion di 30 publicado di Reino tawatin un asistencia di 103 persona!”

Lamentablemente, dia 24 di april 2004, un accidente a costa bida di e hoben Davey y di un otro yoncuman di e mesun congregacion. Te na su morto, Davey tawatin un gran entusiasmo pa e trabou cu e tawata haciendo, y el a anima otro hobennan na su pais natal pa join e. “Esei lo cambia bo manera di mira cosnan”, el a bisa un hoben Testigo.

Un cambio di punto di bista cu Davey mes a experencia tawata relaciona cu cos material. Algo cu su tata ta corda di dje ta cu un biaha cu el a bin bishita nan, algun hende a invit’e pa e bai ski. El a puntra cuanto esei ta costa. Ora nan a bis’e cuanto, Davey a laga sa cu e no ta pensa mes di bai ski pa asina tanto placa mientras cu pa e mesun montante ei lo e por biba pa hopi luna na Republica Dominicana!

Davey su entusiasmo tawata contagioso. Un hoben di su pais natal a bisa: “Ora mi a tende tur loke Davey tawata haciendo y con felis e tawata, el a pone mi realisa cu mi tambe por logra e cosnan ei. Davey su morto a pone mi medita riba kico hende lo bisa di mi si ami muri, y si lo mi tin un impacto positivo asina riba nan bida.”

Como Testigo di Yehova, e mayornan y rumannan di Davey tin tur confiansa cu Dios lo resusita Davey den e benidero mundo nobo di husticia. (Huan 5:28, 29; Revelacion 21:1-4) Mientrastanto, ta un consuelo pa nan cu Davey a uza su bida den e miho manera posibel, esta, pa sirbi su Creador. (Eclesiastes 12:1) Reflehando riba su decision pa sirbi caminda e necesidad ta mas grandi, Davey a yega di bisa: “Mi ta simplemente desea pa tur hoben haci algo asin’aki y sinti loke ami ta sinti. No tin nada mas miho cu sirbi Yehova cu tur loke nos tin. Mare nan por tawata sa!”

[Nota]