For di Nos Lectornan

Balon Mi a disfruta di e articulo “E Evento di Balon Mas Grandi na Mundo!” (8 di maart 2004) Mi mama di cu e tin gana di zweef un dia den un balon, y ami tambe tin gana. Ora mi a lesa e articulo, mi no por a kere cu tin asina tanto balon! Mi a gusta e potretnan. Mi tin ocho aña.

J. L., Merca

Mata Remarcabel Nunca mi a lesa algo asina interesante y extraordinario manera e articulo “Un Sobreviviente Remarcabel.” (8 di maart 2004) Welwitschia ta realmente un mata remarcabel. Ta con e ta logra biba asina largo den e condicionnan dificil ei? E tipo di articulonan aki ta revela mas plenamente e sabiduria di nos ingenioso Creador, Yehova.

A. C., Rusia

Mi a lanta na Angola y varios bes mi tawatin e oportunidad di mira welwitschia. Cada bes e mata straño aki tawata fasina mi. Pero mi tawatin pregunta tocante e diferente creencianan cu hende en general tawatin relaciona cu ne. Awor, 27 aña despues, mi a ricibi e informacion cu mi tawata desea.

A. O., Suisa

Mi tin mas cu 15 aña ta lesa Spierta! Door cu mi no por biaha, e tipo di articulonan aki ta yuda mi studia Yehova su creacion en detaye. Si no tawata pa Spierta!, nunca lo mi tawata sa cu welwitschia por a biba asina tanto tempo.

L. Z., Francia

Grupo di Sanger Danki pa e articulo “E Punto di Bista Biblico: Bo Personalidad Ta Ser Determina pa Bo Grupo di Sanger?” (8 di februari 2004) E asunto aki tawatin mi un poco molestia. Na scol nan a bisa mi cu bo personalidad no por ser determina door di bo grupo di sanger. Tambe mi a lesa den algun buki cu e practica di uza grupo di sanger pa determina personalidad ta conecta cu spiritismo. Pero mi conoce hende cu hopi bes ta papia di grupo di sanger y ta husga otro a base di esei. Y net ora mi a cuminsa puntra mi mes kico ta berdad of mentira, e articulo aki a sali y mi por a compronde e punto di bista biblico bon cla.

R. K., Japon

Mi a haya e articulo hopi interesante. Na scol nan ta bisa cu un persona cu e tipo di sanger A ta precis y sensitivo y un persona cu sanger B ta suave. Hopi bes mi a puntra mi mes: ‘Ta asina mi ta?’ Pero mi a haya un alivio ora mi a siña cu cada persona tin su propio personalidad. Tambe mi por a reconoce cu nos por cambia nos personalidad door di somete nos mes na e influencia di Dios su spirito santo.

N. I., Japon

Sucu Hopi hende a bisa mi cu e articulo “E Sucunan di Bida” (8 di april 2004) indirectamente a promove un producto popular di salu cu ta supose di cura malesa, incluso cancer. Mi meta no ta pa critica boso articulo, pero mi precupacion ta e hendenan cu ta uz’e pa gana placa of pa promove nan ideanan.

P. K., Australia

“Spierta!” ta reacciona: E articulo “E Sucunan di Bida” ta djis informa di e descubrimento cu biologonan a haci relaciona cu e papel importante cu sucu ta hunga den hende su salu. Ni un ora so no tawata e intencion pa e sirbi como un apoyo pa un producto en particular. Ora “Spierta!” ta duna informacion riba asuntonan di salu, e no ta recomenda su lectornan ningun tipo di tratamento en particular. Sin importa ki tratamento un cristian scohe, ta keda na dje pa e haci sigur cu e ta refleha sano huicio y no bai contra principionan biblico.