For di Nos Lectornan

Norma y Balor Mi a keda sorprendi ora mi a lesa e declaracion den e prome paragraf di e segundo articulo di e serie “Kico A Pasa cu Norma y Balor?” (8 di juni 2003) El a bisa: “Entre e regalonan di mas grandi cu mayornan por duna nan yiunan ta amor incondicional, y un set di norma y balor cu e mayornan . . . mes ta cumpli cu ne.” Ora yiunan y mayornan ta actua como si fuera nan tin derecho di ricibi amor di otro, norma y balor semper ta bai atras.

K. B., Merca

“Spierta” ta contesta: A uza e frase “amor incondicional” pa indica cu mayornan no mester laga e yiunan sinti cu e mayornan su amor pa nan ta algo fragil y instabil—y cu nan lo stop di stima e mucha un ora pa otro pasobra el a comete un fayo of cu e mucha mester haci tur cos perfecto pa e merece e amor di su mayornan.—Efesionan 6:4; Colosensenan 3:21.

Mi ta haya cu e ultimo articulo den e serie aki ta masha bon mes skirbi. E informacion ta hopi simpel, logico y animante. E plachi ta bunita. Danki pa e articulonan ei, nan ta un consuelo pa nos.

M. P., Merca

Matematica Mi a disfruta ora mi a lesa e articulo “Matematica Ta Util pa Tur Hende.” (8 di juni 2003) Cifra semper a fasina mi. Manera boso a declara, Yehova ta e Gran Matematico y, sin duda, nos tur lo siña mas tocante e logica di cifra den e mundo nobo. Masha danki pa e informacion hopi util aki.

G. C., Gran Bretania

E articulo aki a echt yuda mi. Na scol, wiskunde ta e vak cu mas mi ta odia. Maske mi ta scucha den klas y haci anotacion, toch mi no por comprond’e. Pero despues cu mi a lesa e articulo aki mi ta sinti cu mi por domin’e. Mi ta masha gradicido cu boso a publica e articulo aki. Mi tin 13 aña.

Y. I., Japon

Ta pa mi mes e articulo aki tawata! Mi tin 15 aña y mi no ta bon den wiskunde. Ora mi ta wak e somnan di wiskunde mi ta bisa mi mes: ‘E cos aki no por yuda mi cu nada ora mi bira grandi, pues no ta bale la pena pa siñ’e.’ Sinembargo, debi na e articulo aki, mi ta compronde cu wiskunde ta util den hopi manera. Pesei, mi a dicidi awor pa traha mas duro y no entrega. Por fabor, sigui publica articulonan manera esaki!

M. N., Japon

Sentidonan Danki pa e serie “Bo Ta Aprecia e Sentidonan Asombroso di Bida?” (8 di maart 2003) Nos sentidonan di berdad ta yuda nos aprecia bida y nos medioambiente. Articulonan manera esakinan ta fortalece nos amor pa Dios. Danki pa publica nan.

J. N., Burundi

Materialismo Mi kier a gradici boso pa e articulo “E Punto di Bista Biblico: Kico Ta Haci Hende Materialista?” (8 di april 2003) Ta cierto cu awendia tin hopi hende cu ta obsesiona cu e idea di bira rico y, desafortunadamente, e problema aki por afecta cristiannan tambe. E articulo aki a yuda mi compronde kico ta haci hende materialista, y con pa evita esei. Awor lo mi haci tur loke ta posibel pa consentra riba cosnan spiritual y no riba cosnan material. Masha danki cu boso a publica un articulo asina instructivo!

Z. K., Rusia