For di Nos Lectornan

For di Nos Lectornan Mi gusta lesa e rubrica “For di Nos Lectornan.” Tin bes mi ta uza comentarionan cu e lectornan a haci pa motiva e personanan cu mi ta studia Bijbel cu ne, pa presta atencion special na cierto articulo. E rubrica ta mustra cu boso esfuerso pa alcansa curason di hende no ta en vano.

S. A., Rusia

Awa Mi ta traha den e ramo di nutricion y control di peso, y e articulo “Awa, e Likido Balioso y Vital pa Bida”, tawata net loke mi tawatin mester. (8 di juni 2003, na Spaño) Boso a logra resumi den un solo articulo, tur loke mi a siña den un curso di nutricion cu a dura 30 ora. Mi tin intencion di uza e informacion aki pa yuda mi clientenan.

J.F.S.F., Brazil

Spiek Danki pa e articulo “Hobennan Sa Puntra . . . Ki Tin di Malo den Spiek?” (8 di februari 2003) E muchanan den mi klas kier a paga mi un suma grandi pa mi traha proefwerk pa nan. Door cu mi no kier a haci esei pa nan, nan a pensa cu mi ta irasonabel. E articulo a recorda mi cu nos mester tene Dios su normanan na halto y nunca compromete nos principionan.

F.A.C., Nigeria

Nunca mi no tawata traha huiswerk mi mes. Semper mi tawata skirbie over for di e muchanan den mi klas. E articulo aki a yuda mi compronde cu skirbi huiswerk over for di otro mucha ta mescos cu horta. Aunke e muchanan di mi scol no a gusta esei, ami si a tuma mi decision.

Y. D., Rusia

Diabetes Ora mi a lesa e serie “Con pa Biba cu Diabetes” (8 di mei 2003) y a lesa cu ora bo tin cu orina cada bes tambe ta un sintoma, mi a realisa cu mi tambe por tin diabetes. Pues, mi a bai controla y mi a haya sa cu mi ta diabetico. Tin mas cu un luna caba cu mi a haci checkup y mi ta trahando pa baha e nivel di sucu den mi sanger door di uza remedi, sigui un dieta y haci ehercicio. Si mi no a mira e revista, kisas lo mi no a haya sa cu mi tin e malesa ei.

Y. N., Japon

Mi no ta un Testigo di Yehova, ma mi ta haya boso revistanan serca un bon biciña. Mi a gusta e serie tocante diabetes masha hopi mes. Door cu mi ta siñando pa duna cuido na hende grandi, mi mester a traha un scriptie riba e tema di diabetes. Si mi a haya e revista un par di dia prome, esei lo a scapa mi e trabou di busca den asina hopi buki. Boso articulonan ta hopi util.

A. S., Alemania

Sed Spiritual E articulo “Con Mi Sed Spiritual A Ser Sacia” a pone awa basha for di mi wowo. (8 di juli 2003) Mi a lanta den un famia catolico y pa ocho aña largo mi a bai scol catolico. Aunke nunca nos no tawata lesa Bijbel na scol ni na misa, semper mi tawatin aprecio pa Bijbel y mi tawata lesa for di mi ehemplar tur anochi. Mescos cu Lucia Moussanett, mi tambe kier a haci e cosnan cu mi a siña for di Bijbel, pero mi no tawata sa con. Ora mi a cuminsa studia Bijbel cu Testigonan di Yehova, mi sed spiritual a ser sacia. Masha danki pa e storianan di bida conmovedor manera esun aki!

K. F., Merca