Edificionan Antiguo Ta Exhibi Dios Su Nomber

DI UN ESCRITOR DI SPIERTA! NA SLOVENIA

Atrabes di siglonan, hende a construi misa y monasterio riba topnan di sero rond Europa. E edificionan antiguo aki su arkitectura ta varia for di e estilo Romano di Edad Medio—cu nan muraya- y bognan tipicamente diki y curva—te na e estilo barok super elabora y dramatico di siglonan despues. Un cos interesante ta cu den hopi di e edificionan aki bo por haya e Tetragramaton, e cuater letternan Hebreo cu ta spel Dios su nomber personal.

Por ehempel, tuma e monasterio di Stična, un di e monasterionan mas bieu di e orden cisterciense, situa na Slovenia. Nan a constru’e na aña 1135, un 40 aña so despues cu nan a funda e orden di soeur cu frère cisterciense na Francia. Aunke nan a renoba e monasterio varios biaha, el a keda cu su estilo original Romano, pero awor cu adornonan barok. Paden e ta dorna cu varios cuadro y estatua. Un altar den banda ta decora cu letternan grandi di oro di e Tetragramaton cu un krans di plata rond di dje.

E stad di Slovenj Gradec ta ser menciona pa prome bes den registronan skirbi di siglo 10. Nan a traha un misa di arkitectura estilo gotico cu un hospital pega na dje na aña 1419. Parti paden tin un cuadro pinta riba henter un banda di muraya. E ta data di siglo 15 y ta presenta 27 esena biblico. E ta cuminsa cu e resureccion di Lazaro y ta termina cu Pentecoste. Na un otro sitio den e mesun edificio, bo ta haya e nomber di Dios skirbi cu letternan Hebreo preto riba un fondo di oro.

Den e region nortwest di e pais tin e stad di Radovljica. Den e añanan di 1400, e pueblito tawata rondona pa muraya y un canal di awa, y a consisti di un kasteel, un misa y varios otro edificio. Riba un di e altarnan di e misa tin un plakkaat di oro cu ta contene e Tetragramaton.

Serca di e pueblito di Podčetrtek tin un monasterio antiguo cu nan a construi den siglo 17. Paden, un observado atento lo descubri un pintura riba muraya dorna cu e nomber dibino.

Den hopi otro edificio bieu na Slovenia bo por mira e Tetragramaton. Pues, segun cu turistanan ta admira e artesania y talento artistico di tempo antiguo, nan por siña cu habitantenan di antes tawata conoci cu e nomber di Dios.

[Plachi na pagina 31]

Altar den banda den e monasterio Stična

[Plachi na pagina 31]

Paden di misa Sveti Duh na Slovenj Gradec

[Reconocemento]

Slovenj Gradec - Cerkev Sv. Duha, Slovenija